سقو-دا 219 ەلدى مەكەن سۋ استىندا قالۋى مۇمكىن

قانات دۇزەلباەۆتىڭ ايتۋىنشا, وبلىستاعى كۇردەلى جاعدايدى تۇراقتاندىرۋ ماقساتىندا كەشە, 8 ءساۋىر كۇنى قورعانىس مينيسترلىگىنەن قوسىمشا 313 اسكەري قىزمەتشى جۇمىلدىرىلدى. «سەرگەەۆ سۋ قويماسىنىڭ سىيىمدىلىعى 182%-عا جەتتى. ەسىل وزەنىنىڭ جاعالاۋىندا كەپتەلىس جوق. سۋ قويماسىنا اققان سۋ 425 سانتيمەتردى قۇرادى. سوندىقتان 3 اۋدان مەن پەتروپاۆل قالاسىن سۋ باسۋ قاۋىپى ءتونىپ تۇر», دەدى اكىم ورىنباسارى.

ونىڭ ايتۋىنشا, جاعداي باقىلاۋعا الىندى. بىراق 220-عا جۋىق ەلدى مەكەن سۋ استىندا قالۋى مۇمكىن.

«قار جامىلعىسى 30%-عا دەيىن جەتەدى. ءالى دە 219 ەلدى مەكەندى سۋ باسۋ قاۋىپى جوعارى. قازىردىڭ وزىندە 40 ءۇيدىڭ 13-ءىن سۋ باسىپ قالعان. 286 ادام ەۆاكۋاتسيالانىپ, 44 ادام ۇيلەرىنە قايتارىلدى. تاعى 111 ءۇيدىڭ ماڭىن سۋ باستى», دەپ ءتۇسىندىردى قانات دۇزەلباەۆ.  ايتا كەتەيىك, بۇگىن, 9 ساۋىردە تايىنشا اۋدانىندا وتەماقى تولەۋگە وتىنىشتەر قابىلدانا باستادى.