ۇلتتىق قۇرىلتاي – ەل ومىرىندەگى وزىق قوعامدىق قۇندىلىقتاردى دامىتىپ, نىعايتۋعا سەپتىگىن تيگىزەتىن ايتۋلى وقيعا. اتىراۋدا وتكەن جيىنىندا دا قوعام دەرتىنە اينالعان ماڭىزدى ماسەلەلەر كوتەرىلىپ, ولارمەن كۇرەسۋدىڭ جولى ناقتى ءسوز بولدى. مەملەكەت باسشىسى ايتقانداي, ۇلتتىق قۇرىلتاي ەشقاشان توي تويلاپ, اڭگىمە-دۇكەن قۇراتىن جيىن بولعان ەمەس, بۇل جيىن – ماڭىزدى باستامالار مەن جوبالار جۇزەگە اساتىن الاڭ.
قۇرىلتايدا قوعامنىڭ بىرلىگىن نىعايتۋ, ۇلتتىق قۇندىلىقتاردى دامىتۋ ماسەلەلەرى تالقىلاندى. مۇنىڭ ەل بىرلىگىنە, مەملەكەتتىڭ تۇراقتىلىعىنا تيگىزەر اسەرى مول. بۇل رەتتە مەملەكەت باسشىسى «ەلىمىز ءۇشىن حالىق بىرلىگىن ساقتاۋ وتە ماڭىزدى», دەپ اتاپ ءوتىپ, قاجەتتى العىشارتتار مەن ناقتى ماسەلەلەرگە توقتالدى.
باسقوسۋدا ونوماستيكا, تاريح, رۋحانيات, قازاق ءتىلى, ەلدىك قاعيداتتارى, ۇلتتىق بىرەگەيلىكتى نىعايتۋ ماسەلەلەرى دە ءسوز بولدى.
«مەن ەكونوميكانى دامىتۋ ءۇشىن «كرەاتيۆتى يندۋستريانىڭ» ءمان-ماڭىزى زور ەكەنىن ۇنەمى ايتىپ ءجۇرمىن. بۇل مەملەكەتتىك ءتىلدىڭ بولاشاعى ءۇشىن دە وتە ماڭىزدى. قازاق ءتىلىن دامىتامىز دەسەك, قازىرگى زامانعى ءادىس-تاسىلدەردى بارىنشا ءتيىمدى پايدالانعان دۇرىس. تەك اقپاراتتىق تەحنولوگيانىڭ پايدالى جاعىن الىپ, زياندى جاعىنان ساق بولعان ءجون. اشىعىن ايتساق, ينتەرنەتتى تالعامسىز پايدالانۋ بالا تاربيەسىنە تەرىس ىقپال ەتىپ جاتىر. بۇل – وكىنىشكە قاراي, اقيقات. بالالار تۇگىل, اتا-انالار دا الەۋمەتتىك جەلىدەگى ماعىناسىز كونتەنتكە تىم اۋەس. ءبىز, ەڭ الدىمەن, جاستاردى كىتاپ وقۋعا باۋلۋىمىز كەرەك. سوندا جاپپاي كىتاپ وقيتىن ۇلتقا اينالامىز», دەگەن پرەزيدەنت ەلىمىزدە كىتاپ وقۋدىڭ كەنجەلەپ قالعانىن, كەيىنگى جىلدارى جاعدايدى تۇزەۋ ءۇشىن ارەكەت جاسالىپ جاتقانىن ايتتى.
مەملەكەت باسشىسىنىڭ نازارىنان قاۋىپتى كەسەل – لۋدومانيا, ياعني قۇمارپازدىق تا شەت قالمادى. ەلىمىزدە 400 مىڭعا جۋىق ازامات – بۋكمەكەرلىك كەڭسەلەر مەن كازينولاردىڭ تۇراقتى كليەنتى. بۇل – تۇتاس ءبىر قالانىڭ حالىق سانىنا پارا-پار كورسەتكىش. پرەزيدەنت ايتقانداي, شىن مانىندە, لۋدومانيا – بەيبىت كۇندە ەلدىڭ شىرقىن بۇزىپ وتىرعان قاتەر. سونىڭ كەسىرىنەن تالاي شاڭىراق شايقالدى. تالاي ازامات زاڭ بۇزىپ, قىلمىسقا ۇرىندى. قۇمار ويىن ءۇشىن قارىزعا باتىپ, وزىنە قول جۇمساعان جاندار تۋرالى حابارلار, وكىنىشكە قاراي, كۇن سايىن تاراپ جاتادى. بۇل دەرت جاس ۇرپاققا وتە ۇلكەن زيان كەلتىرەدى. ونلاين ويىندار بالالاردىڭ كۇندەلىكتى ەرمەگىنە اينالىپ بارادى. سونىمەن قاتار قۇرىلتاي وتىرىسىندا تەرىس ءدىني اعىمداردىڭ زاردابى جايىندا دا جان-جاقتى ايتىلدى.
ءداستۇرلى تۇردە وتەتىن قۇرىلتايدا ايقىندالعان باعىتتار ەلىمىزدىڭ بارلىق سالاسى ءۇشىن ماڭىزدى. وسى ورايدا وبلىس اكىمدىگىنىڭ جاستار ساياساتى باسقارماسى ەل پرەزيدەنتى جۇكتەگەن مىندەتتەرگە باسا ءمان بەرىپ, ولاردى ورىنداۋعا قاتىستى جۇمىستاردى جۇيەلى جۇرگىزە بەرەدى.
جومارت زۇلپىحار,
جامبىل وبلىسى اكىمدىگىنىڭ باسقارما باسشىسى