ءبىرتۋار ءانشى, اقىن ءارى كومپوزيتور سەگىز سەرىنىڭ «گاۋھارتاس», «نازقوڭىر», «ساۋلەم-اي» اتتى عاجايىپ اندەرى مەن باسقا دا تۋىندىلارى «استانا وپەرا» ساحناسىندا قايتا جاندانىپ, كورەرمەندەردى مۋزىكا حالىقتىڭ جانىنا اينالعان داۋىرگە جەتەلەيدى.
20 ءساۋىر كۇنى ك.بايسەيىتوۆا اتىنداعى كامەرالىق زالدا وتەتىن ۆوكالدىق مۋزىكا كەشىندە «استانا وپەرانىڭ» جەتەكشى ءسوليسى, قازاقستاننىڭ ەڭبەك سىڭىرگەن ءارتىسى جاننات باقتاي تەرەڭ ۇندەستىگى مەن سان الۋان سەزىمدەرىمەن تانىمال وسىناۋ عاجايىپ الەمدى قايتا جاڭعىرتادى.
– ءار اعاشقا تامىرى قالاي ماڭىزدى بولسا, ءاربىر ادامعا ونىڭ شىققان جەرى مەن تەگى, وتانى مەن تاريحى, تۋعان اندەرى سولاي ماڭىزدى. ءدال وسى حالىق اندەرى كومپوزيتورلارعا وپەرا مەن بالەت جاۋھارلارىن جاساۋ ءۇشىن شابىت كوزى بولعان. بالا كۇنىمنەن قۇلاعىما ءسىڭىرىپ, ەستىپ وسكەن قازاق حالىق اندەرى – شىعارماشىلىعىمنىڭ التىن دىڭگەگى. بۇل – مەنى تاريحىممەن, ەلىممەن, مۋزىكالىق وتباسىممەن جانە اتا-باباممەن بايلانىستىراتىن ارقاۋ. ايتۋلى كونتسەرتتە مەن ءتۇپ-تامىرىمىزعا, ونىڭ ىشىندە كەڭ بايتاق سارىارقا دالاسىنىڭ پەرزەنتى, حالقىمىزدىڭ ماقتانىشى, مەنىڭ ارعى اتام, ءوز زامانىنىڭ ايتۋلى ازاماتى, كادەت كورپۋسىن بىتىرگەن وفيتسەر, ءوز ەلىنىڭ پاتريوتى – كومپوزيتور سەگىز سەرىنىڭ شىعارماشىلىعىنا دەن قويىپ, اندەرىنىڭ قىر-سىرىنا بويلايتىن بولامىن. ول جاۋىنگەر رەتىندە ماحامبەت وتەمىس ۇلىنىڭ ازاتتىق قوزعالىسىنا قاتىسقان, «قىز جىبەك», «قوزى كورپەش – بايان سۇلۋ» جانە تاعى باسقا پوەمالاردىڭ العاشقى نۇسقاسىنىڭ قولجازباسىن جاساعان. ەڭ باستىسى, ايگىلى «گاۋhارتاس», «القوڭىر», «اقباقاي» سىندى ايتۋلى اندەردى شىعاردى, بۇل اندەردى جالپىلاما تۇردە جاي عانا حالىق اندەرى دەپ اتاۋ ورىنسىز. كەرەمەت جۇرگىزۋشى, تاريح عىلىمدارىنىڭ كانديداتى, پروفەسسور جۇمامۇرات ءشامشى كونتسەرتتە وسى جانە باسقا دا جايتتار تۋرالى اڭگىمەلەي وتىرىپ, سەگىز سەرىنىڭ ومىرىنەن اسەرلى دە قىزىقتى حيكايالارىن بايان ەتەدى, – دەپ جاننات باقتاي شىعارماشىلىق كەشىنىڭ ەرەكشەلىگى تۋرالى ايتىپ بەردى.
كونتسەرت ءوز ەلىنىڭ مادەني كودىن تانۋعا جانە ساقتاۋعا ۇمتىلعان بارلىق جاندار ءۇشىن مەرەكەگە اينالادى دەپ باسا ايتتى ءانشى. سەگىز سەرىنىڭ تۋىندىلارىنان بولەك, باعدارلامادا حالىق اندەرى, سونداي-اق قازاقستاننىڭ زاماناۋي كومپوزيتورلارىنىڭ شىعارمالارى دا قوسا شىرقالادى. وسىلايشا, مۋزىكالىق داستۇرلەر جالعاستىعى قايتا جاندانىپ, ءان ونەرىنىڭ كوكجيەگىن كەڭىتە تۇسپەك.
– مەنىڭ كونتسەرتىم – پروزا, پوەزيا مەن مۋزىكا ءبىر-ءبىرىن بىرقالىپتى تولىقتىرىپ, ۇيلەسىمدى شىرقالاتىن مۋزىكالىق-ادەبي كەش. ۇلتتىق ونەردى, حالىق مۋزىكاسىن ناسيحاتتاۋ قاي ۋاقىتتا دا كەلەر ۇرپاق ءۇشىن وزەكتى. مۋزىكانى تىڭداۋ عانا ەمەس, سونداي-اق تۋىندىنىڭ جازىلۋ تاريحى, ونىڭ اۆتورلارى, قىزىقتى دەرەكتەر مەن بولعان وقيعالار تۋرالى ايتۋ ماڭىزدى. ويتكەنى ءوزىنىڭ داستۇرلەرىن, ادەت-عۇرىپتارىن, ءتىلىن, ءدىلىن, تاريحىن بىلەتىن, ياعني ءوزىنىڭ مادەنيەتىن تانيتىن ادام – شىن مانىندەگى زيالى ادام. ال وزىنە ءوزى سەنىمدى, جۇرەگى جومارت, نيەتى ءتۇزۋ ءارى ادامگەرشىلىگى مول ادامنىڭ تۇيسىگى مەن جان دۇنيەسى باسقا مادەنيەتتەردى قابىلداۋعا جانە قۇرمەتتەۋگە اشىق. بۇل كونتسەرتتەگى ماقساتىم – تىڭدارماندارعا رۋحاني ءلاززات سىيلاۋ عانا ەمەس, سونىمەن قاتار كونتسەرتكە اعارتۋشىلىق سيپات ۇستەۋ. حالىق اندەرى مەن سەگىز سەرى شىعارماشىلىعى اراسىنداعى زاماناۋي ۇيلەسىمدىلىكتى ايشىقتاپ كورسەتۋ. اتالعان كەشتە تىڭدارمان قاۋىم تاماشا كومپوزيتور-مۋلتياسپاپشى ءادىلجان تولىقپاەۆتىڭ ونەرىنە ءتانتى بولىپ, «استانا وپەرانىڭ» تالانتتى سوليستەرى نارۇل تويكەنوۆ پەن راسۋل جارماعامبەتوۆتىڭ عاجايىپ داۋىستارىن تىڭداي الادى. كونتسەرت كورەرمەندەرىمىزدىڭ كوڭىلىنەن شىعادى دەگەن سەنىمدەمىن, – دەپ ءانشى ءسوزىن قورىتىندىلادى.
كونتسەرت ۇيىمداستىرۋشىلارىنىڭ ايتۋىنشا, قازاق حالقىنىڭ مۇراسىنا اينالعان مۋزىكانى جاڭعىرتۋ – ەلوردالىق تەاتردىڭ نەگىزگى ماقساتتارىنىڭ ءبىرى. « ۇلى دالا سازى» توپتاماسىنان ۇسىنىلىپ وتىرعان «گاۋhارتاس» ۆوكالدىق مۋزىكا كەشى كورەرمەندەرگە حالىق ونەرىنىڭ اسەمدىگى مەن ۇلىلىعىنا بويلاۋعا مۇمكىندىك بەرەدى. بۇل مادەني مۇرانى ساقتاۋدىڭ جانە ونى كەلەر ۇرپاققا جەتكىزۋدىڭ ماڭىزدى قادامى ەكەندىگى ءسوزسىز.