مادەنيەت جانە اقپارات مينيسترلىگىنىڭ قولداۋىمەن ۇلتتىق مۋزەي ۇجىمى «قوعامدىق كەلىسىم» رمم-مەن بىرلەسە وتىرىپ, «ناۋرىز – ەل ۇلىقتاعان ۇلى كۇن» اتتى ناۋرىز مەرەكەسىنە وراي كەشەندى ءىس-شارا وتكىزدى.
ۇلتتىق مۋزەيدىڭ ايتۋلى جوباسىنا جىلداعى ءداستۇر بويىنشا ديپلوماتيالىق كورپۋس وكىلدەرى, قوعام جانە ونەر قايراتكەرلەرى, عالىمدار قاتىستى. مەرەكەلىك جيىن كورىسۋ ءداستۇرىنىڭ تەاترلاندىرىلعان كورىنىسىمەن باستالىپ, ۇلتتىق مۋزەيدىڭ جىلداعى وتكىزەتىن تۇساۋ كەسۋ راسىمىنە ۇلاستى. راسىمگە استانا قالاسى اكىمدىگىنىڭ مامانداندىرىلعان بالالار ءۇيىنىڭ بالدىرعاندارى ارنايى شاقىرىلدى.
ءىس-شارا بارىسىندا ناۋرىز مەرەكەسىنە ارنالعان كورمە اشىلدى. كورمەگە قازاق حالقىنىڭ ءداستۇرلى جيھازدارىنىڭ ادەمى ۇلگىلەرى – قولدان جاسالعان ساندىقتار, تۇسكيىز جانە تۇسكەستەلەر قويىلعان. ودان بولەك كەلگەن قوناقتار نازارىنا تۇركى حالىقتارىنىڭ ۇلتتىق كيىم ۇلگىلەرىنەن دەفيلە ۇسىنىلىپ, قازاق, ازەربايجان, باشقۇرت, كۇرد, قاراقالپاق, قىرعىز, ۇيعىر, وزبەك, تاتار حالىقتارىنىڭ كيىمدەرى تانىستىرىلدى. مۋزەي الاڭىنداعى كونسەرۆاتسيا جانە رەستاۆراتسيا ءبولىمى قىزمەتكەرلەرى مەن ەتنومادەني بىرلەستىكتەر قولونەر شەبەرلەرىنىڭ تۇركى حالىقتارىنىڭ ۇلتتىق قولدانبالى ونەرى مەن ماتەريالدى مادەنيەتىنە قاتىستى ۇيىمداستىرعان كەرەمەت كورمەسى دە كوپ كوڭىلىنەن شىقتى.
«بۇگىنگى كەڭ كولەمدە ۇيىمداستىرىلىپ وتىرعان ءىس-شارانىڭ نەگىزگى ماقساتى – تۇركى حالىقتارىنىڭ مادەنيەتىن, سونىڭ ىشىندە ءداستۇرى مەن ونەرىن پاش ەتۋ, ۇلتتار اراسىنداعى مادەني بىرەگەيلىگىن ايقىنداي وتىرىپ, ەتنومادەني مۇرانى ساقتاۋ مەن تاراتۋ, وسكەلەڭ ۇرپاققا باي ءداستۇرىمىز بەن مۇرامىزدى جەتكىزۋ. «ناۋرىزناما» دەپ اتالاتىن ونكۇندىكتىڭ دە تۇپكى ماقساتى وسى», دەپ اتاپ ءوتتى مادەنيەت جانە اقپارات مينيسترلىگى مادەنيەت كوميتەتى توراعاسىنىڭ ورىنباسارى ءسابيت بارلىباەۆ.
كەلگەن قوناقتار مۋزەي فويەسىندە بەساسىق, توعىزقۇمالاق, بەستەمشە, لاڭگى سىندى ۇلتتىق ويىندار ويناپ, مارە-سارە بولدى. ءىس-شارا سوڭىندا ناۋرىزدىڭ شاشۋى شاشىلىپ, كورەرمەندەر تۇركى حالىقتارىنىڭ ۇلتتىق ونەرىن تاماشالاپ, ءان مەن كۇيگە جان سۋاردى.