قىتايدىڭ تايان قالاسىندا تاەكۆوندودان ازيا ايماقتىق ىرىكتەۋ تۋرنيرىندە 17 جاسار باتىرحان تولەۋعالي (80 كەلى) شەشۋشى كەزدەسۋدە ساۋد ارابياسى وكىلى, تۋرنيردەگى ۇزدىك سپورتشىلاردىڭ ءبىرى سانالعان ءالي مابرۋك ءال-مابرۋكتى جەڭگەنى بەلگىلى بولدى, دەپ جازادى Egemen.kz.
باتىرحان تولەۋعالي جەڭىسى تۋرالى پىكىر ءبىلدىردى.
«كەزدەسۋ الدىندا قارسىلاسىمنىڭ كوزىنە قارادىم. ونىڭ سەنىمسىزدىگى قاتتى ءبىلىنىپ تۇردى, قورقىپ تۇرعانىن كوردىم. سودان سوڭ, وزىمە دەگەن سەنىم دە ارتا ءتۇستى. وزدەرىڭىز كورگەندەي, ليتسەنزيا الىپ, اتا-انامدى, باپكەرلەرىمدى, كۇللى جانكۇيەردى قۋانتىپ جاتقان جايىم بار. شىنى كەرەك, مەندە پاريجگە بارامىن دەگەن سەنىم جوعارى بولدى. بارشا ماماندار مەن قالىڭ جانكۇيەردىڭ تىلەگى سەنىمىمدى شىڭداي ءتۇستى», دەلىنگەن b1rinshibol ينستاگرام پاراقشاسىندا جاريالانعان حابارلامادا. سونداي-اق تاعى ءبىر ليتسەنزيانى يەلەنگەن 20 جاستاعى وتانداسىمىز ساميرحون اباباكيروۆ 58 كەلىدە سىنعا ءتۇسىپ, ءۇش قارسىلاسىن قاپى قالدىرعان ەدى.