استانا قالاسىندا ايەلىن اسا قاتىگەزدىكپەن قيناپ ءولتىردى دەپ ايىپ تاعىلعان قۋاندىق بيشىمباەۆقا قاتىستى سوت وتىرىسى ءجۇرىپ جاتىر. قوعامدىق رەزونانس تۋدىرعان قايعىلى جاعدايعا قاتىستى سوت وتىرىسى جوعارعى سوتتىڭ رەسمي الەۋمەتتىك جەلىلەرىندە تىكەلەي ەفيردەن كورۋگە بولادى, دەپ حابارلايدى Egemen.kz.
ءدال قازىر سوت زالىندا ايىپتالۋشى قۋاندىق بيشىمباەۆ كۋالىك بەرىپ جاتىر. ونىڭ ايتۋىنشا, 2023 جىلدىڭ 8-9 قاراشاسىنا دەيىن بيشىمباەۆ پەن نۇكەنوۆانىڭ وتباسىلىق ومىرىندە وتە كوپ جايسىز جاعدايلار بولعان. ونىڭ كوبىسى مارقۇم ايەلىنىڭ تۇرمىس قۇرعانعا دەيىنگى جەكە ومىرىنە بايلانىستى.
«مەن ونى بۇرىنعى, ماعان دەيىنگى ءومىرى ءۇشىن قىزعانعان جوقپىن. تەك مەن سول ءۇشىن قاتتى ۇيالدىم. ماعان ۋاقىت بەرۋىن سۇرادىم, ارى قاراي ءومىرىمىز قالاي بولاتىنىن, بىرگە بولا الامىز با, جوق پا, سونى ويلانۋىم كەرەك بولدى. سول ءۇشىن قارىم-قاتىناسىمىزدى ۋاقىتشا توقتاتا تۇرۋىمىزدى سۇرادىم. مەن وعان وتكەننىڭ ءبارىن ۇمىتىپ, جاڭا ءومىر باستاۋدى دا سۇرادىم. سوندا دا ءار 10 كۇن سايىن ول وزىنەن ءوزى اشۋلانىپ, ۇرىس-كەرىس شىعارا بەرەتىن», دەيدى ايەلىن ءولتىردى دەگەن ايىپ تاعىلعان ەكس-مينيستر.
بيشىمباەۆتىڭ ايتۋىنشا, سالتانات كۇيەۋىنىڭ وتباسىنان 8 رەت ەمەس, 12 رەت كەتىپ قالعان. وعان دا نۇكەنوۆانىڭ تۇراقسىز كوڭىل كۇيى مەن اگرەسسياسى سەبەپ بولعان ەكەن.