ءماجىلىس توراعاسى ەرلان قوشانوۆ اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا كوتەرىلگەن ماسەلەلەر بويىنشا پارلامەنتتىك تىڭداۋ وتكىزىلەتىنىن مالىمدەدى, دەپ حابارلايدى Egemen.kz.
«مەملەكەت باسشىسى ەلىمىزدىڭ رۋحاني-يدەولوگيالىق, حالىقتىڭ تۇرمىسىن جاقسارتۋعا باعىتتالعان الەۋمەتتىك-ەكونوميكالىق باعدارلارىن ايقىنداپ بەردى. پرەزيدەنتتىڭ كوتەرگەن كەلەلى ماسەلەلەرى مەن سويلەگەن ءسوزىن باعدارلامالىق قۇجات رەتىندە قابىلداۋعا بولادى. قاسىم-جومارت كەمەل ۇلى وزەكتى پروبلەمالارعا توقتالىپ, ولاردى شەشۋدىڭ ستراتەگيالىق جانە شۇعىل تاسىلدەرىن اتاپ كورسەتتى. سونىڭ ىشىندە دەپۋتاتتارعا بىرقاتار مىندەت جۇكتەدى. ءبىز ەندى سولاردى ورىنداۋعا جەدەل كىرىسۋىمىز كەرەك», دەدى ەرلان قوشانوۆ.
ءماجىلىس سپيكەرى مەملەكەتتىك ەلتاڭبانىڭ بەينەسىنە قاتىستى كوتەرىلگەن ۇسىنىسقا پرەزيدەنت پىكىر ءبىلدىرىپ, ورتاق, بايىپتى شەشىمگە كەلۋگە شاقىرعانىن ەسكە سالدى. جالپى جۇرتشىلىقپەن بىرگە, مەملەكەتتىك سيمۆوليكانى زەرتتەپ جۇرگەن گەرالديكا سالاسىنىڭ كاسىپقوي ماماندارىنىڭ ۇسىنىستارى جەتە تالقىلانۋى قاجەتتىگىنە دە نازار اۋداردى.
ء«بىزدىڭ گەرب سان عاسىرلىق تاريحىمىزدى تاڭبالايتىن, مەملەكەتىمىزدىڭ ايبىنىن اسىراتىن, حالقىمىزدىڭ اسقاق رۋحىن ايشىقتايتىن نەگىزگى سيمۆول بولۋى كەرەك. ەڭ باستىسى, ەلىمىزدىڭ بولاشاققا ۇمتىلىسىن بەينەلەيتىن بىرەگەي اتريبۋتيكاسىنا اينالۋى ءتيىس. بۇل, ارينە, قوعام مەن ارناۋلى كوميسسيانىڭ قۇزىرەتىندەگى ماسەلە», دەپ قوستى ە.قوشانوۆ.
پالاتا توراعاسى پرەزيدەنت دەپۋتاتتاردىڭ باستاماسىمەن ازىرلەنگەن لۋدومانياعا قارسى كۇرەس جونىندەگى زاڭ جوباسىن وسى سەسسيانىڭ سوڭىنا دەيىن قابىلداۋدى تاپسىرعانىن اتاپ ءوتتى. ەسىرتكى ءوندىرۋ مەن تاراتۋ, ۆانداليزم جانە باسقا دا ماسەلەلەردىڭ شەشىمى زاڭنامالىق دەڭگەيدە رەتتەۋدى تالاپ ەتەدى.
ەرلان قوشانوۆتىڭ ايتۋىنشا, ارحەولوگيا, مەملەكەتتىك رامىزدەر مەن مەملەكەتتىك ناگرادالار سالاسىنداعى زاڭنامانى دا جەتىلدىرۋ قاجەت.
«ۇلتتىق قۇرىلتايدا كوتەرىلگەن ماڭىزدى ماسەلەلەر جونىندە پارلامەنتتىك تىڭداۋ وتكىزۋىمىز قاجەت دەپ سانايمىن. سەبەبى كەلەلى جيىندا ايتىلعان ناقتى ۇسىنىستاردى ورىنداۋ بويىنشا ماقسات-مىندەتتەرىمىزدى بىرگە ايقىنداۋىمىز كەرەك», دەپ قورىتىندىلادى ءسوزىن ە.قوشانوۆ.