«Taldau talks»: ساراپشىلار پلاتفورماسىنىڭ تانىستىرىلىمى

بۇگىندە ەلىمىزدە ساراپتامالىق-اناليتيكالىق سالانى دامىتۋ ءۇشىن سەناتتا جۇيەلى جۇمىس جۇرگىزىلىپ كەلەدى. «Taldau Talks» پلاتفورماسى وسى كەشەندى ءىستىڭ لايىقتى جالعاسى ەكەنىن اتاپ وتكەن ءجون. جاڭا الاڭ سەنات جانىنداعى جاس ساراپشىلار كلۋبىنىڭ مۇشەلەرىن جانە تالداۋ مەكتەبىنىڭ تالىمگەرلەرى مەن تۇلەكتەرىن بىرىكتىرەدى. پلاتفورمانىڭ نەگىزگى مىندەتى – جاھاندىق ماسەلەلەردى تالداۋ جانە سالالىق حالىقارالىق ساراپشىلاردى تارتا وتىرىپ, ولاردى شەشۋدىڭ ءتيىمدى جولدارىن ازىرلەۋ.

«Taldau Talks»-تىڭ العاشقى وتىرىسىندا ورتالىق ازيا ەلدەرىنىڭ ساياسي جانە الەۋمەتتىك-ەكونوميكالىق دامۋىنا قاتىس­تى ماسەلەلەر تالقىلاندى. اتاپ ايت­قان­دا, حالىقارالىق سۋبەكتىلىكتىڭ ءوسۋى جانە وڭىردەگى مەملەكەتتەردىڭ حالىق­ارا­لىق قاتىناستارعا ىقپالى كەڭىنەن ءسوز بولدى.

سەنات توراعاسى ءوز سوزىندە ورتالىق ازيا ەلدەرىنىڭ ءوزارا ىنتىماقتاستىعىنىڭ پەرسپەكتيۆالىق باعىتتارىنا, ونىڭ ىشىندە ساۋدا-ساتتىقتى كەڭەيتۋ جانە جاھاندىق ۇدەرىستەرگە بايلانىستى وڭىرلىك كۇن ءتارتىبىن قالىپتاستىرۋعا مۇمكىندىك بەرەتىن ينۆەستيتسيالىق جوبالاردى ىسكە اسىرۋ ماسەلەلەرىنە توقتالدى.

سونىمەن قاتار كەزدەسۋدە ساراپشىلار كليماتتىڭ وزگەرۋىنە جانە سۋ رەسۋرستارى­نىڭ تاپشىلىعىنا بايلانىستى وڭىردە تۋىن­داعان سىن-قاتەرلەرگە نازار اۋداردى. ما­ۋلەن اشىمباەۆتىڭ ايتۋىنشا, مۇنداي تۇيتكىلدى شەشۋ جولىندا بارلىق تاراپ­تىڭ ورتاق ىسكە كۇش جۇمىلدىرۋى جانە بەي­بىت­شىلىك پەن تۇراقتىلىقتى ساقتاۋ­دى نەگىزگە الا وتىرىپ ارەكەت ەتۋى اسا ماڭىزدى.

ءىس-شارا كەزىندە فرەدەريك ستارر بۇگىندە ورتالىق ازيا ايماعىندا بولىپ جاتقان سەرپىندى جانە ەلەۋلى وزگەرىستەرگە توقتالدى. عالىم ولاردىڭ ىشىندە ساياسي رەفورمالاردىڭ ىسكە اسىرىلۋ بارىسىنا جانە ەلدەردىڭ الەۋمەتتىك-ەكونوميكالىق كۇن تارتىبىنە ەرەكشە نازار اۋداردى.

جاڭا پلاتفورمانىڭ وتىرىسىنا جاس ساراپشىلار كلۋبىنىڭ مۇشەلەرى, تالداۋ مەكتەبىنىڭ تۇلەكتەرى مەن تالىمگەرلەرى جانە باسقا دا اناليتيكالىق ينستيتۋتتار مەن ورتالىقتاردىڭ وكىلدەرى بەلسەندى قاتىسىپ, تالقىلانعان تاقىرىپ جونىندە ءوز پىكىرلەرىن ءبىلدىردى.