اتىراۋلىق ۇستاز ەلۆيرا اقباتىروۆا وقۋشىلارعا ۇلتتىق اسىق ويىندارىن ۇيرەتەدى. ءوزى 200-دەن اسا اسىق جيناپ, ءتۇرلى تۇسكە بوياعان.
بۇرىن ونىڭ وتباسى قىزىلقوعا اۋدانىندا تۇرعان. كەيىن اتىراۋ قالاسىنا كوشىپ كەلگەن. قازىر ول مۇنايلى شاھارداعى ق.ساتباەۆ اتىنداعى №19 مەكتەپ-گيمنازياسىنىڭ باستاۋىش سىنىبىنا ءدارىس بەرەدى.
ء«وزىمىزدىڭ بالالارىمىزعا اسىق جيناعان ەدىك. ولار ەسەيگەن سوڭ اسىقتى نە ىستەۋ كەرەك؟ وقۋشىلارعا ۇلتتىق ويىنداردى ۇيرەتۋ ءۇشىن ءبىر دوربا اسىقتى مەكتەپكە الىپ كەلدىم. العاشقىدا وقۋشىلار اسىققا تاڭىرقاپ قارادى. كەيبىرى اسىقتى كورمەگەن ەكەن. قىزىققانى اسىقتى ۇيىنە الىپ كەتۋگە سۇرادى. كەيىن وقۋشىلارىم اسىق جيناي باستادى. ساباق كەزىندە ۇلدارعا اسىق اتۋ, ال قىزدارعا بەس اسىق پەن حانتالاپاي ويىندارىن ۇيرەتىپ ءجۇرمىن. ءبىرىنشى سىنىپ وقۋشىلارى ءۇشىن اسىقتان ارىپتەردى قۇراستىردىم. اسىقپەن ويىن ويناۋ وقۋشىلاردىڭ قول موتوريكاسىن دامىتۋعا سەپتىگىن تيگىزەدى», دەيدى ەلۆيرا اقباتىروۆا.
ونىڭ ايتۋىنشا, اتا-ەنەسى, وزگە دە تۋىستارى اسىق جيناۋعا كومەكتەسىپتى. ال اسىققا قىنامەن, شاي جانە ءجۇن بوياۋىمەن ءتۇرلى رەڭك بەرەدى.
«اسىق ويىندارىنىڭ بالانىڭ سىمباتتى بولۋىنا ىقپالى بار. ويتكەنى اسىق ويناعان بالا ءيىلۋ, ادىمداپ ءجۇرۋ, سەكىرۋ, ساقا ءيىرۋ, كوزدەپ تيگىزۋ, لاقتىرۋ مەن اتۋ سەكىلدى ءتۇرلى قيمىلدى جاسايدى. اسىق ويناعان بالانىڭ مەرگەندىگى, قىراعىلىعى مەن يكەمدىلىگى جەتىلەدى. قيمىلى شيراپ, ويلاۋ قابىلەتى جاقسارادى, تۇستەردى تەز اجىراتادى. باستاۋىش سىنىپتىڭ وقۋشىلارىن سەرگىتۋ ءۇشىن اسىق ويىندارىن پايدالانامىن» دەيدى ە.اقباتىروۆا.
اتىراۋ وبلىسى