جايىق اقىرىن كوتەرىلىپ كەلەدى

وڭىردە قاردىڭ ەرۋى, جەرگىلىكتى وزەندەردىڭ تاسۋ كەزەڭى اياقتالدى. ەندى ترانسشەكارالىق جايىق وزەنىندەگى سۋ تاسقىنى الاڭداتىپ تۇر. جۇما كۇنى ورال قالاسىنىڭ تۇسىنداعى گيدروبەكەتتە سۋدىڭ دەنگەيى 736 سم بولدى. سوڭعى ءبىر تاۋلىك ىشىندە وزەن سۋى 8 سم كوتەرىلدى.

رەسەيلىك ارىپتەستەردىڭ دەرەگى بويىنشا, جايىق وزەنى ورىنبور قالاسىندا بۇرىن-سوڭدى بولماعان دەڭگەيگە كوتەرىلىپ, سۋ دەڭگەيى 1115 سم بولعان. ءبىر تاۋلىك ىشىندە وزەن سۋى 55 سم كوتەرىلگەن. جانە سۋدىڭ قايتۋى ءالى بايقالماي تۇر.

«باتىس قازاقستان وبلىسى اۋماعىنا مول سۋ 4-5 كۇندە كەلەدى, جايىقتا سۋ تاسقىنىنىڭ شىڭى 17-19 ساۋىردە بولۋى كۇتىلەدى», دەلىنگەن سۋ تاسقىنىنا قارسى كۇرەس بويىنشا بويىنشا قۇرىلعان جەدەل شتاب مالىمدەمەسىندە.

بۇگىندە رەسەيدەگى يرەكلى سۋ قويماسىنان جايىق وزەنىنە سەكۋندىنا 902 شارشى مەتر سۋ جىبەرىلىپ جاتىر.

سوڭعى تاۋلىكتە شاعان وزەنىنىڭ دەڭگەيى چۋۆاشين گيدروبەكەتىندە 962 سم بولىپ, سۋ دەڭگەيى تاۋلىك ىشىندە 112 سم-گە تۇسكەنىن كورسەتتى.

قازىر وبلىستا 830 ساياجاي ءۇشىن سۋ باسىپ تۇر. تاسقىن سۋ 63 جەردە اۆتوجولداردى ءبۇلدىرىپ كەتتى. 9 ەلدىمەكەنمەن جول قاتىناسى ۇزىلگەن.

بۇگىنگە دەيىن وبلىستا 13 068 ادام قاۋىپسىز جەرگە كوشىرىلدى, ونىڭ ىشىندە 19 مۇگەدەك, 5 472 بالا بار. ۋاقىتشا ەۆاكۋاتسيالىق بەكەتتەردە 1 819 ادام تۇرىپ جاتىر, 877-ءسى – بالا. 11 249 ادام تۋما-تۋىسىن پانالاعان. تاسقىن سۋدىڭ بەتى قايتقان اۋماقتاردا 4 886 تۇرعىن قازىر ءوز ۇيلەرىنە قايتا ورالدى.

تابيعي اپات كەزىندە 2 402 باس مال شىعىنعا ۇشىراعان. ادام امان.

بۇل كۇندەرى مەملەكەتتىك اۋە قۇرالدارى ارقىلى 17 000 كگ گۋمانيتارلىق كومەك تاسىمالدانسا, 60 000 كگ جۇك اۆتوكولىكپەن, 134 000 كگ جاردەم تەمىرجول ارقىلى كەلگەن.

سۋ تاسقىنى باستالعانى توتەنشەلىكتەر مەن جەرگىلىكتى كوممۋنالدىق قىزمەت كۇشتەرى 1 020 مىڭ تەكشەمەتر قار سۋىن سورىپ ۇلگەرگەن. قازىر 3 175 مىڭ توننا ينەرتتى ماتەريال, 363 مىڭ قاپشىقتان سۋدىڭ جولىنا بوگەت جاسالىپ, مۇنداي قورعاننىڭ جالپى ۇزىندىعى 60 شاقىرىمعا جاقىندادى.

قازىر باتىس قازاقستان وبلىسىندا اپاتتىق-قۇتقارۋ جانە باسقا دا شۇعىل جۇمىستاردى جۇرگىزۋ ءۇشىن 6 وڭىردەن قوسىمشا كۇش پەن قۇرال تارتىلعان. ياعني الماتىدان قورعانىس مينيسترلىگىنىڭ №61993 جانە №18404 اسكەري بولىمدەرىنەن – 100 ادام;

- اقتوبە وبلىسى توتەنشە جاعدايلار دەپارتامەنتىنىڭ جەكە قۇرامىنان 28 ادام, 5 تەحنيكا (ۆاحتوۆكا), 2 ءجۇزۋ قۇرالى جانە تجم-نە قاراستى №20982 اسكەري بولىمىنەن – 30 ادام, 2 تەحنيكا;

- قىزىلوردا وبلىسىنان - قورعانىس مينيسترلىگىنىڭ №66597 اسكەري بولىمىنەن – 200 ادام, 15 كاماز, 6 تويوتا پيكاپ كەلىپ جەتتى.

سونداي-اق قوستاناي وبلىسىنان –تجم №52859 اسكەري بولىمىنەن – 65 ادام, 5 تەحنيكا, 2 موتوسورعى, 2 ءجۇزۋ قۇرالى;

- قىزىلوردا وبلىسى جەكە قۇرامىنان 30 ادام, 2 تەحنيكا, 10 موتوسورعى, 4 قايىق, اپاتتار مەديتسيناسى ورتالىعىنان 4 قىزمەتكەر, 1 تەحنيكا (گازەل);

- تۇركىستان وبلىسى تجد جەكە قۇرامىنان 31 ادام, 2 تەحنيكا, 10 موتوسورعى, 2 قايىق جولدا كەلە جاتىر.

بۇلارعا قوسا الماتى وبلىسىنان دا قورعانىس مينيسترلىگىنىڭ №32363 اسكەري بولىمىنەن – 254 ادام كەلۋى ءتيىس.

بۇگىنگى تاڭدا «قازسۋشار» مەكەمەلەرىنە قاراستى سۋ قويمالارى ورتاشا العاندا 76,4%-عا تولتىرىلعان.

فيليال رەسەي فەدەراتسياسىنىڭ ورىنبور جانە ساراتوۆ وبلىستارىنىڭ سۋ شارۋاشىلىعى قىزمەتتەرىمەن كۇندەلىكتى اقپارات الماسىپ وتىر.

ورىنبور وبلىسىندا ورنالاسقان يرەكلى سۋ قويماسىنان جايىق وزەنىنە جىبەرىلىپ جاتقان سۋ مولشەرى 12-ءساۋىردىڭ 16:00-ساعاتىندا سەكۋندىنا 720 تەكشەمەتر بولعان. ياعني بىرتە-بىرتە ازايىپ كەلەدى.

جايىق وزەنىنىڭ دەڭگەيى ساعات 16:00-دە 736 سم بولىپ تۇر, قاۋىپتى دەڭگەي – 850 سم. سۋ تاسقىنى باسىنان بەرى وزەن دەڭگەيى جالپى 6 مەترگە كوتەرىلدى.