سۋ تاسقىنىنا بايلانىستى كۇردەلى احۋال قالىپتاسقان وڭىرلەردىڭ ءبىرى اقتوبە وبلىسىندا جاعداي تۇراقتالىپ كەلەدى. جەرگىلىكتى بيۋدجەتتەن سۋ تاسقىنىنان زارداپ شەككەن وتباسىلارعا 300 مىڭ تەڭگە كولەمىندە بىرجولعى ماتەريالدىق تولەم تولەنە باستادى جانە وسى ازاماتتاردىڭ نەسيە تولەمدەرى ءۇش ايعا شەگەرىلدى.
كەيىنگى ون كۇن بويى اپاتتى جاعداي تۋدىرعان ەلەك, جەم, ەمبى, ساعىز, ىرعىز, تورعاي, قوبدا, ور وزەندەرىندەگى سۋ دەڭگەيى قازىرگى ۋاقىتتا قالىپقا ءتۇستى. قالا ىرگەسىندەگى قارعالى, اقتوبە, سازدى سۋ قويمالارى قازىر لىق تولعان. دەگەنمەن وتكەن تاۋلىكتە جايىق سۋ باسسەينىنە كىرەتىن قارعالى وزەنىنىڭ اقتوبە قالاسىنىڭ تۇسىنداعى بولىگىندە سۋ كوتەرىلىپ, جاعاسىنداعى ۇيلەرگە قاۋىپ توندىرگەن. سودان ادامدار ءتۇن ىشىندە قاۋىپسىز جەرگە كوشىرىلىپ, جاعالاۋلار بيىكتەتىلدى. وسى اۋماقتى تاسقىننان قورعاعان ۇلتتىق ۇلان جاۋىنگەرلەرى, ەرىكتىلەر, ساياجاي تۇرعىندارىنىڭ بىرلەسكەن ءىس-قيمىلى ارقاسىندا تۇرعىن ءۇي الابىنا سۋ جايىلعان جوق.
بۇگىندە پروكۋرورلار سۋ تاسقىنىنىڭ الدىن الۋ جونىندەگى جۇمىستارعا بولىنگەن بيۋدجەت قارجىسىنىڭ ماقساتتى جۇمسالۋىن تەكسەرۋگە كىرىستى. اقتوبە وبلىستىق پروكۋراتۋراسى ايتەكە بي اۋدانىنداعى گيدروتەحنيكالىق قۇرىلىستىڭ دۇرىس جۇرگىزىلمەۋىنە بايلانىستى قك 371-بابىنىڭ 1-بولىگى (سالعىرتتىق ارەكەتتەر) بويىنشا قىلمىستىق ءىس قوزعادى. بۇل – 2023 جىلى 230 ملن تەڭگەگە كۇردەلى جوندەۋ جۇرگىزىلگەن «ششەرباكوۆ» بوگەتى. تاپسىرىس بەرۋشى – اقتوبە وبلىسىنىڭ تابيعي رەسۋرستار جانە تابيعي رەسۋرستاردى رەتتەۋ باسقارماسى بولسا, مەردىگەر – «سك گراند كانالى» وندىرىستىك كووپەراتيۆى. 30 ناۋرىز كۇنى ىرعىز وزەنى ارناسىنان اسقاندا, وسى بوگەتتى بۇزىپ كەتىپ, ايتەكە بي اۋدانىنىڭ ورتالىعى ت.جۇرگەنوۆ اتىنداعى اۋىلعا قاراي اقتى. 78 ۇيگە سۋ كىردى, 10 ءۇي قيرادى, 927 ادام (215 بالا) ەۆاكۋاتسيالاندى, ەلەكتر جانە گازبەن جابدىقتاۋ جەلىلەرى زاقىمداندى. بىلايشا ايتقاندا, بوگەت دەگەنىمىز بەتوندالماعان, بەكىتىلمەگەن, قۇمنان ۇيىلگەن بوگەسىن بولىپ شىقتى.
تاسقىن سۋدىڭ ەكپىنى بۇزعان ساپاسىز گيدروتەحنيكالىق قۇرىلىستار, قاعاز جۇزىندە جوندەلگەن بوگەتتەر مەن كوپىرلەر, كولىك جولدارىنداعى سۋ وتكەلدەرى تەرگەپ-تەكسەرۋگە سەبەپ بولىپ تۇر. ايتا كەتۋ كەرەك, قازىرگى كەزدە اقتوبە وبلىسىمەن اعاتىن وزەندەر بويىنداعى 206 گيدروتەحنيكالىق قۇرىلعى ابدەن توزعان. 5 ساۋىردە حرومتاۋ اۋدانىنداعى ماعادجان سۋ قويماسىنىڭ بوگەتى جارىلىپ, بەسقوسپا اۋىلىن سۋ باسۋ قاۋپى ءتوندى. جەدەل ارەكەت ەتۋ ارقىلى ۇلتتىق ۇلانعا قاراستى مي-171ە تىكۇشاعىمەن بەسقوسپادان بەستاماق اۋىلىنا 174 ادام ەۆاكۋاتسيالاندى.
قازىرگى كەزدە ۇيلەرى سۋ باسقان 1 500 ادام ۋاقىتشا ورنالاستىرىلعان جەرلەردە تۇرىپ جاتىر. سۋ تاسقىنىنان زارداپ شەككەندەرگە كومەك كورسەتۋ جونىندەگى كوميسسيا ءاربىر ءۇيدى ارالاپ, كەلتىرىلگەن شىعىن كولەمىن ەسەپكە الۋعا كىرىستى. تۇرعىندار بىرتىندەپ ۇيلەرىنە ورالىپ جاتىر.
اقتوبە وبلىسى