عاشىقتىق – جان قۋاتى. ول – جۇرەك قازىناسىن اشاتىن جالعىز كىلت. مۇنداي باققا قول جەتكىزگەن جانداردىڭ ءومىرى نۇرلى, كوڭىلى گۇلدى بولماق. كۇللى دۇنيە ولاردىڭ شۇعىلاسىنا شومىلادى. قيساپسىز قاتىگەزدىكتى ازەر كوتەرىپ تۇرعان قارا جەر وسىنداي ءپارۋانا كوڭىل, ءپارۋازا پەيىل عاشىقتاردىڭ قۇرمەتىنە بولا امان تۇرعانداي. حالقىمىزدىڭ قوزى مەن بايان, تولەگەن مەن جىبەك سەكىلدى سەزىم ءسارۋارلارىن العاۋسىز ارداقتاپ كەلە جاتقانى سوندىقتان.
ءيا, عاشىقتىق – ۇلى سەزىم. سۇيگەنىن تۇتاس بولمىسىمەن قابىلداۋعا جۇرەكتىڭ باتىلدىعى قاجەت. سەزىمگە سەلكەۋ تۇسىرەتىن نارسەنىڭ ءبىرى – شارتتىلىق. حاكىمدەردەن قالعان حيكمەت بار. كۇن جەرگە جارىق بەرىپ تۇرعانىنا قاي زامان؟ سودان بەرى ول جەرگە كەلىپ بىردە-ءبىر رەت: «قاشانعى ساعان جارىعىم مەن جىلۋىمدى توگە بەرەمىن؟ سەن دە ءبىر ۋاق شۋاعىڭدى شاشساڭشى» دەپ ايتا ما؟ جوق. كۇننىڭ ماحابباتى شارتسىز. ادام بالاسى دا وسى كۇنگە ۇقساۋى كەرەك...
وسى ورايدا مىنا ءبىر ولەڭدى ونەگە, ءتالىمدى ءتامسىلدىڭ ويعا ورالىپ وتىرعانى. بىردە بايابان ءشولدى كەزىپ, ارىپ-اشقان ءبىر جولاۋشى ماحاببات قاقپاسىن قاعادى. قاقپانىڭ ارعى جاعىنان اۋەز كەلەدى.
– بۇل كىم ەكەن سۇراۋسىز قاققان ەسىك؟
– مەنمىن, – دەدى جولاۋشى تاق-تاق ەتىپ. سول كەزدە ماحاببات وكتەم ۇنمەن جاۋاپ قاتادى:
– و, بەيادەپ! اشپايمىن قاقپا ساعان. ساعان ارام مۇباراك تاق-بوساعام! – جولاۋشى اڭتارىلىپ قالادى دا, ماجنۇندەي ەڭىرەپ ايدالاعا ماڭىپ كەتەدى. جالعىز كەزىپ بايابان ءشولدى كۇندە, وكىنىشپەن ولەتىن بولدى مۇلدە. تالاق قىلىپ ىشتەگى ءوز قالاۋىن, قاندى جاسپەن سۋاردى كوز جانارىن. اي اۋىسىپ, جىلدار كوشكەن سوڭ, رۋحاني كامەلەتكە جەتكەن سوڭ جولاۋشى ماحابباتتىڭ قاقپاسىن قايتا قاعادى.
– بۇل كىم ەكەن سۇراۋسىز قاققان ەسىك؟ الاتىنداي قۇددى مەن جاققا كوشىپ, – كۇتكەنىندەي سول ساتتە ءشولدىڭ جاۋىن:
– سەنمىن, – دەدى جولاۋشى, – سەنمىن, جانىم!
ناعىز عاجايىپ وسى كەزدە ورنايدى. اپپاق ەسىك اشىلدى وسكەن گۇل بوپ, اپپاق الەم شاقىردى «قوش كەلدىڭ!» دەپ. سودان جولاۋشىعا ءسۇيىنشى اۋەز كەلەدى:
– قىلىپ ءىشىپ اپ-اششى جاستى شىرىن,
ماحابباتتىڭ تاۋىپسىڭ باستى سىرىن!
العىشارتى وسى-ءدۇر اسىل زاڭنىڭ:
«مەن» دەگەن جوق تىلىندە عاشىق جاننىڭ.
ءيا, عاشىقتىق دەگەن – بولمىس بىرلىگىنە ۇمتىلۋ. بۇل حالگە جەتكەن باقىت يەلەرى «مەن» دەپ ەمەس, ء«بىز» دەپ سويلەيدى. شايدا ەرىگەن شەكەردەي, جارىنىڭ جۇرەگىنە ماڭگىلىك ءسىڭىپ كەتەدى ناعىز عاشىقتار...