پرەمەر-ءمينيستردىڭ ورىنباسارى تامارا دۇيسەنوۆا اتىراۋ وبلىسىنا جۇمىس ساپارى اياسىندا بىرقاتار ونەركاسىپتىك نىسان جۇمىسىمەن تانىستى. سونداي-اق «تەڭىزشەۆرويل» كومپانياسىنىڭ وكىلدەرىمەن, «اۋىل اماناتى» جوباسىنىڭ قاتىسۋشىلارىمەن كەزدەستى.
ۆيتسە-پرەمەرگە «ەدىل-ورال» وقۋ-وندىرىستىك ورتالىعىنىڭ جۇمىسى باياندالدى. مۇندا تەحنيكالىق ماماندىق مەڭگەرگەن تۇلەكتەردىڭ ءبىلىمى مەن قۇزىرەتتىك دەڭگەيى تەكسەرىلەدى. بارلىق سىناقتان وتكەننەن كەيىن ولارعا كاسىپورىندارعا جۇمىسقا ورنالاسۋعا مۇمكىندىك بەرەتىن سەرتيفيكاتتار بەرىلەدى.
ورتالىق ەلەكتر, جەلدەتۋ جۇيەلەرى, مەحانيكا مەن كابەل مونتاجداۋ, تەلەكوممۋنيكاتسيا سالالارىندا سىناققا قاجەتتى قۇرال-جابدىقتارمەن جابدىقتالعان. تامارا دۇيسەنوۆا مۇنداي ۇيىمداردىڭ ساپالى كادر دايارلاۋداعى ماڭىزدىلىعىن اتاپ ءوتتى.
وڭىردە 7 مىڭعا جۋىق ادامدى جۇمىسپەن قامتىپ وتىرعان «داۋلەت» ءىرى يندۋستريالىق ايماعى بار. مۇندا ۆيتسە-پرەمەر نازارىنا اۋىز سۋ, ماكارون ونىمدەرىن دايىنداۋعا باعىتتالعان زاۋىتتار جۇمىسى ۇسىنىلدى. ءوندىرىس تولىعىمەن اۆتوماتتاندىرىلعان. ونىمدەر اتىراۋدان بولەك, ەلىمىزدىڭ وزگە وڭىرلەرىنە دە جەتكىزىلەدى. سونىمەن قاتار ايماقتا قىزمەتتىك ارنايى كيىمدەر وندىرەتىن تىگىن تسەحى جۇمىس ىستەيدى. كەلەشەكتە اسكەريلەرگە قاجەت برونەجيلەت شىعارۋدى جوسپارلاپ وتىر.
جۇمىس ساپارى اياسىندا تامارا دۇيسەنوۆا «تەڭىزشەۆرويل» جشس باسشىلىعىمەن كەزدەستى. كومپانيانىڭ باس ديرەكتورى كەۆين لايون اتقارىلىپ جاتقان جۇمىستار مەن الداعى ۋاقىتقا جوسپارلانعان جوبالار تۋرالى ايتتى. ءوز كەزەگىندە ۆيتسە-پرەمەر وندىرىستەگى ەڭبەكتى قورعاۋ جانە ەڭبەك قاۋىپسىزدىگى تالاپتارىن قاتاڭ ساقتاۋ ماسەلەلەرىنە ەرەكشە نازار اۋداردى.
وڭىردە تەڭىزدەگى «كەلەشەك كەڭەيۋ جوباسىنىڭ» اياقتالۋىنا بايلانىستى قىزمەتكەرلەردىڭ جۇمىستان بوساتىلۋى ماسەلەسى وزەكتى. وبلىس اكىمدىگى بەرگەن دەرەككە ساي, بىلتىر جۇمىستان بوساتىلعانداردىڭ 96%-ى الەۋمەتتىك قولداۋ شارالارىمەن قامتىلدى. جارتىسىنان استامى جۇمىسپەن قامتىلسا, وزگەلەرىنە الەۋمەتتىك تولەمدەر تاعايىندالىپ, ءبىر بولىگى وقۋ كۋرستارىنان ءوتتى.
«جۇمىسسىز قالعان ازاماتتارعا جان-جاقتى قولداۋ كورسەتۋ – ماڭىزدى مىندەت. بۇل رەتتە ايماق اكىمدىگى مۇددەلى مەملەكەتتىك ورگاندارمەن بىرلەسە ءتيىستى شارالار قابىلداۋى قاجەت. مەملەكەت تاراپىنان جۇمىسسىز ازاماتتارعا قاتىستى ءتۇرلى جوبالار قاراستىرىلعان. بىلىكتىلىگىن شىڭدايمىن دەگەندەرگە وقۋ كۋرستارى, ءوز كاسىبىن اشقىسى كەلەتىندەرگە جەڭىلدەتىلگەن نەسيەلەر ۇسىنىلادى. ازاماتتارىمىزدى قولداۋ ءۇشىن بارلىق مۇمكىندىكتى پايدالانۋىمىز كەرەك», دەپ اتاپ ءوتتى تامارا دۇيسەنوۆا.
ايتا كەتەيىك, ءىرى ءوندىرىس وشاعى جەرگىلىكتى شارۋاشىلىقتار ونىمدەرىن تۇتىنۋشىسى دا بولا الادى. سونداي-اق كەزدەسۋدە اۋىل تۇرعىندارىنىڭ تابىسىن ارتتىرۋعا باعىتتالعان «اۋىل اماناتى» جوباسىنىڭ ىسكە اسىرىلۋ بارىسى قارالدى.
بىلتىر ايماققا جوبا اياسىندا 1,5 ملرد تەڭگەگە 192 شاعىن نەسيە بەرىلدى. بيىل وڭىرگە 761 ملن تەڭگە قاراستىرىلعان, ونىڭ اياسىندا 83 ازامات جەڭىلدەتىلگەن نەسيە الادى دەگەن جوسپار بار.
باعدارلاماعا قاتىسۋشىلاردىڭ ءبىرى تاسقالا اۋىلىنىڭ تۇرعىنى قۋانىش ياكۋدين ايماقتا العاش بولىپ, قۇلپىناي ەگۋدى قولعا الماق.
«مەن كاسىپ اشپاس بۇرىن وقۋ كۋرستارىنان ءوتتىم. قۇلپىناي ءوسىرۋدىڭ ءوز ەرەكشەلىكتەرى بار. سوندىقتان ونىڭ ەكى ءتۇرىن ەگىپ كورمەكپىن. قايسىسى جاقسى ءونىم بەرەتىنىن باقىلاۋىم كەرەك», دەپ قۋانىش ياكۋدين جوسپارىمەن ءبولىستى.
بۇگىندە ايماقتا 51 جىلىجاي بار. دەگەنمەن ولاردىڭ كوبىندە كوكونىس وسىرىلەدى. تامارا دۇيسەنوۆا تاسقالا تۇرعىنىنىڭ باستاماسىنا وڭ باعا بەرىپ, ساتتىلىك تىلەدى.