قوستاناي وبلىسىنىڭ اكىمى قۇمار اقساقالوۆ ارقالىقتا جەدەل شتاب وتىرىسىن وتكىزدى. شۇعىل كەڭەستە تورعاي وڭىرىندەگى سۋ باسىپ قالعان ەلدى مەكەندەردەن شىعارىلعان بالالاردىڭ وقۋدان قول ءۇزىپ قالماۋىن قامتاماسىز ەتۋ ماسەلەسى دە قارالدى.
جيىندا قىزىلجۇلدىز اۋىلىنان ەۆاكۋاتسيالانعان 40 بالانىڭ ارقالىق قالاسىنداعى تۋىستارىنىڭ ۇيىنە ورنالاسقانى, قازىر تۇرمىسىنىڭ جايلى ەكەنى ايتىلدى. قىزىلجۇلدىز بالالارى 4 توقساندا ارقالىق قالاسىنداعى №5-ءشى مەكتەپتە وقۋىلارىن جالعاستىرادى. ولارعا وزدەرى تۇرعان اۋىلدان ەۆاكۋاتسيالانعان 14 مۇعالىم ساباق بەرەدى. وقۋ قۇرالدارىمەن, كەڭسە كەرەك-جاراقتارىمەن قامتاماسىز ەتۋ ماسەلەسى شەشىلگەن. بۇگىن بالالاردىڭ بارىنە مەكتەپكە كيەتىن كيىم-كەشەك ساتىپ الىندى.
ال جانگەلدين اۋدانىندا كولقامىستان كوشىرىلگەن ايسا نۇرمانوۆ مەكتەبىنىڭ 44 بالاسى اۋىلدان 19 شاقىرىم جەردە ورنالاسقان كوكالات ەلدى مەكەنىندەگى الباربوگەت مەكتەبىندە وقيتىن بولادى. ولار دا كيىم-كەشەك, كىتاپ-داپتەر, باسقا دا مەكتەپ قاجەتتەرىمەن قامتاماسىز ەتىلگەن.
ء«بىرىنشى ساۋىرگە دەيىن بارلىق بالالاردى كيىممەن, وقۋلىقتارمەن, كەڭسە كەرەك-جاراقتارىمەن قامتاماسىز ەتۋ قاجەت. ءبىزدىڭ مىندەتىمىز – وقۋشىلاردىڭ ۇزدىكسىز ءبىلىم الۋىنا جاعداي جاساۋ. ول ءۇشىن بارلىق رەسۋرستى قوسامىز», دەدى قۇمار اقساقالوۆ.
بالالارعا ارنالعان بارلىق كەرەك-جاراقتار جالپىعا بىردەي ءبىلىم بەرۋ قورىنان ساتىپ الىنادى, بۇل ءۇشىن بارلىق قاجەتتى قاراجات بار.
قوستاناي وبلىسى