تاۋلى وڭىرلەردە بىرنەشە كۇن جاڭبىر ارالاس قار جاۋىپ, جۇرتتى تاعى ابىگەرگە سالدى. كۇرشىم وڭىرىندە جولدى سۋ شايىپ كەتسە, مارقاكول اۋدانىندا لاي كوشكىنى ءجۇرىپ, جولدى وپىرعان. التاي اۋدانىنىڭ بىرقاتار اۋلىندا سۋ باسۋ قاۋپى ءالى بار.
بيىلعى كوكتەم ەل-جۇرتتى ابىگەرگە سالىپ-اق تۇر. جەر-جەرلەردە الدىن الۋ جۇمىستارىن اقپان ايىندا باستاعانىمەن, ءتىلسىز جاۋدىڭ قاشان, قايدان لاپ قويارىن ەشكىم ءدوپ باسىپ ايتا الماعان. تابيعاتتىڭ توسىن مىنەزىن بولجاۋ دا وڭاي ەمەس.
12 ساۋىردە مارقاكول وڭىرىندە توقتاۋسىز جاۋعان جاڭبىر مەن ەرىگەن قار سۋىنىڭ سالدارىنان بولسا كەرەك, توپىراق كوشكىنى ءجۇرىپ, كۇرە جول وپىرىلىپ تۇسكەن. جولاۋشىلاردىڭ قاۋىپسىزدىگى ءۇشىن تەرەكتى – ۇرانحاي – توسقايىڭ وبلىستىق ماڭىزى بار جولدىڭ 13 شاقىرىمى, ياعني ءمارمار اسۋىندا جول جابىلىپ, ويىلعان تۇستى قايتا قالپىنا كەلتىرۋ جۇمىستارى دەرەۋ باستالعان. بۇل ءۇشىن پوليتسيا قىزمەتكەرلەرى كەزەكشىلىك ۇيىمداستىرىپ, اۋىر تەحنيكالار 20 مەتردەي تەرەڭ شۇڭقىردى تولتىرۋمەن اينالىسا باستاعان. اۋەلدە جەرگىلىكتى بيلىك ويىلىپ تۇسكەن جەر ءبىر-ەكى كۇننىڭ شارۋاسى ەمەس دەگەن. ابىروي بولعاندا, كوپتەپ كومەكتەپ ءجۇرىپ ەكى-ءۇش كۇن ىشىندە جولدى قايتا قالپىنا كەلتىردى.
«وبلىستىق ماڭىزى بار جولدىڭ بويىندا تاۋ جىنىستارى وپىرىلىپ قۇلاپ كەتتى. نەشە كۇن جاۋعان جاڭبىر مەن ەرىگەن قاردىڭ سۋى توپىراق توسەمىن اعىزىپ اكەتكەن. جول جابىلدى. ءتيىستى مامانداردان كوميسسيا قۇرىلىپ, وقيعا ورنىنا جەتتىك. زەرتتەپ, جۇمىستى باستادىق. تەحنيكالاردىڭ كۇشىمەن, مامانداردىڭ بىلىكتىلىگىمەن جول تەز ارادا جوندەلدى. ايتا كەتەيىك, بۇل تۇستا جولاستى قۇبىرى بولماعان», دەدى وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى نۇرجان ءجۇمادىلوۆ.
ءۇش-ءتورت كۇنگە جول جابىلعانىمەن, جەدەل جاردەم مەن ازىق-ت ۇلىك تاسىمالدايتىن كولىكتەر ءۇشىن اينالما جول قاراستىرىلعان. ال اۋدان حالقى تۇسىنىستىك تانىتىپ, جولعا شىقپاعان.
بۇل كۇنى وزەننەن كوتەرىلگەن سۋ بوران اۋلىنا دا جايىلعان. اۋدان اكىمدىگى ماماندارىنىڭ مالىمەتىنشە, جۇمىلدىرىلعان كۇش ءتىلسىز جاۋدىڭ بەتىن بىردەن قايتارعان. بۇل ءۇشىن بوران – زايسان باعىتىنداعى كۇرە جولدان سۋ وتكەلى قازىلىپ, قاتىناس توقتاعان. وسى ۋاقىتتا شىعارماشىلىق جۇمىسپەن زايسانعا بارعان بوران مەكتەبىنىڭ مۇعالىمدەرى مەن وقۋشىلارى ۇيلەرىنە قايتىپ, اۋىلعا كىرۋگە مۇمكىندىك بولماعان. ونى ەستىگەن زايسان اۋدانى اكىمدىگى ينتەرنات-ۇيدەن ورىن بەرىپ, ىڭعايلى جاعداي جاساعان. ال بوران اۋلىنداعى جاعداي – ەرەكشە باقىلاۋدا.
ءدال سول كۇنى كۇرشىم اۋدانىنداعى قالعۇتى وزەنىنىڭ سۋى ارناسىنان شىعىپ, قاۋىپ توندىرگەن. كۇرشىم اۋدانىنىڭ اكىمدىگى حابارلاعانداي, سۋ باسۋدىڭ الدىن الۋ ءۇشىن وبلىستىق ماڭىزى بار كۇرشىم – اقسۋات جولىنىڭ 23 شاقىرىمىندا جينالعان سۋدى وتكىزۋگە ارنالعان ارنا سالىندى. جول امانات, جولنۇسقاۋ جانە اقسۋات ەلدى مەكەندەرىن جالعايدى. اتالعان ەلدى مەكەندەردە ۇزىن سانى 705 ادام تۇرادى. قازىر ولار اۋىلدارىنا اينالما جولمەن قاتىناپ ءجۇر. جولدى قالپىنا كەلتىرۋ ءۇشىن قاجەتتى ماتەريالدار دايىندالىپ, وپىرىلعان جەرگە جەتكىزىلىپ جاتىر. ال جول سۋ دەڭگەيى تومەندەگەننەن كەيىن عانا جوندەلەدى.
سونىمەن قاتار التاي اۋدانىنا قاراستى بىرقاتار اۋىلعا دا قارعىن سۋ قاۋىپ توندىرگەن. ابىروي بولعاندا, ءۇيدى-ۇيگە جايىلىپ, تۇرعىنداردىڭ تىنىشىن الا قويعان جوق. ماماندار كۇن-ءتۇن دەمەستەن وزەن بويىنداعى اۋىلداردى ءجىتى باقىلاپ ءجۇر. وبلىس باسشىلىعى دا سۋ باسۋ قاۋپى بار دەگەن اۋىلداردى ءوز كوزىمەن كورىپ قايتقان.
التاي تاۋ سىلەمدەرىنىڭ قارى ءساۋىردىڭ سوڭىنا قاراي ەري باستايتىنىن ەسكەرسەك, ارقانى كەڭگە سالۋعا تىم ەرتە. تاۋدىڭ تەنتەك وزەندەرى ارنالارىنان اسىپ تاسىسا, بىرقاتار اۋىلعا قاۋىپ توندىرمەي قويمايدى. سول ءۇشىن دايىندىق جۇمىستارى پىسىقتالىپ تۇرۋى كەرەك-اق.
شىعىس قازاقستان وبلىسى