ءماجىلىس سپيكەرى ەرلان قوشانوۆتىڭ توراعالىعىمەن وتكەن بيۋرودا الداعى جالپى وتىرىستىڭ كۇن ءتارتىبى ناقتىلاندى.
دەپۋتاتتاردىڭ تالقىلاۋىنا «جول ءجۇرىسى تۋرالى» زاڭ جوباسى مەن اكىمشىلىك قۇقىق بۇزۋشىلىق تۋرالى كودەكسكە جەكەلەگەن كولىك قۇرالدارىنىڭ تۇرلەرىنىڭ قوزعالىسىن ۇيىمداستىرۋ جانە جول قوزعالىسى قاۋىپسىزدىگىن تسيفرلاندىرۋ ماسەلەلەرى بويىنشا ەنگىزىلەتىن وزگەرىستەردى ءبىرىنشى وقىلىمدا قاراۋ ۇسىنىلدى.
پارلامەنت دەپۋتاتتارى باستاماشىلىق جاساعان تۇزەتۋلەر شاعىن ەلەكتر جانە كولىك قۇرالدارىنىڭ جەكەلەگەن تۇرلەرىنىڭ قوزعالىسىن باقىلاۋدى جۇزەگە اسىرۋ جانە جول قاۋىپسىزدىگىن تسيفرلاندىرۋ ماسەلەلەرىن قامتيدى. قوزعالتقىش كولەمى 50 تەكشە سم-دەن كەم موپەدتەردى مەملەكەتتىك تىركەۋ كوزدەلەدى, سونداي-اق ولاردىڭ جۇرگىزۋشىلەرىنە قويىلاتىن تالاپتار بەلگىلەنەدى. جەرگىلىكتى اتقارۋشى ورگاندارعا ەلەكتر سكۋتەرلەرىن پايدالانۋ ءتارتىبىن ايقىنداۋ بويىنشا قۇزىرەت بەرىلەدى. جول قوزعالىسى قاۋىپسىزدىگىن تسيفرلاندىرۋ اياسىندا سەرتيفيكاتتالعان ارنايى باقىلاۋ-ولشەۋ قۇرالدارى مەن اسپاپتارىن پايدالانۋ تاجىريبەسى كەڭەيتىلەدى.
الداعى جالپى وتىرىستا قازاقستان مەن قىرعىز ۇكىمەتتەرى اراسىنداعى «قاراسۋ» جانە «اقتىلەك» اۆتوجول وتكىزۋ پۋنكتتەرى اۋدانىنداعى يندۋستريالىق ساۋدا-لوگيستيكالىق كەشەننىڭ قىزمەتىن قۇرۋ جانە رەتتەۋ تۋرالى كەلىسىمدى راتيفيكاتسيالاۋ تۋرالى زاڭ جوباسى قارالاتىن بولادى.
سونداي-اق ءماجىلىس كوميتەتتەرى «نىسانالى كاپيتال قورلارى (ەنداۋمەنت-قورلار) تۋرالى» جانە «بيولوگيالىق ماتەريالمەن الماسۋ تۋرالى كەلىسىمدى راتيفيكاتسيالاۋ تۋرالى» جاڭا زاڭ جوبالارىن جۇمىسقا الادى.