ايدان-ايعا جالعاساتىن «تازا قازاقستان» اكتسياسى اياسىندا شىعىس جۇرتى جاپپاي سەنبىلىككە شىعىپ ءجۇر. «كيەلى مەكەن» دەپ وڭىردەگى تاريحي جەرلەردى قوقىستان تازارتىپ, جاسىل جەلەك ەكتى.
«كيەلى مەكەن» اپتالىعىندا 250 ادام ۇلان اۋدانىنداعى اقباۋىر ارحەولوگيالىق كەشەنىنىڭ اينالاسىن تازارتىپ, كوشەتتەر ەگىلدى. ەكولوگيالىق ءىس-شارانى ۇلان اۋدانى اكىمدىگى مەن شقو جۋرناليستەر وداعى فيليالى ۇيىمداستىردى. سونىمەن قاتار بۇل كۇندەرى تابيعات جاناشىرلارى مۋزەيلەردىڭ اينالاسى, وسكەمەندەگى قابانباي باتىر ەسكەرتكىشىنىڭ ماڭىن مۇنتازداي ەتتى.
تاريحي ەسكەرتكىشتەردى قورعاۋ كۇنىمەن تۇسپا-تۇس كەلگەن «كيەلى مەكەن» اپتالىعىندا ۇلان اۋدانىنىڭ تۇرعىندارى, اكىمدىك قىزمەتكەرلەرى جانە ءبىر توپ جۋرناليستەر قورجىنباي تاۋىنىڭ بوكتەرىندەگى اقباۋىر ارحەولوگيالىق كەشەنى مەن بەستەرەك ولكەتانۋ مۋزەيىنىڭ ماڭىن تازارتتى, كوشەت ەكتى.
– بۇگىن تاريحي ماڭىزى زور «اقباۋىر» كەشەنىنىڭ اۋماعى تازالاندى. ەكولوگيالىق اكتسيا اياسىندا كەشەن اۋماعىنا 50 ءتۇپ كوشەت, بەستەرەك اۋلىنداعى مۋزەي اۋماعىنا 30 ءتۇپ كوشەت وتىرعىزىلدى. سونداي-اق قاتىسۋشىلارعا ارناپ ۇلان اۋدانىنىڭ مادەنيەت قىزمەتكەرلەرىنىڭ دايىنداعان مەرەكەلىك كونتسەرتى قويىلىپ, اس بەرىلدى, – دەيدى ۇلان اۋدانى ىشكى ساياسات ءبولىمىنىڭ باسشىسى قانات ورالبەك.
ايتىپ وتكەندەي, بۇل ىسكە جۋرناليستەر قاۋىمى دا بەلسەنە قاتىسقان. ولار كەشەننىڭ كىرەبەرىسىنەن تورگە قاراي قورشاۋدى جاعالاي باتىس التايدىڭ جاسىل شىرشاسىن وتىرعىزدى.
– نەگە ەكەنىن قايدام, وسىنداي كيەلى جەرلەر ءجيى لاستانادى. تۋريستەردىڭ دەنى دەمالۋ مادەنيەتىن بىلمەي مە, شاشىپ كەتەدى. سوندىقتان وسىنداي شارالاردى ءجيى ءارى كەڭ كولەمدە ۇيىمداستىرسا, بىرەۋ بولماسا, بىرەۋى ويلانار ەدى. قالامىز دا, دالامىز دا لاستانباس ەدى. ءبىز شقو جۋرناليستەر وداعى فيليالىنىڭ شاقىرتۋىمەن سەنبىلىككە كەلدىك. كوشەت وتىرعىزدىق, اينالانى تازالادىق, – دەيدى وبلىستىق «مەنىڭ ولكەم» گازەتىنىڭ ءتىلشىسى ۆالەنتينا سۆيردەنكو.
ۇلان اۋدانىندا ۇيىمداستىرىلعان «كيەلى مەكەن» اكتسياسى وتە جوعارى دەڭگەيدە ءوتتى. اكتسيا باستالماس بۇرىن اقساقالدار باتا بەرىپ, اۋدان باسشىلىعى اقجارما تىلەكتەرىن ايتتى, جينالعاندارعا العىس ءبىلدىردى. جۇمىس كوتەرىڭكى كوڭىل كۇيمەن باستالسىن دەگەن نيەتتە ۇلاننىڭ كۇمىس كومەي انشىلەرى اننەن شاشۋ شاشتى. ءسويتىپ, اينالدىرعان ءۇش ساعاتتىڭ ىشىندە اينالا تاپ-تازا بولدى. يگى ىستەر مۇنىمەن توقتاپ قالماي, «تازا قازاقستان» اكتسياسى جالعاسىن تابا بەرەدى.
شىعىس قازاقستان وبلىسى,
ۇلان اۋدانى