«ىرىس الدى – ىنتىماق» دەيدى دانا حالقىمىز. بىلتىر تۇركيا جەرىندە بولعان الاپات ءزىلزالادان كەيىن وتانداستارىمىز قارجى جيناپ, باۋىرلاس ەلگە مىڭداعان كيىز ءۇي جونەلتىپ, ىنتىماعىن تانىتقان ەدى. جەر سىلكىنىسى سالدارىنان ءۇيسىز-كۇيسىز دالادا قالعان تۇرىك باۋىرلار سول كيىز ءۇيدىڭ قىزىعىن كورۋدەي-اق كورىپ, اتاجۇرتتاعى اعايىنعا كوزدەرىنە جاس الا العىس جاۋدىرعان-دى. قازىر سول كوشپەلىلەر باسپاناسى قايدا ەكەن دەگەن سۇراق قولىمىزعا قالام الدىردى.
قيىن-قىستاۋ شاقتا قازاق حالقى دا قاراپ وتىرماي, باۋىرلاس ەلگە گۋمانيتارلىق كومەكتى كۇندىز-ءتۇنى جىبەردى. سونىڭ ىشىندە جەر سىلكىنىسىنىڭ تاۋقىمەتىن تارتىپ, قايعىدان قان جۇتقان تۇرىكتەرگە جاردەم بولعان باسپانا – قازاقتىڭ كيىز ءۇيىن ايرىقشا اتاپ ايتساق ارتىق ەتپەس. جۇرتتان جينالعان 20 ميلليون تەڭگەگە جۋىق قارجىعا العاشىندا 45 كيىز ءۇي ساتىپ الىنعان ەدى. كەيىننەن بۇل ساۋاپتى دا يگى ءىستىڭ سوڭى تولقىندى قۋعان تولقىنداي اسەر الىپ, بۇكىلحالىقتىق سيپاتقا يە بولدى.
تۇركياعا كيىز ءۇي جونەلتۋ باستاماسىنىڭ باسى-قاسىندا جۇرگەن ارىپتەسىمىز نۇربەك بەكباۋعا حابارلاسىپ, قايعىدان قان جۇتقان حالىققا قاناتىمەن سۋ سەپكەن قارلىعاشتاي قىزمەت قىلعان قازاقتىڭ كيىز ءۇيىنىڭ قازىرگى كۇيىن سۇراستىردىق.
–تۇرىك باۋىرلارعا گۋمانيتارلىق كومەك رەتىندە 100 كيىز ءۇي الىپ بارماق بولدىق. بىراق جولدا سىنىپ قالعانى بار, ۇشاققا سىيماعانى بار, جالپى سانى 92 كيىز ءۇي جەتكىزدىك. ولاردى نەگىزىنەن حاتاي, قاحرامانماراش, گازيانتەپ قالالارىنا قۇردىق. ودان بولەك, وتاندىق كاسىپكەرلەر 30 كيىز ءۇي قوستى. وسىلايشا, جالپى سانى 125-تەي قازاق ءۇيدى تۇركيانىڭ 10 قالاسىنا تىگىپ شىقتىق, – دەيدى بەلگىلى جۋرناليست ن.بەكباۋ.
ونىڭ ايتۋىنشا, ىنتالى توپتى دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ناجمەددين ءبىلال ەردوعان قابىلداپ, قازاقستاننان 6 مىڭ كيىز ءۇي الۋعا تاپسىرىس بەرگەن ەكەن. بىراق ەلدە بىردەن مىڭداعان كيىز ءۇي دايىنداپ بەرە قوياتىن تسەح بولماعاندىقتان ءارى ينۆەستيتسيا جاعى قيىنداپ كەتكەن سوڭ بۇل تاپسىرىس تولىق ورىندالماپتى.
– قول قۋسىرىپ, قاراپ وتىرماي ءبىز قىرعىز باۋىرلاردى دا بۇل ىسكە تارتتىق. «Air Astana» كومپانياسىنىڭ قىزمەتكەرى گ ۇلىم قايىردەنقىزى, كاسىپكەر داستان جۇماباي ۇشەۋىمىز بىلەك سىبانا كىرىسىپ, قازاق جەرىنەن انادولىعا باس-اياعى 2 مىڭنان اسا كيىز ءۇي جەتكىزدىك. قىرعىزدار دا سول ەكى مىڭنىڭ شاماسىندا كيىز ءۇي جونەلتتى. بۇل شارۋا جالعاسىپ جاتتى. وسىلايشا, قاجەت ەتىلگەن 6 مىڭ كيىز ءۇي سانىن شىعارا الدىق, – دەيدى ن.بەكباۋ.
ن.بەكباۋدىڭ ايتۋىنشا, كيىز ۇيلەردى دۇنيەجۇزىلىك ەتنوسپورت كونفەدەراتسياسى الداعى كوشپەلىلەر ويىندارىنا قولدانۋ ماقساتىندا قويماسىنا جيناپ قويىپتى. بۇل كيىز ۇيلەردىڭ ىشىندە جۋىناتىن جەرى, اجەتحاناسى قوسا قاراستىرىلعان. تابيعي اپاتتان قاتتى قيراعان قاھرامانماراش پەن حاتاي قالالارىندا قۇرىلىس جۇمىستارى ءجۇرىپ جاتقاندىقتان, ءالى كۇنگە كيىز ۇيدە تۇرىپ جاتقان تۇرعىندار بار ەكەن.
– قالا اكىمشىلىگى ولارعا بىرنەشە مارتە زاماناۋي كونتەينەر-ۇيلەردى ۇسىنعان ەكەن, بىراق ولار وزدەرىنە قازاقى ءۇي ىڭعايلى ەكەنىن ايتىپ تەمىر باسپانادان باس تارتقان. قازىر سول قاھرامانماراشتا كيىز ۇيلەر قاز-قاتار تىگىلگەن ۇلكەن-ۇلكەن شاعىن اۋداندار بار. حالىقارلىق AFAD ۇيىمى ليۆيادا سۋ تاسقىنى بولىپ, بوران تۇرىپ, ۇيلەر قيراعان كەزدە 500-گە جۋىق كيىز ءۇيدى سول ەلگە گۋمانيتارلىق كومەك اياسىندا جەتكىزىپتى. جاعداي تۇزەلىپ, ءبارى دۇرىستالعان سوڭ ول كيىز ۇيلەردى قايتادان تۇركياعا الىپ كەلگەن, – دەگەن ن.بەكباۋ كەيبىر كيىز ۇيلەر جوعارى وقۋ ورىندارىندا, حالىقارالىق كورمەلەردە, ادام كوپ جۇرەتىن ورىنداردا دا تىگىلگەنىن جەتكىزدى.
وسىلايشا, باۋىرلاس ەلگە قازاق پەن قىرعىزدان جەتكەن 6 مىڭ كيىز ءۇيدىڭ ءتورت مىڭى جاعدايعا بايلانىستى ءتۇرلى ماقساتتا ءالى پايدالانىلىپ ءجۇر ەكەن. ودان بولەك تۇركيالىق قازاقتار دا كيىز ۇيلەر سۇراتقان. ولارعا دا بەرىلمەك. ءبىر سوزبەن ايتقاندا, ميلليونداعان قاراجاتقا جەتكىزىلگەن كيىز ۇيلەر قويمالاردا قۇر بوسقا شاڭ باسىپ جاتقان جوق.