پرەمەر-مينيستر ولجاس بەكتەنوۆ دۇنيەجۇزىلىك دەنساۋلىق ساقتاۋ ۇيىمىنىڭ ەۋروپالىق وڭىرلىك بيۋروسىنىڭ ديرەكتورى حانس كليۋگەمەن كەزدەستى.
كەزدەسۋگە قاتىسۋشىلار قازاقستان ۇكىمەتى مەن ددۇ-نىڭ دەنساۋلىق ساقتاۋ سالاسىنداعى ورنىقتى دامۋ ماقساتتارىنا قول جەتكىزۋ جونىندەگى بىرلەسكەن جۇمىسىن تالقىلادى. اتاپ ايتقاندا, 2024-2025 جىلدارعا ارنالعان ەكىجىلدىق ىنتىماقتاستىق تۋرالى كەلىسىم شەڭبەرىندە قازىرگى ۋاقىتتا دەنساۋلىق ساقتاۋ قىزمەتتەرىمەن جاپپاي قامتۋعا قول جەتكىزۋ, حالىقتىڭ دەنساۋلىعىن جاقسارتۋ جانە كادرلىق الەۋەتتى ارتتىرۋ ماسەلەلەرىنە ەرەكشە نازار اۋدارىلۋدا.
ددۇ – قازاقستاننىڭ دەنساۋلىق ساقتاۋ سالاسىنداعى ماڭىزدى ستراتەگيالىق سەرىكتەسى. بىرلەسكەن جوسپارلى جۇمىستىڭ, سونىڭ ىشىندە تەحنيكالىق جانە ساراپتامالىق قولداۋدىڭ ناتيجەسى حالىقتىڭ تىنىس الۋ, قان اينالىمى جۇيەسى اۋرۋلارىمەن سىرقاتتانۋشىلىق, سونداي-اق قاتەرلى ىسىكتەردەن بولاتىن ءولىم-ءجىتىم دەڭگەيىنىڭ تومەندەۋى بولدى. ءوز كەزەگىندە, الماتى دەكلاراتسياسىنىڭ العاشقى مەديتسينالىق-سانيتارلىق كومەك كورسەتۋ قاعيداتتارىن ۇستانۋ ەلدەگى انا مەن بالا ءولىمى دەڭگەيىنىڭ تومەندەۋىنە, ءومىر ءسۇرۋ ۇزاقتىعىنىڭ ارتۋىنا ىقپال ەتتى.
«قازاقستان العاشقى مەديتسينالىق-سانيتارلىق كومەكتى نىعايتۋدىڭ ماڭىزدىلىعى تۋرالى ماسەلەنى كوتەرىپ كەلەدى. وزدەرىڭىز بىلەتىندەي, ءبىزدىڭ پرەزيدەنتىمىزدىڭ مساك جونىندەگى ەلدەر كواليتسياسىن قۇرۋ جونىندەگى باستاماسىن ددۇ باس ديرەكتورى جانە ۇيىمعا مۇشە مەملەكەتتەر قولدادى. جەنەۆادا وتكەن دۇنيەجۇزىلىك دەنساۋلىق ساقتاۋ اسسامبلەياسىنىڭ 78-ءشى سەسسياسى اياسىندا مۇشە مەملەكەتتەر مەن دامۋ جونىندەگى ارىپتەستەردىڭ قاتىسۋىمەن مساك بويىنشا ەلدەر كواليتسياسىن ىسكە قوسۋ ءبىزدىڭ بىرلەسكەن جۇمىسىمىزدىڭ ماڭىزدى قادامى بولماق», دەدى ولجاس بەكتەنوۆ.
پرەمەر-مينيستر ەلىمىزدە دەنساۋلىق ساقتاۋ مەكەمەلەرىندە دە, ۇيدە دە مەديتسينالىق قىزمەتتەرمەن قامتۋدى قارقىندى تۇردە كەڭەيتىپ جاتقانىن اتاپ ءوتتى.
ءوز كەزەگىندە ددۇ وڭىرلىك بيۋروسىنىڭ باسشىسى حانس كليۋگە قازاقستاننىڭ ۇلتتىق دەنساۋلىق ساقتاۋ جۇيەسىنىڭ تۇراقتىلىعىن ارتتىرۋدا ايتارلىقتاي جەتىستىكتەرگە قول جەتكىزگەنىن اتاپ ءوتتى.
كەزدەسۋ قورىتىندىسىنا سايكەس, حالىق دەنساۋلىعىنىڭ جوعارى دەڭگەيىنە قول جەتكىزۋ ماقساتىندا كورسەتىلەتىن مەديتسينالىق قىزمەتتەردىڭ ساپاسىن ارتتىرۋ بويىنشا الداعى جۇمىستى كۇشەيتۋ باعىتتارى اتاپ ءوتىلدى.