پرەمەر-مينيستر ولجاس بەكتەنوۆ سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى سالدارىن جويۋ جونىندەگى رەسپۋبليكالىق شتابتىڭ جۇمىس كەڭەسىن وتكىزدى. باستى ماسەلە – سۋ تاسقىنىنىڭ ەكىنشى تولقىنى قارساڭىندا باتىس وڭىرلەردەگى جاعداي.
ۆيتسە-پرەمەر, شتاب جەتەكشىسىنىڭ ورىنباسارى قانات بوزىمباەۆ رەسەي فەدەراتسياسىنان جايىق وزەنى ارقىلى كولەمدى سۋدىڭ كۇتىلىپ وتىرعانى تۋرالى باياندادى.
ونىڭ ايتۋىنشا, باتىس قازاقستان وبلىسىندا جاڭبىر جاۋادى. ساقمار وزەنىنىڭ دەڭگەيى كوتەرىلە باستادى. بولجام بويىنشا, جايىق جانە ساقمار وزەندەرىنىڭ جوعارعى جاعىنان ءساۋىر ايىنىڭ ەكىنشى ونكۇندىگىندە باتىس قازاقستان وبلىسىنىڭ اۋماعىنا سۋ كەلەدى. قازىرگى ۋاقىتتا ورال قالاسىنداعى جايىق وزەنىندەگى سۋ دەڭگەيى – 728 سم, ول 850 سم قاۋىپتى مەجەگە جاقىندايدى دەپ بولجانىپ وتىر.
باتىس قازاقستان وبلىسىنان سۋدىڭ كەلۋىنە بايلانىستى اتىراۋ وبلىسىندا وتكەن تاۋلىكتە جايىق وزەنىندەگى گيدروبەكەتتەردە دە سۋ دەڭگەيىنىڭ شامالى كوتەرىلۋى بايقالادى. ءساۋىردىڭ ءۇشىنشى ونكۇندىگىندە ۇلكەن سۋدىڭ كەلۋى كۇتىلەدى.
ۇكىمەت باسشىسى ولجاس بەكتەنوۆتىڭ تاپسىرماسىمەن ونىڭ باتىس قازاقستان جانە اتىراۋ وبلىستارىنا جۇمىس ساپارلارىنىڭ قورىتىندىسىنا سايكەس اكىمدىكتەردىڭ, تجم, ءىىم جانە ۇلتتىق ۇلاننىڭ, قورعانىس مينيسترلىگىنىڭ كۇشتەرى مەن قۇرالدارى جۇمىلدىرىلدى.
باتىس قازاقستان وبلىسىندا اۆاريالىق-قۇتقارۋ جۇمىستارىن جۇرگىزۋ ءۇشىن كۇشتىك قۇرىلىمدار 6 مىڭ ادامعا, اتىراۋ وبلىسىندا 4 مىڭ ادامعا دەيىن جەتكىزىلەدى. ەلىمىزدىڭ ءار وڭىرىنەن 4 مىڭعا جۋىق تەحنيكا جىبەرىلدى.
پرەمەر-مينيستر قورعانىس جانە ىشكى ىستەر مينيسترلەرىنە قاجەت بولعان جاعدايدا قوسىمشا جەكە قۇرام مەن تەحنيكا جىبەرۋدى تاپسىردى.
«ورال مەن اتىراۋ بويىنشا كۇشتەر مەن قۇرالداردى بارىنشا جۇمىلدىرۋ قاجەت. قازىر ۇلكەن سۋدى ەلدى مەكەندەرگە جەتكىزبەي, بۇرىپ اكەتۋ ماڭىزدى. بۇگىن قوسىمشا اسكەري قىزمەتشىلەر مەن تەحنيكا جىبەرىلە باستادى. سۋ اعىسىنىڭ قارقىنىن ەسكەرە وتىرىپ, ءبىرىنشى كەزەكتە ورالدا, ودان ءارى اتىراۋدا الدىن الۋ جۇمىستارىن كۇشەيتەمىز», دەدى ولجاس بەكتەنوۆ.
ۇكىمەت باسشىسى ەكى وبلىس اكىمدىكتەرىنە كەلگەن اسكەري قىزمەتشىلەردى بارلىق قاجەتتى زاتتارمەن قامتاماسىز ەتۋ, سونداي-اق تەحنيكاعا جانارماي قۇيۋ ماسەلەسىن شەشۋ جونىندە تاپسىرما بەردى.
بۇگىندە سەگىز وبلىستا جەرگىلىكتى اۋقىمداعى توتەنشە جاعداي رەجىمى ساقتالعان. سۋ باسقان ايماقتاردان بارلىعى 97 مىڭ تۇرعىن ەۆاكۋاتسيالاندى. 11 ساۋىردەگى جاعداي بويىنشا پاۆلودار جانە اباي وبلىستارىندا سۋ تاسقىنى جاعدايىنىڭ تۇراقتانۋىنا بايلانىستى تج رەجىمدەرى الىنىپ تاستالدى.