سۋ تاسقىنىنا بايلانىستى قالىپتاسقان جاعداي ەل ازاماتتارىن جاناشىرلىق پەن بىرلىككە شاقىردى. وسى تۇستا قازاقستان حالقى اسسامبلەياسى مۇشەلەرى زارداپ شەككەن وڭىرلەرگە العاشقىلاردىڭ ءبىرى بولىپ كومەكتەستى, دەپ حابارلايدى Egemen.kz.
قحا مۇشەلەرى باستاعان «جۇرەكتەن جۇرەككە» ارنايى جوباسى اياسىندا اقمولا جانە قاراعاندى وبلىستارىنا گۋمانيتارلىق كومەك جىبەرىلدى.
گۋمانيتارلىق جۇكتىڭ ءبىرىنشى بولىگى قاراعاندى وبلىسىنىڭ شەت اۋدانىنا جەتكىزىلدى. ونى قحا توراعاسىنىڭ ورىنباسارى اقبارجون يسمايلوۆ پەن «اسسامبلەيا جاستارى» ۇيىمىنىڭ توراعاسى تيمۋر جۇمىرباەۆ جەتكىزىپ بەردى. ولار ازىق-ت ۇلىك جيىنتىقتارىن, كيىم-كەشەك پەن باسقا دا قاجەتتى زاتتاردى حالىق اراسىندا بولۋمەن اينالىستى.
گۋمانيتارلىق جۇكتىڭ تاعى ءبىر بولىگى اقمولا وبلىسىنىڭ دوستىق ۇيىنە جەتكىزىلدى. كەيبىر زاتتار ەۆاكۋاتسيالىق پۋنكتتەرگە جىبەرىلدى. اسسامبلەيا سەناتورلارى الىشەر ساتۆالديەۆ پەن گەننادي شيپوۆسكي جەرگىلىكتى حالىقپەن كەزدەسىپ, اعىمداعى جاعدايمەن تانىستى. جيىن بارىسىندا زارداپ شەككەندەردىڭ سۇراقتارىنا جاۋاپ بەرىلدى.
قحا رەسپۋبليكالىق شتابىنىڭ مۇشەلەرى سۋ تاسقىنىنان زارداپ شەككەن باسقا وڭىرلەرگە دە بارىپ, تۇرعىندارعا قول ۇشىن سوزادى. قۇتقارۋشىلار مەن ەرىكتىلەر ءۇشىن ىستىق تاماق ۇسىنىلادى.
ايتا كەتسەك, ەلىمىزدىڭ بارلىق وڭىرىندە دوستىق ۇيلەرىنىڭ بازاسىندا شتابتار, ەرىكتىلەر ورتالىقتارى, گۋمانيتارلىق كومەك قابىلداۋ پۋنكتتەرى ۇيىمداستىرىلعان. بۇگىندە قحا-نىڭ كومەگىمەن 110 ملن تەڭگەدەن استام سوماعا گۋمانيتارلىق كومەك جينالعانىن دا ايتا كەتۋ كەرەك.