ءماجىلىس قاتارىنا جاقىندا قوسىلعان دەپۋتات نۇرسۇلتان بايتىلەسوۆ پارتيالاستارىمەن بىرگە لۋدومانياعا قارسى كۇرەس ماسەلەسىن تاعى كوتەردى. دەپۋتات 25 جاسقا تولماعان ازاماتتاردى قۇمار ويىننان شەكتەۋدى ۇسىنىپ, پرەمەر-ءمينيستردىڭ ورىنباسارى تامارا دۇيسەنوۆانىڭ اتىنا ساۋال جولدادى, دەپ جازادى Egemen.kz.
نۇرسۇلتان بايتىلەسوۆ قوعامدىق كەسەلگە اينالعان لۋدومانيا مەن سينتەتيكالىق ەسىرتكىنىڭ ەل شىرقىن بۇزىپ جاتقانىن ايتا كەلە, زاڭ جوباسىنا وزگەرىس ەنگىزۋ بويىنشا ۇسىنىستارىن ورتاعا سالدى.
«زاڭ جوباسىندا قۇمار ويىن وينايتىنداردى 25 جاسقا دەيىن شەكتەۋدى, شەتەلدىك ۇيىمداستىرۋشىلاردىڭ زاڭسىز قىزمەتىندە قارجى وپەراتسيالارىنا تىيىم سالۋدى, بۇقارالىق اقپارات قۇرالدارىندا بۋكمەكەرلىك كەڭسەلەر مەن توتاليزاتورلاردىڭ جارناماسىنا تىيىم سالۋدى جانە تاعى باسقا تۇزەتۋلەر ەنگىزۋدى جوسپارلادىق. قازىر لوتوماتيك پەن باسقا لوتەرەيا تەرمينالدارى OLX جانە باسقا ماركەتپلەيستەردە ەركىن ساتىلىپ جاتىر. وسى اپپاراتتاردى ساتىپ الىپ, تۇرعىن ۇيلەردىڭ استىنداعى دۇكەندەردە زاڭسىز ويىن بيزنەسiن ۇيىمداستىرىپ, سوتتالىپ جاتقان ازاماتتار دا بارشىلىق», دەدى دەپۋتات.
ول وزەكتى ماسەلەمەن كۇرەسۋ جولىندا تەك جازا قولدانىپ قانا قويماي, ونىڭ الدىن الۋ ءۇشىن پروفيلاكتيكالىق شارالاردى ءجيى وتكىزۋ ماڭىزدى ەكەنىن ەسكەرتتى.
ودان بولەك, نۇرسۇلتان بايتىلەسوۆ تاعى ءبىر الاڭداتارلىق ماسەلە رەتىندە ەسىرتكى ءوندىرىسى مەن ساۋداسىن اتادى.
«وتكەن جىلدىڭ وزىندە عانا ەلىمىزدە ەسىرتكىگە قاتىستى 7,5 مىڭنان استام قىلمىستىق ءىس تىركەلىپ, زاڭسىز اينالىمنان 41 توننا ەسىرتكى الىنىپتى. بۇل – دابىل قاعارلىق جاعداي. قازىرگى ۋاقىتتا ەسىرتكى بيزنەسىنىڭ جاڭا كورىنىستەرىنە قارسى كۇرەستى كۇشەيتۋ ءۇشىن ءماجىلىس پرەكۋرسورلاردىڭ (ولاردىڭ كونترابانداسى عانا قىلمىستىق جازالانادى), ەسىرتكى جاساۋ ءۇشىن پايدالانىلاتىن وزگە دە زاتتار مەن جابدىقتاردىڭ (مۇندا مىندەتتى بەلگى ولاردى وتكىزۋ بولىپ تابىلادى) ەلدەگى زاڭسىز اينالىمى ءۇشىن جاۋاپكەرشىلىكتى قاتاڭداتۋدى كوزدەيتىن زاڭ جوباسىن قابىلداۋعا دايىن ەكەنىن مالىمدەيمىز», دەدى ءماجىلىس دەپۋتاتى.