كەشە اتىراۋدا ۇلتتىق قۇرىلتايدىڭ ءۇشىنشى وتىرىسى اياسىندا جۇمىس سەكتسيالارىنىڭ ءماسليحاتتارى ءوتتى. تۇسكە دەيىن پرەزيدەنتتىڭ كومەكشىسى رۋسلان جەلدىبايدىڭ مودەراتورلىق ەتۋىمەن «ازاماتتىق قوعام» سەكتسياسى, سونداي-اق مادەنيەت جانە اقپارات ءمينيسترى ايدا بالاەۆانىڭ مودەراتورلىعىمەن «مادەنيەت. ونەر. رۋحانيات» سەكتسياسى جۇمىس ىستەدى.
ال تۇستەن كەيىن پرەمەر-ءمينيستردىڭ ورىنباسارى تامارا دۇيسەنوۆانىڭ جەتەكشىلىگىمەن «الەۋمەتتىك-ەكونوميكالىق جانە ايماقتىق دامۋ» سەكتسياسىنىڭ, عىلىم جانە جوعارى ءبىلىم ءمينيسترى ساياسات نۇربەكتىڭ مودەراتورلىق جاساۋىمەن ء«بىلىم جانە عىلىم» سەكتسياسىنىڭ وتىرىسى ءوتتى. جالپى العاندا, ءتورت سەكتسيانىڭ جۇمىسىندا ۇلتتىق قۇرىلتايدىڭ 70-كە جۋىق مۇشەسى ءسوز سويلەپ, 100-دەن اسا ۇسىنىس پەن باستاما كوتەرىلدى.
سەكتسيالاردا ايتىلعان ۇسىنىستاردىڭ باسىم بولىگى قوعام بىرلىگىن ودان ءارى نىعايتۋ, جالپىۇلتتىق قۇندىلىقتاردى دارىپتەۋ, ەلدىڭ عىلىمي الەۋەتىن كوتەرۋ, مادەنيەت سالاسىن قولداۋ, جەرگىلىكتى ءوزىن-ءوزى باسقارۋ جۇيەسىن دامىتۋ, كوشى-قون ماسەلەسىن رەتتەۋ جانە قوعامداعى وزگە دە وزەكتى ماسەلەلەرگە قاتىستى جاسالدى. ۇلتتىق قۇرىلتاي مۇشەلەرىنىڭ مۇنداي بەلسەندى قىزمەتى اتالعان ازاماتتىق ينستيتۋتتىڭ قوعام مەن مەملەكەت اراسىندا ءتيىمدى ديالوگ الاڭىنا اينالعانىن كورسەتەدى.
ەرلان قارين,
مەملەكەتتىك كەڭەسشى