Maqsut Narikbayev University باسشىلىعى ستۋدەنتتەردىڭ ءبىلىم-بىلىگىن, كاسىبي داعدىلارىن جەتىلدىرۋمەن قاتار جاڭاشىل ستۋدەنتتەردىڭ وزىق يدەيالارىن قولدايدى.
بىرەر كۇن بۇرىن ۋنيۆەرسيتەت ۇجىمى «TRAVEL Hack: Transformative Routes, Adventure, Vision, Exploration and Legacy» تاقىرىبىندا رەسپۋبليكالىق حاكاتون ۇيىمداستىرىپ, وندا ەلدىڭ بىرنەشە وڭىرىنەن كەلگەن وزىق ويلى ستۋدەنتتەر باس قوسقان. بۇل ءىس-شارانىڭ ماقسات-مۇراتى – ستۋدەنتتەردىڭ ستارتاپ جوبالارىمەن قاتار تۋريزم سالاسىنداعى كاسىپكەرلىكتى قولداۋعا نەگىزدەلىپتى. حاكاتونعا Nazarbayev University, Astana International University, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى, ق.جۇبانوۆ اتىنداعى اقتوبە وڭىرلىك ۋنيۆەرسيتەتى, AITU, ە.بوكەتوۆ اتىنداعى قاراعاندى ۋنيۆەرسيتەتى, س.تورايعىروۆ ۋنيۆەرسيتەتى, KazUTB, ش.ەسەنوۆ اتىنداعى كتيۋ جانە Kazakh-British Technical University-دەن جۇزدەگەن ستۋدەنت كەلىپ قاتىسقان. بايقاۋدىڭ جالپى جۇلدە قورى 1 ملن 600 مىڭ تەڭگەنىڭ شاماسىندا بولسا, باعىت-باعدارى ەرەكشە ءىس-شارانى قولداۋعا «Kazakh Tourism» ۇلتتىق كومپانياسى نيەت ءبىلدىرىپتى.
رەسپۋبليكالىق حاكاتوننىڭ اشىلۋ سالتاناتىندا Maqsut Narikbayev University رەكتورى سەرگەي پەن قاتىسۋشىلارعا تابىس تىلەدى. بۇل كۇنى ۇمىتكەرلەر ەكوتۋريزم, ينكليۋزيۆتى تۋريزم, كولىك كومپانيالارىنا ارنالعان شەشىمدەر, اعىلشىن تىلىندەگى ونلاين گيدتەر, قوناقۇيلەرگە ارنالعان B2B شەشىمدەر, تۋريستىك اۆتوبۋستارعا ارنالعان ماركەتپلەيس سەكىلدى ءتۇرلى باعىتتا جوبا دايىندادى. سونىمەن, ۇزدىك يدەيا, جوبا-جوسپارلار ۇسىنىلعان بايقاۋدا «Dataflow» كومانداسى دارا شىقتى. ولار تۋريستىك اگەنتتەردىڭ سەنىمدىلىگىن تەكسەرەتىن ءتاپ-ءتاۋىر جوبا ازىرلەپتى. ال ەكىنشى ورىندى «Sanatopia» كومانداسى ەنشىلەسە, ءۇشىنشى ورىن «Take over blur» كومانداسىنا بۇيىردى. ولار تۋريستىك اۆتوبۋستارعا ارنالعان قوسىمشا دايىنداعان. جۇلدەگە قولسوزىم قالعان «Fighting» كومانداسى كورەرمەندەر كوزايىمى اتاندى.
بايقاۋ مارەسىنە جەتە بەرە وزىق ويلى ستۋندەنتتەردىڭ ەڭبەگىنە ريزا بولعان «Kazakh Tourism» باسقارما توراعاسى قايرات سادۋاقاسوۆ ءتۋريزمدى دامىتۋ باعىتىنداعى جاڭاشىل يدەيالاردى اركەز قولدايتىنىن ايتتى.
«مەنىڭ ويىمشا, بۇل حاكاتوننىڭ قاتىسۋشىلارى بولاشاقتا Nasdaq-تا نەمەسە باسقا دا بيرجالاردا ساتىلاتىن كومپانيالاردى قۇرايدى. وسى جارىسقا قاتىسقان ستۋدەنتتەردىڭ الەمدىك دەڭگەيدەگى تسيفرلىق شەشىمدەر ويلاپ تاباتىن پروۆايدەرلەر بولاتىنىنا سەنىمىم زور. ال ءبىز, «Kazakh Tourism» ۇلتتىق كومپانياسى, وسى ءىس-شارانى قولداۋعا ءاردايىم دايىنبىز», دەدى ق.سادۋاقاسوۆ.
راسىمەن دە, نەبىر ۇزدىك ستارتاپ جوبالار ۇسىنىلعان بايقاۋدىڭ تۋريزم سالاسىن دامىتۋدا ءرولى ماڭىزدى. سوندىقتان ۇيىمداستىرۋشىلار حاكاتون جاڭا يدەيالار مەن يننوۆاتسيالىق تاسىلدەردىڭ الاڭىنا اينالادى دەگەن سەنىمدە.