سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى كەڭەيتىلگەن وتىرىس وتكىزىپ, ەۋرازيالىق ەكونوميكالىق وداققا مۇشە مەملەكەتتەردەگى عىلىمي دارەجەلەر تۋرالى قۇجاتتاردى ءوزارا تانۋ تۋرالى ماسەلەلەرگە قاتىستى زاڭدى تالقىلادى.
قۇجات ەاەو-عا مۇشە مەملەكەتتەر ازاماتتارىنىڭ عىلىمي دارەجەسىن ەڭبەك كوشى-قون اياسىندا سول اۋماقتاردا تانۋدى كوزدەيدى. سونىمەن عىلىمي دارەجەلەر تۋرالى قۇجاتتار فيلوسوفيا دوكتورى (PhD), سالا بويىنشا دوكتور, عىلىم كانديداتى جانە عىلىم دوكتورى, مۇنداي قۇجاتتاردىڭ يەلەرى عىلىمي دارەجەسى ءۇشىن مەملەكەتتە بەلگىلەنگەن ۇستەمەاقىلاردى تالاپ ەتەتىن جاعدايدى قوسپاعاندا, ۇلتتىق تانۋ راسىمدەرى جۇرگىزىلمەي تانىلادى.
كەلىسىمدى راتيفيكاتسيالاۋ ەاەو كەڭىستىگىندە ەڭبەك رەسۋرستارىنىڭ ەركىن قوزعالىسىن قامتاماسىز ەتۋ ارقىلى ەڭبەك نارىعىن نىعايتۋعا, سونداي-اق ەاەو-عا مۇشە مەملەكەتتەر ازاماتتارىنىڭ كاسىبي قىزمەتكە قول جەتكىزۋىن قامتاماسىز ەتۋ ءۇشىن قولايلى جاعداي جاساۋعا ىقپال ەتەدى.
دەپۋتاتتار كەڭەيتىلگەن وتىرىستىڭ قورىتىندىسىندا زاڭدى پالاتانىڭ قاراۋىنا جىبەرۋ تۋرالى شەشىم قابىلدادى.