وسىدان ءبىراز جىل بۇرىن قوستانايداعى جايلى قىزمەت, جاقسى جالاقىسىن تاستاپ, كىندىك قانى تامعان مەڭدىقارا اۋدانىنداعى تەڭىز اۋىلىنا قايتا ورالعان ەربول قارىمساقوۆ بۇگىندە اتاكاسىپكە ءبىرجولا بەت بۇرىپ, اسىل تۇقىمدى مال باسىن كوبەيتۋگە دەن قويىپ وتىر.
ورەلى جاس جەكە شارۋاشىلىعىنىڭ قامىن كۇيتتەۋمەن عانا شەكتەلىپ قالماي, «اۋىل» پارتياسىنىڭ اتىنان سايلانعان اۋداندىق ءماسليحات دەپۋتاتى رەتىندە ءوڭىر تۇرعىندارىنىڭ ءال-اۋقاتىن ارتتىرۋ, اۋىل ينفراقۇرىلىمىن جەتىلدىرۋ, مال شارۋاشىلىعىن دامىتۋ ماسەلەلەرىنە دە ءۇن قوسىپ ءجۇر.
ەربولدى وبلىستىق مادەنيەت باسقارماسىندا باس مامان بولىپ قىزمەت ەتىپ جۇرگەن كەزىنەن بىلەمىز. كوبىنە وڭىردە ءوتىپ جاتاتىن ءتۇرلى مادەني ءىس-شارالاردىڭ باسى-قاسىنان كورىنىپ جۇرەتىن. 2015 جىلى ۇيلەنىپ, وتاۋ قۇرىپ تۋعان اۋىلى تەڭىزگە كوشىپ كەتتى دەپ ەستىدىك. اراعا ەكى-ءۇش جىل سالىپ كەزدەيسوق جول ءتۇيىستىرىپ قالدىق. ىنىسىمەن بىرلەسىپ جەكە شارۋا قوجالىعىن قۇرىپ, سودان بەرى مال باسىن كوبەيتۋمەن اينالىسىپ جاتقانىن ايتقان. ءوزىمىز كورگەن بۇرىنعى مەملەكەتتىك قىزمەتشى ەربولعا مۇلدە ۇقسامايدى. قيمىلى شيراق, ءسوزى دە, ءوزى دە ابدەن ىسىلعان كاسىپكەر ازاماتتى كوردىك.
مال شارۋاشىلىعىن قولداۋعا ارنالعان مەملەكەت باعدارلاماسىن ءتيىمدى پايدالانا بىلگەن ەربول باستاپقىداعى 5 باس سيىرىن كوبەيتىپ, بۇگىندە ءىرى قارا مالىن 60-قا دەيىن جەتكىزىپ الدى. مۇنىڭ سىرتىندا 300-گە تارتا قويى بار. ەندى مال تۇقىمىن اسىلداندىرۋعا دەن قويىپ وتىرعان شارۋا بۇل ىستە دە مەملەكەتتىڭ كوپ كومەك بەرىپ جاتقانىن ايتادى.
«قارا مالعا مەملەكەت جىل سايىن 10 مىڭ تەڭگەدەن سۋبسيديا تولەيدى. ەگەر سول سيىردان تۋعان ءتولدى ءبىر جىلدان سوڭ ەت كومبيناتىنا نەمەسە بورداقىلاۋ الاڭىنا تاپسىرسام, ءتىرى سالماعىنا 200 تەڭگەدەن قوسىمشا سۋبسيديا بەرىلەدى. مەن ءبىر بۇزاۋعا 50-60 مىڭ تەڭگەدەن دەمەۋقارجى الىپ وتىرمىن. مىسالى, بيىل قارابالىق اۋدانىنداعى بورداقىلاۋ الاڭىنا 7 بۇزاۋ وتكىزدىم. ورتاشا سالماعى 250 كيلودان شىقتى. ولار ءار باستىڭ ءتىرى سالماعىن 1 مىڭ تەڭگەدەن قابىلداپ الدى. ال مەملەكەت 7 بۇزاۋدى ءوسىرىپ, وتكىزگەنىم ءۇشىن قوسىمشا 350 مىڭ تەڭگە دەمەۋقارجى بەردى. سوندا ءبىر بۇزاۋ 300 مىڭ تەڭگەگە شىعىپ تۇر», دەيدى ە.قارىمساقوۆ.
فەرمەر وسىدان ءبىراز جىل بۇرىن وڭىردە اسىل تۇقىمدى مال ءوسىرىپ جاتقان ءىرى شارۋاشىلىقتان قازاقتىڭ ەكى اق باس بۇقاسىن ساتىپ العان. قازىر سونىڭ ناتيجەسىن كورىپ وتىر. اسىل تۇقىمدى بۇقادان تۋعان ءتول ەرتە وسەدى, تەز ەت الادى. ەتتى مالدى ەت كومبيناتتارى دا ءوز كولىكتەرىمەن كەلىپ الىپ كەتەدى. سونىمەن قاتار ەربول 2021 جىلى 100 باس اسىل تۇقىمدى قوي ساتىپ العان. بۇل قويلاردىڭ ەرەكشەلىگى – قاتتى اياز نەمەسە بوران بولماسا, قاڭتار, اقپان ايىنا دەيىن دالادا تەبىندەپ جۇرە بەرەدى. شارۋا ءوزى ءوسىرىپ وتىرعان ءبىر باس اسىل تۇقىمدى قوي ءۇشىن مەملەكەتتەن 4 جارىم مىڭ تەڭگەدەن سۋبسيديا الىپ وتىر.
مالعا قازىر كوبىنە شارۋانىڭ ءوزى مەن كومەكشى باقتاشىسى قارايدى. جۇمىس كۇشى تاپشى بولعاندىقتان, بارلىق ىسكە ەربولدىڭ ءوزى بىلەك سىبانىپ كىرىسىپ كەتەدى.
ء«وزىم ەڭبەكتەنىپ تابىس تاباتىن جۇمىستى جاقسى كورەمىن. قارا جۇمىسقا دا, تەحنيكا جۇرگىزۋگە دە ۇيرەنىپ الدىم. ءشوپ تاسيمىن, شابامىن. مال دا باعامىن. 35 گەكتار جەرىمىز بار, مالعا ازىق ءۇشىن ازداپ س ۇلى مەن ارپا ەگەمىز. ونى دا ءوزىم ەگىپ, ءوزىم جيناپ الامىن. مالعا ءشوپتى تراكتورمەن سالامىن. ول دا جۇمىستى ءبىراز جەڭىلدەتەدى. سۋىن قۇدىقتان قوسامىز. جەمىن ەندى ءوز قولىمىزبەن بەرۋگە تۋرا كەلەدى», دەيدى فەرمەر.
ەربولدىڭ جۇبايى ۆانگا اۋىل مەكتەبىندە مۇعالىم بولىپ ىستەيدى. مەكتەپتەن تىس ۋاقىتتا ءۇي شارۋاشىلىعىمەن قوسا, سىرتتاعى مالدى قاراۋعا دا قولعابىس تيگىزىپ ۇلگەرەدى. جاس وتباسى ۇيەلمەلى-سۇيەلمەلى ءۇش بالا ءوسىرىپ وتىر.
تەڭىز اۋىلىندا بۇگىندە 150-گە تارتا ءۇي بار, 800-گە جۋىق ادام تۇرادى. ەگىن سالىپ مال وسىرۋمەن اينالىساتىن 20-دان اسا ءىرىلى-ۇساقتى شارۋاشىلىق جۇمىس ىستەپ تۇر. سونىڭ ءبىرى – ەربول قارىمساقوۆتىڭ شارۋا قوجالىعى. اكىمدىكتەگى قىزمەتىنەن گورى اتاكاسىپپەن اينالىسۋدى قول كورگەن فەرمەردىڭ اۋىل بولاشاعىنا دەگەن سەنىمى زور.
قوستاناي وبلىسى,
مەڭدىقارا اۋدانى,
تەڭىز اۋىلى