رۋدنىيدا ناۋرىزنامانىڭ مادەنيەت جانە ۇلتتىق سالت-ءداستۇر كۇنىنە وراي ء«داستۇرىمنىڭ بالقايماعى – اجەلەر» بايقاۋى ءوتتى. سايىسقا قاتىسۋشىلار قازاقتىڭ كونەدەن كەلە جاتقان ۇلتتىق سالت-جورالعىلارىن كورسەتىپ, ولاردىڭ ءمان-ماعىناسىن اشىپ اڭگىمەلەپ بەردى.
«قازاق انالارى – داستۇرگە جول» رەسپۋبليكالىق قوعامدىق قورى مۇرىندىق بولعان ءىس-شاراعا رۋدنىي قالاسىنىڭ اكىمدىگى, جەرگىلىكتى كاسىپكەر جانات بايدوللاەۆا, رەسپۋبليكالىق «وتانداستار» قورىنىڭ وبلىستىق فيليالى, قالالىق ارداگەرلەر ۇيىمى قولداۋ كورسەتتى.
بايقاۋدىڭ سالتاناتتى راسىمىنەن سوڭ كوپشىلىك الدىنا اق كيمەشەك كيىپ-اق قازداي ءتىزىلىپ شىققان اجەلەر ساحناعا وزگەشە ءسان ءبىتىرىپ, ءىس-شارانىڭ ءوزارا سايىستان گورى مەرەكەلىك لەبى باسىم ەكەنىن ايقىن سەزدىرگەندەي بولدى. سايىسقا قاتىسۋشىلار ءوزىن تانىستىرۋ, ۇلتتىق تاعام دايىنداۋ, تۇرمىستىق سالت-داستۇرگە بايلانىستى ساحنالىق كورىنىس قويۋ كەزەڭدەرى بويىنشا سىنعا ءتۇستى. كورەرمەندەر ءاربىر قويىلىمعا ەرەكشە ىقىلاس ءبىلدىرىپ, قوشەمەت كورسەتىپ وتىردى.
«مەملەكەت باسشىسى قاسىم-جومارت توقاەۆ ۇلتتىق سالت-داستۇرلەرىمىزدى دارىپتەپ, ناسيحاتتاۋدى جاقسى جولعا قويىپ وتىر. ەلىمىزدىڭ بارلىق وڭىرلەرىندە وسى مەرەكەلىك ونكۇندىك جاپپاي قولعا الىنىپ, ۇرپاققا ۇلاعات قالدىرارلىق ءىس-شارالار ءوتىپ جاتىر. ءبىز دە وسى باستاماعا اتسالىسۋ ءۇشىن اكىمنىڭ قابىلداۋىندا بولىپ, ءوز ۇسىنىسىمىزدى ايتتىق. ول كىسى بىردەن قولداۋ ءبىلدىردى. بۇل – بويجەتىپ قالعان قىلىقتى قىزدارىمىز, ۇيدەگى كەلىندەرىمىز ۇلتتىق مادەنيەتىمىزگە, ادەپكە, اتا-بابامىزدان مۇرا بولىپ قالعان سالت-داستۇرلەرىمىزگە بەت بۇرسا, بۇرىنعى اجەلەرىمىزدەن كورگەنىن ۇمىتپاسا دەگەن نيەتپەن جاسالىپ جاتقان دۇنيە. سوندىقتان بۇدان ءارى بايقاۋدىڭ مازمۇنىن كەڭەيتىپ, جىل سايىن جاڭعىرتىپ ءداستۇرلى تۇردە وتكىزىپ وتىرۋ ويدا بار», دەيدى بايقاۋدى ۇيىمداستىرۋشى نيناگۇل پۋشاەۆا.
سايىسقا تۇسكەن اجەلەردىڭ الدى بۇگىندە نەمەرەسىن ۇيلەندىرىپ, شوبەرە ءسۇيىپ وتىر. سوعان قاراماستان ارقايسى ءوزىنىڭ ءار نارسەنى دە ۇقساتا بىلەتىن امبەباپ ەكەنىن دالەلدەپ باعىپ, ءجۇن ءتۇتىپ, ءجىپ ءيىردى, ينە ساباقتاپ, كەستە تىكتى, بالانى بەسىككە بولەپ, ءسابيدىڭ تۇساۋىن كەسىپ, قۇداعا قۇرمەت كورسەتىپ تە ۇلگەردى. ەنە مەن كەلىننىڭ جاراسىمىن, ابىسىن اراسىنداعى تاتۋلىقتى, قايىن اتا, قايىن اعا, قايىن ىنىگە قۇرمەت كورسەتۋدىڭ تاماشا ۇلگىسىن, قوناق كۇتۋدىڭ جول-جورالعىسىن كورسەتىپ, ونىڭ ءجونىن تاپىشتەپ ءتۇسىندىرىپ بەرگەن اجەلەردىڭ ىشىندە وسالى جوق. سودان بولسا كەرەك, قازىلار القاسى دا سايىسقا تۇسكەندەردىڭ ەشبىرىن ەسكەرۋسىز قالدىرماۋدى ۇيعارعان سىڭايلى. بايقاۋ قورىتىندىسى بويىنشا قاتىسۋشىلار «اسىل اجە», «بۇلبۇل اجە», «ونەگەلى اجە», ء«بىلىمپاز اجە», «قولى التىن اجە» اتالىمدارى بويىنشا ماراپاتتالدى.
قوستاناي وبلىسى,
رۋدنىي قالاسى