تايلاندتاعى لوپبۋري تۋريستىك قالاشىعىن مايمىلدار باسىپ الدى. ولار جەرگىلىكتى ساتۋشىلاردان جانە تۋريستەردەن ازىق-ت ۇلىك پەن باسقا دا زاتتاردى ۇرلاپ, ويران سالادى. مايمىلدارمەن كۇرەسۋ ءۇشىن ايماقتىق پوليتسەيلەر شارا قولدانا باستادى, دەپ حابارلايدى Egemen.kz WioNews سايتىنا سىلتەمە جاساپ.
لوپبۋري بانگكوكقا جاقىن جەردە ورنالاسقان. بۇل جەر تۋريستەردى كوشەدە جايباراقات جۇرەتىن كوپتەگەن مايمىلدارىمەن قىزىقتىرادى.
دەگەنمەن, سوڭعى ۋاقىتتا مايمىلدار تىم كوبەيىپ كەتتى. مايمىلدار ءبىر-بىرىمەن جاپپاي توبەلەس ۇيىمداستىرادى. ءتارتىپتى قالپىنا كەلتىرۋ ماقساتىندا قالالىق پوليتسەيلەر مايمىلداردى قورقىتۋ ءۇشىن ايىرساداقتارمەن قارۋلانعان.
«مەن مايمىلداردىڭ ىقتيمال قاۋىپ-قاتەرىن بىلەمىن. ولار تۋريستەر مەن جەرگىلىكتى تۇرعىندارعا قاۋىپ توندىرە باستادى. قازىر ءبىزدىڭ وفيتسەرلەر الىپ جۇرگەن ايىرساداقتار (روگاتكا) قاجەت كەزدە مايمىلداردى قورقىتۋعا كومەكتەسەدى», دەدى پوليتسيا گەنەرال-مايورى اپيراك ۆەچكانكانا.
فوتو:twitter/@KhaosodEnglish
ونىڭ ايتۋىنشا, ءتىپتى مايمىلدارمەن كۇرەسەتىن ارنايى پوليتسيا بولىمشەسى قۇرىلادى.
ۇلتتىق ساياباقتار, جابايى تابيعات جانە تابيعاتتى قورعاۋ دەپارتامەنتىنىڭ قىزمەتكەرلەرى دە ەڭ كوپ تارالعان ماكاكالاردى ۇستاپ الىپ, ولاردى قالادان باسقا جەرگە كوشىرىپ جاتىر.