تابيعاتتىڭ تۇرلەنىپ, قىسقى قار قۇرساۋىنان بوسانىپ, تۇلەۋىنىڭ ءوزى اي بويى سوزىلادى. ادامدار اراسىندا بۇرىنعى اشۋ-ىزا, وكپە-نازدىڭ ءبارى ۇمىتىلادى.
تۋىسقا, تانىسقا, كورشىگە, الىس اعايىنعا, اۋىلداسقا جاقسى تىلەك ايتىپ, قۋانىشتى كوڭىل-كۇي سىيلايتىن كۇندەر وسى. اماندىقپەن كورىسۋ, ەسكە الۋ, جاقسىلىق تىلەپ الىس-جاقىنىمەن قاۋىشۋ – وسىنىڭ ءبارىن ءبىر كۇندىك, ءتىپتى كەيىنگى كەزدەردەگىدەي ءۇش كۇندىك مەرەكە دەپ شەكتەۋگە بولمايدى. سوندىقتان «ناۋرىزناما» دەپ اتالعان 14-23 ارالىعىنداعى ونكۇندىك بۇل مەرەكەنىڭ ناق سيپاتىن اشۋعا ءتيىس.
حريستياندىق باتىس ەۋروپا ەلدەرى مەن امەريكادا جاڭا جىلدى قارسى الاتىن كەزدە «روجدەستۆولىق كانيكۋل» دەگەن ون كۇن بويى بەرىلەتىن مەرەكەلىك دەمالىس بار. بۇل جىلدا بەرىلەتىن ەڭبەك دەمالىسىنان باسقا, تەك جاڭا جىلدىڭ قۇرمەتىنە بەرىلەتىن دەمالىس. الايدا ول حريستيان دىنىمەن تىكەلەي بايلانىستى. بىزدىڭشە, ءبىر كەزدە ءبىزدىڭ ناۋرىزنامامىز دا ونكۇندىك دەمالىس بەرىلەتىن, بىراق دىنگە قاتىسسىز, ەجەلگى جاڭا جىلدى قارسى الۋعا ارنالاتىن مەرەكەلىك دەمالىس بولاتىن سياقتى.
وسى باستامانى ىسكە اسىرۋعا قىزىلجار جۇرتى ءتۇرلى فورماتتاعى 200-دەن استام ءىس-شارانى قولعا الىپ وتىر. وندا ناۋرىزدىڭ سيپاتىن اشۋعا ءتيىستى نەگىزگى ءىس-ارەكەتتەر قامتىلعان. الدىمەن ناۋرىزدىڭ «كورىسۋ» دەپ اتالاتىن ەجەلگى سيپاتى اتالىپ ءوتتى. وندا وبلىستىق كىتاپحانا ۇجىمىمەن وبلىستىق قازاق سازدى-دراما تەاترىنىڭ قىزمەتكەرلەرى كەلىپ كورىستى. ءبىر-ءبىرىن ەستىپ كورىپ جۇرسە دە, ءبىر-ءبىرىن جاقسى بىلمەيتىن ەكى ۇجىمنىڭ قىزمەتكەرلەرى كوڭىلدى كۇيمەن, ءان-جىرمەن ارقا-جارقا بولىپ تابىسىپ قالدى...
مادەنيەت, تىلدەردى دامىتۋ جانە ارحيۆ ءىسى باسقارماسىنىڭ شىعارماشىلىق دامۋ ءبولىمىنىڭ باسشىسى اياگوز نۇرسەيىتوۆانىڭ ايتۋىنا قاراعاندا 15 ناۋرىزدا «قايىرىمدىلىق كۇنى» دەپ بەلگىلەنىپ, قالانىڭ بىرنەشە ۇجىمى جالعىزىلىكتى, قام كوڭىلدى جانداردىڭ ءۇي شارۋاشىلىعىنا كومەك قولىن سوزاتىن بولىپ بەلگىلەنگەن. وسى كۇننىڭ كەشىندە س.مۇقانوۆ اتىنداعى قازاق سازدى-دراما تەاترى «ساراڭ» اتتى, ال قالانىڭ قۋىرشاق تەاترى «پوي پەسنيۋ, مويا دومبىرا» اتتى سپەكتاكلدەردى تەگىن كورسەتتى. 16 ناۋرىز كۇنى «ابىلاي حان رەزيدەنتسياسىندا» ۇلتتىق داستۇرلەردى كورسەتىپ, «ناۋرىز مەيرامى – ۇلتتىق داستۇرلەردىڭ قاينار كوزى» اتتى تەاترلاندىرىلعان ءىس-شارا شەڭبەرىندە مۇراجاي زالدارىنا ەكسكۋرسيالار, قولدانبالى ونەر بويىنشا شەبەرلىك ساباعى جانە ۇلتتىق ويىندار ءوتتى. 17 ناۋرىز – «شاڭىراق» كۇنى. بۇل كۇنى جىل سايىن وتكىزىلەتىن داستۇرگە اينالدىرىلعان « ۇلى كۇنى ۇلىستىڭ, باسى بولسىن ىرىستىڭ» اتتى رەسپۋبليكالىق اقىندار ايتىسى ءوتتى.
ال «ۇلتتىق كيىم» كۇنى قازاقتىڭ ۇلتتىق كيىمدەرىن ناسيحاتتاۋعا ارنالعان ءتۇرلى ءىس-شارالار وتكىزىلىپ, ول «دوستىق mall» سۋپەرماركەتىنىڭ ويىن-ساۋىق ورتالىعىندا ۇلتتىق ستيلدەگى كيىم مەن اشەكەيلەردىڭ كورمە-جارمەڭكەسى تۇرىندە ۇيىمداستىرىلدى. سونىمەن قاتار 19 ناۋرىز – «جاڭارۋ كۇنىنە» وراي اقان سەرى اتىنداعى سولتۇستىك قازاقستان وبلىستىق فيلارمونياسىنىڭ «سەگىز سەرى» قازاق حالىق اسپاپتار وركەسترىنىڭ كونتسەرتى, وڭىرىمىزگە بەلگىلى سۋرەتشى ۆياچەسلاۆ ءسميرنوۆتىڭ «تۋعان ولكە سۋرەتشىنىڭ كوزىمەن» اتتى كارتينالار كورمەسى, س.مۇقانوۆ اتىنداعى وعاك «جاڭعىرۋ – جاسارۋعا باستايدى» اتتى اڭگىمە-دۇكەن بولادى.
20 ناۋرىز – ۇلتتىق سپورت كۇنى. بۇل كۇنى وبلىستىڭ بارلىق ايماعىندا جانە قالامىزدىڭ ءتۇرلى الاڭدارىندا ۇلتتىق سپورتتان ءتۇرلى جارىستار, اسىق اتۋ, توعىزقۇمالاق, ساداق اتۋ جانە ت.ب. جارىستار ۇيىمداستىرىلادى. ال 21 ناۋرىز – ىنتىماق كۇنىندە مەرەكەنىڭ باستى ساتتەرىنىڭ ءبىرى «بوتاي – ۇلى دالا مادەنيەتى» كورمەسى بولماق. سۋرەتشىلەردىڭ كارتينالارىندا تەك سولتۇستىك ءوڭىرىنىڭ عانا ەمەس, بۇكىل قازاقستاننىڭ مادەني برەندىنە اينالعان «بوتاي قونىسى» ارحەولوگيالىق ەسكەرتكىشى ۇسىنىلادى. 22 ناۋرىزدا وبلىس ورتالىعى مەن بارلىق اۋدانىندا مادەني-سپورتتىق ءىس-شارالار وتكىزىلىپ, ورتالىق كوشەلەردە ەتنواۋىلدار مەن ءتۇرلى جارمەڭكەلەر ۇيىمداستىرىلادى. ون كۇنگە سوزىلاتىن ناۋرىزناما «تازارۋ كۇنىمەن» قورىتىندىلانادى. بۇل كۇنى ەلىمىزدىڭ بارلىق ايماعىندا جالپىۇلتتىق ەكولوگيالىق اكتسيا وتەدى.
سولتۇستىك قازاقستان وبلىسى