بىشكەكتە باق سىنايدى

گرەك-ريم كۇرەسىنەن وتەتىن جارىستا ايدوس سۇلتانعالي (60 كگ), مەيىرجان شەر­ماحانبەت (67 كگ), دەمەۋ جادىراەۆ (77 كگ), ولجاس سىرلىباي (97 كگ) جانە ءالىمحان سىزدىقوۆ (130 كگ) ونەر كورسەتەدى. بۇل جىگىتتەردىڭ بارلىعى دا – مىقتىلىعىن الدە­قاشان مويىنداتقان مارقاسقالار. ارقايسىنا جەكە-جەكە توقتالساق, 28 جاستاعى ايدوس 2018 جانە 2022 جىلدارى الەم چەمپيوناتىندا قولا مەدالدى يەلەنىپ, 2021 جىلى ازيا چەمپيونى اتاندى. بيىل استانادا شىمىلدىعى تۇرىلگەن قازاقستان چەمپيو­ناتىندا ول ءوزىنىڭ باستى قارسىلاسى مەيرامبەك ايناعۇلوۆتان ايلاسىن اسىردى.

27 جاستاعى مەيىرجان 2018 جىلعى دۇنيەجۇزىلىك دودادا قولا السا, 2022 جىلعى قۇرلىق بىرىنشىلىگىندە باس جۇلدەنى ولجالادى. ازيا ويىندارىن كۇمىس مەدالمەن قورىتىندىلادى. دەمەۋدىڭ جاسى 35-كە تاپ قالسا دا, ول – ءالى دە بابىندا. ارداگەر بالۋاننىڭ سوڭعى ەل چەمپيوناتىنداعى ورەلى ونەرى – وسى ءسوزىمىزدىڭ ايقىن دالەلى. جادىراەۆ سول جارىستىڭ فينالىندا ەلىمىزدىڭ تاعى ءبىر بەلدى بالۋانى تەمىرلان شادۋكاەۆقا شاڭ قاپتىردى. سونداي-اق ول 2017 جىلى الەم جانە 2015 پەن 2018 جىلدارى ازيا چەمپيوناتتارىندا جۇلدەگەلەر ساناتىنا قوسىلدى. ال ولجاس پەن ءالىمحان – قۇرلىقتىق دەڭگەيدەگى دودالاردا دارالانىپ جۇرگەن دۇلدۇلدەر.

ەركىن كۇرەستەن سايىسقا تۇسەتىن نۇرقوجا قاي­پانوۆ (74 كگ), الىشەر ەرعالي (97 كگ) جانە يۋسۋپ باتىر­مۇرزاەۆتىڭ (125 كگ) ەسىمى سپورتسۇيەر قاۋىم­عا جاقسى تانىس. 25 جاستاعى نۇرقوجا – 2019 جىلعى الەم چەمپيوناتىنىڭ كۇمىس جۇلدەگەرى, ازيانىڭ ەكى دۇركىن چەمپيونى. 27 جاستاعى يۋسۋپ – ازيا چەمپيونى. 24 جاستاعى الىشەر قۇرلىق بىرىنشىلىگىندە ءتورت رەت جۇلدەلى ورىندى ولجالادى. سونىمەن قاتار ەرعالي مەن باتىرمۇرزاەۆ توكيو وليمپياداسىندا باق سىنادى. ال ەراسىل مۇحتار ۇلى (57 كگ) مەن مايىس اليەۆ (65 كگ) استا­ناداعى ەل چەمپيوناتىندا قارسىلاس شاق كەلتىرگەن جوق. فينالدا ەكەۋى دە وتە مىقتى بالۋانداردان باسىم ءتۇستى. اتاپ ايتساق, ەراسىل راحات قالجاندى ۇتسا, مايىس سانجار مۇحتارعا سان سوقتىردى.

وسىعان دەيىنگى جارىستاردا قازاقستاننىڭ ۇلتتىق قۇراماسىنىڭ مۇشەلەرى وليمپيا ويىن­دارىنىڭ ەكى جولداماسىن ولجالادى. ونىڭ يەگەرلەرى – نۇرسۇلتان تۇرسىنوۆ (گرەك-ريم كۇرەسى, 87 كگ) پەن ازامات دۋلەتبەكوۆ (ەركىن كۇرەس, 86 كگ). ال قىزداردىڭ قورجىنى ازىرگە بوس. سول ولقىلىقتىڭ ورنىن تولتىرۋ ءۇشىن جەتى بۇرىمدىمىز بىشكەككە اتتانىپ بارادى. ولار – لاۋرا عانيكىزى (50 كگ), جۇلدىز ەشىموۆا (53 كگ), ەمما تيسينا (57 كگ), يرينا كۋزنەتسوۆا (62 كگ), ەلەنا شالىگينا (68 كگ) جانە ءجاميلا باقبەرگەنوۆا (76 كگ).