استانادا بوكستان سپاررينگتىك ىرىكتەۋ باسەكەسى اياقتالدى. ءۇش كۇنگە سوزىلعان جەكپە-جەك ليتسەنزيالىق تۋرنيرگە قاتىساتىن بوكسشىلاردى انىقتاپ بەردى.
بوكس ەلىمىزدىڭ باستى سپورتى ەكەنى تاعى ءبىر رەت دالەلدەنگەندەي. ىشكى سپاررينگتىك ىرىكتەۋ باسەكەسىنىڭ ءوزى جانكۇيەرلەر اراسىندا ۇلكەن قىزىعۋشىلىق تۋعىزدى. ال ليتسەنزيالىق تۋرنيرگە قاتىسۋدان ۇمىتكەرلەر اراسىندا سپاررينگتىك باسەكە وتكىزۋ تۋرالى باستاما قازاقستان بوكس فەدەراتسياسىنىڭ اشىقتىق ۇستانىمى بولاتىن. جەكپە-جەك ءۇش كۇن بويى «qazsport» تەلەارناسىندا تىكەلەي ەفيردە كورسەتىلىپ, ءتىپتى جەرەبە تارتۋ ءراسىمىنىڭ ءوزى كوپشىلىك نازارىنا تىكەلەي كورسەتىلىم ارقىلى ۇسىنىلدى. ۇلتتىق قۇرامانىڭ باپكەرلەرى دە ۇمىتكەر بوكسشىلاردى تاعى ءبىر باعالاي الدى.
ەرلەر اراسىندا سپاررينگتىك كەزدەسۋ 63,5 كگ سالماق دارەجەسىندە ءوتتى. وعان بەس بوكسشى قاتىستى. فينالدا تۇركىستاندىق مۇحاممەدسابىر بازارباي ۇلى مەن جامبىلدىق دۋلات بەكباۋوۆ كەزدەستى. العاشقىسى وسى سالماقتا وتكەن جىلى ەل چەمپيونى اتانعان. ال بۇعان دەيىن 67 كيلو سالماقتا ونەر كورسەتىپ جۇرگەن دۋلات ءۇشىن بۇل جاڭا سالماقتاعى بار بولعانى ەكىنشى جۇدىرىقتاسۋ ەدى. تارتىستى وتكەن جەكپە-جەكتىڭ ءبىرىنشى راۋندى 3:2 ەسەبىمەن مۇحاممەدسابىردىڭ پايداسىنا شەشىلدى. ەكىنشى راۋندتا بەس تورەشى دە بازارباي ۇلىنىڭ باسىمدىعىن بايقادى. ال ءۇشىنشى راۋندتا 5:0 ەسەبىمەن بەكباۋوۆ باسىم بولدى. قورىتىندىسىندا تورەشىلەردىڭ باسىم داۋسىمەن مۇحاممەدسابىر بازارباي ۇلى جەڭىسكە جەتتى.
قىزدار اراسىندا سپاررينگتىك باسەكە 4 سالماقتا ءوتتى: 50 كگ, 54 كگ, 66 كگ, 75 كگ سالماق دارەجەلەرىندە شارشى الاڭعا بارلىعى 18 بوكسشى شىقتى. الدىمەن جەڭىل سالماقتاعى بوكسشىلار اراسىندا جەڭىمپاز انىقتالدى. 50 كگ سپاررينگتە الۋا بالقىبەكوۆا مەن نازىم قىزايباي سىنعا ءتۇستى. تورەشىلەر شەشىمىمەن نازىم جەڭىسكە جەتتى.
سەگىز بوكسشى قاتىسقان 54 كيلو سالماقتاعى باسەكە وتە تارتىستى بولدى. فينالدا ۇلجان سارسەنبەك پەن سىمبات الياسقاردىڭ جولى ءتۇيىسىپ, تۇركىستاندىق ۇلجان 5:0 ەسەبىمەن باسىم بولدى.
66 كيلو سالماق دارەجەسىندە 5 بوكسشى سىنعا تۇسكەن ەدى. فينالدا بىلتىرعى سپارتاكيادانىڭ جەڭىمپازى, سولتۇستىك قازاقستان وبلىسىنىڭ وكىلى ناتاليا بوگدانوۆا قاراعاندىلىق جاسمين قيزاتوۆامەن كەزدەستى. تورەشىلەردىڭ حاتتاماسىندا 4:1 ەسەبى تىركەلىپ, بوگدانوۆا ءوزىنىڭ مىقتىلىعىن كورسەتتى.
ال 75 كيلودا ءۇش بوكسشى باعىن سىناپ, فينالدا استانالىق ۆالەنتينا حالزوۆا مەن قىزىلوردالىق گۇلسايا ەرجان كەزدەستى. العاشقىسى بىلتىر وسى سالماقتا سپارتاكيادا جەڭىمپازى بولعان, ەكىنشىسى – 81 كيلو سالماق دارەجەسىنىڭ ۇزدىگى. الايدا ءبىر سالماق دارەجەسىنە تومەن تۇسكەن گۇلجان اقتىق ايقاستا حالزوۆاعا قارسىلىق كورسەتە المادى. تورەشىلەردىڭ شەشىمىمەن ۆالەنتينا جەڭىسكە جەتتى.
ەندى بوكسشىلار بانگكوكتە وتەتىن الەمدىك ليتسەنزيالىق تۋرنيرگە دايىندالادى. سپاررينگ جەڭىمپازدارى ءبىرىنشى ءنومىرلى رەتىندە تىركەلمەك. دەگەنمەن ايەلدەر اراسىندا ليتسەنزيالىق تۋرنيردە تاعى ءبىر سالماق دارەجەسىندە بوكسشىمىز بارادى. الايدا 60 كيلوداعى سپاررينگ وسى سالماقتاعى بىلتىرعى چەمپيون ريمما ۆولوسەنكونىڭ جاراقاتىنا بايلانىستى كەيىنگە قالدىرىلدى. سپاررينگتىك كەزدەسۋدى ۆولوسەنكو وقۋ-جاتتىعۋ جيىنى اياسىندا تاعى ءبىر ۇمىتكەر ۆيكتوريا گرافەەۆاعا قارسى وتكىزەدى.
بوكستان قازاقستان ەرلەر قۇراماسىنىڭ باس باپكەرى مىرزاعالي ايتجانوۆ استاناداعى ىرىكتەۋ ءتۋرنيرىنىڭ قورىتىندىسى تۋرالى ءوز پىكىرىن ءبىلدىردى.
«ىرىكتەۋ ءادىل ءوتتى. جانكۇيەرلەر تەلەديداردان قاراپ, كىمنىڭ قانداي دايىندىقپەن كەلگەنىن, قالاي جۇدىرىقتاسقانىن كوردى. ەرلەر اراسىندا سىنعا تۇسكەن بەس بوكسشى جاقسى دايىندىقپەن كەلدى. سەبەبى اركىم وليمپياداعا بارۋدى ارماندايدى. بارلىعى قولدان كەلگەننىڭ ءبارىن جاسادى.
جەڭىمپازعا كەلەتىن بولساق, مۇحاممەدسابىر بازارباي ۇلى يتاليادا وتكەن ىرىكتەۋدە ءسۇرىندى. بۇل جولى ول كوشباسشىلىقتى دالەلدەۋ ارقىلى تاعى دا ءوز مۇمكىندىگىنە يە بولىپ وتىر. ءبىزدىڭ باستى ماقساتىمىز – وليمپياداعا ليتسەنزيا الۋ.
دايىندىق جوسپار بويىنشا ءوتىپ جاتىر. كۋبا جانە وزبەكستانمەن بىرلەسكەن جيىن وتكىزەمىز. سودان كەيىن مامىر ايىندا حالىقارالىق تۋرنيرگە قاتىسىپ, وندا بوكسشىلاردىڭ دايىندىعىن تەكسەرەمىز», دەدى م.ايتجانوۆ.