اتىراۋدا پرەمەر-مينيستر ولجاس بەكتەنوۆتىڭ جەتەكشىلىگىمەن سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى سالدارىن جويۋ جونىندەگى رەسپۋبليكالىق شتابتىڭ كوشپەلى وتىرىسى ءوتتى. جيىنعا بەينەكونفەرەنتسبايلانىس رەجىمىندە مينيسترلىكتەر مەن وبلىس اكىمدىكتەرىنىڭ باسشىلىعى قوسىلدى.
سۋ تاسقىنى جاعدايى تۇراقتالعانشا وڭىرلەرگە جىبەرىلگەن ۆيتسە-پرەمەرلەردىڭ سۋ تاسقىنىنا بايلانىستى قازىرگى احۋال تۋرالى باياندامالارى تىڭدالدى. بۇگىنگى تاڭدا 10 وبلىستا: اقمولا, اقتوبە, اتىراۋ, قاراعاندى, قوستاناي, پاۆلودار, باتىس قازاقستان, سولتۇستىك قازاقستان, سونداي-اق اباي جانە ۇلىتاۋ وبلىستارىندا تج رەجىمى ساقتالىپ وتىر. قازىر جالپى ەلىمىز بويىنشا 15%, سولتۇستىك, شىعىس جانە ورتالىق وڭىرلەردە شامامەن 40% اۋماقتى قار باسىپ جاتىر.
اۆاريالىق-قۇتقارۋ جۇمىستارىنا 12 مىڭنان استام ادام, 800-دەن استام تەحنيكا, 400-گە جۋىق سۋ ايداۋ جانە ءجۇزۋ قۇرالى جۇمىلدىرىلدى. تج ايماقتارىنان 70 مىڭنان استام ادام ەۆاكۋاتسيالاندى.
سونىمەن قاتار وتىرىستا اۋىل شارۋاشىلىعى مينيسترلىگىنىڭ اقپاراتى تىڭدالدى. قابىلدانعان شارالاردىڭ ناتيجەسىندە سۋ باسقان وڭىرلەردە 60 مىڭنان استام مال باسى قاۋىپسىز ۋچاسكەلەرگە كوشىرىلدى. وعان قوسا سۋ باسقان ايماقتاردا ەپيزووتيالىق جاعدايدىڭ ناشارلاۋىنا جول بەرمەۋ ءۇشىن مينيسترلىكتىڭ رەسپۋبليكالىق ەپيزووتياعا قارسى جاساعى وبلىس اكىمدىكتەرىمەن بىرلەسىپ جانۋارلاردىڭ ولەكسەلەرىن جيناۋ جانە جويۋ جۇمىستارىن جۇرگىزىپ جاتىر. بۇگىنگى تاڭدا 1 013 باس, ونىڭ ىشىندە 133 ىقم, 809 ۇساق مال باسى, 64 جىلقىنىڭ ولەكسەسى جويىلدى.
«سۋ تاسقىنىنا قاتىستى جاعداي وتە كۇردەلى. پرەزيدەنت سۋ باسقان اۋماقتاردا قۇقىقتىق ءتارتىپتى قامتاماسىز ەتۋ مىندەتىن قويدى. قالالار مەن اۋىلداردىڭ تىنىس-تىرشىلىگىن ءتيىستى دەڭگەيدە قامتاماسىز ەتۋ قاجەت. تۇرعىنداردى كەرەكتى نارسەلەردىڭ بارلىعىمەن قامتۋ كەرەك. باقىلاۋدى كۇشەيتىپ, ازىق-ت ۇلىك باعاسىنىڭ نەگىزسىز وسۋىنە جول بەرمەۋدى تاپسىرامىن. ونداي فاكتىلەردىڭ جولىن كەسۋ كەرەك. قازىر بىرقاتار وڭىردە زالالدى وتەۋ جانە وتەماقى تولەۋ جۇمىستارى باستالدى. بۇل جۇمىستى بيۋروكراتياعا سالماي, جەدەل تۇردە مۇمكىندىگىنشە اشىق جۇرگىزۋ كەرەك. ەشكىم كومەكسىز قالماۋى كەرەك. اكىمدەر جاعدايدى ەرەكشە باقىلاۋدا ۇستاسىن. كوممۋنالدىق كاسىپورىندار مەن سانيتارلىق-ەپيدەميولوگيالىق قىزمەتتەر كۇشەيتىلگەن جۇمىس رەجىمىنە كوشىرىلدى. حالىققا بارلىق قاجەتتى قىزمەتتەردى ساپالى جانە ۇزدىكسىز نەگىزدە كورسەتۋ قاجەت», دەدى و.بەكتەنوۆ.
پرەمەر-مينيستر, شتاب جەتەكشىسى ولجاس بەكتەنوۆ كەلەسىدەي تاپسىرمالار بەردى:
- دەنساۋلىق ساقتاۋ مينيسترلىگى سۋ باسقان ايماقتارداعى سانيتارلىق-ەپيدەميولوگيالىق جاعدايدى, اتاپ ايتقاندا, اۋىزسۋدىڭ ساپاسىن باقىلاۋدى كۇشەيتۋى كەرەك;
- اۋىل شارۋاشىلىعى مينيسترلىگى ەپيزووتيالىق جاعدايدىڭ ناشارلاۋىنا جول بەرمەي, ءۇي جانە جابايى جانۋارلارعا قاجەتتى ۆەتەرينارلىق باقىلاۋدى قامتاماسىز ەتۋگە ءتيىس;
- ىشكى ىستەر مينيسترلىگى ەۆاكۋاتسيالانعان حالىقتىڭ مۇلكىنىڭ ساقتالۋىن قامتاماسىز ەتۋ جونىندە شارالار قابىلداۋى قاجەت;
- اكىمدىكتەر ەۆاكۋاتسيالىق پۋنكتتەردەگى حالىقتى قاجەتتى زاتتاردىڭ بارلىعىمەن قامتاماسىز ەتىپ, سونداي-اق قالپىنا كەلتىرۋ جۇمىستارى كەزەڭىندە ولاردى ۋاقىتشا ورنالاستىرۋ ماسەلەسىن پىسىقتاۋى قاجەت.
جۇمىس جالعاسۋدا. ەلدەگى سۋ تاسقىنى جاعدايى – شتابتىڭ تۇراقتى باقىلاۋىندا.