بۇگىن - حالىقارالىق عارىشكەرلەر كۇنى

12 ءساۋىر – ادام بالاسىنىڭ عارىشقا العاش رەت ۇشقان كۇنى. بيىل بۇل ايتۋلى داتاعا 63 جىل تولدى. سول كەزدەن باستاپ بۇگىنگى كۇنگە دەيىن 500-دەن استام ادام عارىشقا ساياحاتتاعان. ولاردىڭ قاتارىندا قازاقتىڭ ءۇش عارىشكەرى - توقتار اۋباكىروۆ, تالعات مۇساباەۆ, ايدىن ايىمبەتوۆ تە بار.

كسرو-نىڭ سوڭعى جانە قازاقستاننىڭ ءبىرىنشى عارىشكەرى - توقتار اۋباكىروۆ 1991 جىلى عارىشقا ەكسپەديتسيالىق ساپارمەن بارىپ, سول جاقتا 7 كۇن 22 ساعات 13 مينۋت بولدى. توقتار اۋباكىروۆ - العاش رەت باسقا كەڭىستىكتە ءجۇرىپ قازاقتىڭ ۇلتتىق تاعامىن جەگەن ادام. سول جىلى عالىمدار ىرىمشىك, ايران جانە ەتتى عارىشتا ءجۇرىپ جەۋگە بولاتىنداي ەتىپ ازىرلەگەن.

قازاقتان شىققان ەكىنشى عارىشكەر – تالعات مۇساباەۆ. مۇساباەۆ عارىشقا ءۇش رەت ۇشىپ, سول جاقتا 341 كۇن 9 ساعات 48 مينۋت 41 سەكۋند بولىپ قايتتى. ناتيجەسىندە ول گيننەسستىڭ رەكوردتار كىتابىنا ەنگەن, وسى كۇنگە دەيىن تالعات مۇساباەۆ سياقتى ەشكىم عارىش كەڭىستىگىندە ۇزاق ۋاقىت بولىپ كورمەگەن.

قازاقستاننىڭ ءۇشىنشى عارىشكەرى - ايدىن ايىمبەتوۆ. ول 2015 جىلدىڭ 2-12 قىركۇيەگى ارالىعىندا «سويۋز تما-18م» جانە حالىقارالىق عارىش ستانتسياسىنا باعىت العان «سويۋز تما-18م» كەمەسىنىڭ ەكىنشى بورتينجەنەرى رەتىندە ۇشتى. حالىقارالىق عارىش ستانتسياسىنا بارعان ەپ-18 ەكسپەديتسيا مۇشەسى. عارىشكەر جەرگە «سويۋز تما-16م» كەمەسىندە ورالدى. ۇشۋ ۋاقىتى 9 تاۋلىك 20 ساعات 13 مينۋت 51 سەكۋندقا سوزىلدى.