سەرگەەۆ سۋ قويماسى - ەسىل وزەنىنىڭ 19 ملن تەكشە مەتر سۋ وتەتىن ەڭ ۇلكەن سۋ قويماسى. بۇگىنگە دەيىن ونىڭ پلوتيناسىنان وتەتىن سۋدىڭ بيىكتىگى ارتىپ كەلدى. «كازگيدرومەتتىڭ» حابارلاۋىنا قاراعاندا, بۇگىن تاڭەرتەڭ عانا سۋدىڭ پلوتينادان اسۋى توقتاپ, بيىكتىك 415 سم-گە جەتتى. بۇل 2017 جىلعى رەكوردتىق كورسەتكىشتەن 77 سم بيىك.
قازىر سۋ قويماسىنداعى سۋدىڭ جالپى دەڭگەيى جوبالانعان دەڭگەيدەن 180 پايىز ارتىپ, 1248 ملن تەكشە مەتر سۋ جينالىپ تۇر. وتكەن تۇندە عانا ول سوڭعى رەت 5 سم كوتەرىلىپ, ودان ءارى سۋدىڭ دەڭگەيى بيىكتەۋىن توقتاتتى. قازىر پلوتينادان اسقان سۋدىڭ بيىكتىگى تۇسە باستادى. ەسىلدىڭ سالالارىنداعى سۋدىڭ كولەمى دە تومەندەپ بارادى. ماسەلەن, بابىقبۇرلىق وزەنىنىڭ گۋساكوۆكا اۋىلىنىڭ تۇبىندەگى ەسىلگە قۇياتىن سۋىنىڭ تومەندەۋى – 17 سم., اقانبۇرلىق وزەنىنىڭ كوۆىلنوە سەلوسىنا قۇياتىن سۋىنىڭ تومەندەۋى – 4 سم., شارىق وزەنىنىڭ اندرەەۆكا سەلوسىنىڭ تۇبىندەگى تومەندەۋى – 90 سم ءتۇستى.
ەندىگى سىن سەرگەەۆ قالاسىنىڭ تومەنگى جاعىنا ءتۇسىپ تۇر. وسى قالادان ەسىلدىڭ پەتروپاۆلعا تارتقان جولىنداعى اۋىل-سەلولارداعى كەيبىر ۇيلەردىڭ سۋ استىندا قالۋ قاۋپى بار. بۇگىننىڭ وزىندە سۋ دەڭگەيى وسى باعىتتاعى پوكروۆكا سەلوسىندا 411 سم-گە, نوۆونيكولسكي سەلوسىنداعى دەڭگەيى 82 سم-گە كوتەرىلدى. ۇلكەن سۋدىڭ پەتروپاۆلعا جەتۋى ەرتەڭ-بۇرسۇگىندەرى كۇتىلەدى.
سولتۇستىك قازاقستان وبلىسى