ءماجىلىس توراعاسى ەرلان قوشانوۆ شۆەيتساريا كونفەدەراتسياسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى سالمان بالمەن كەزدەستى. كەزدەسۋدە ەرلان قوشانوۆ ەلشىگە وتكەن جىلدىڭ كۇزىندە باستالعان قازاقستانداعى ديپلوماتيالىق جۇمىسىنا تابىس تىلەدى.
ءماجىلىس سپيكەرى شۆەيتساريا قازاقستاننىڭ ەۋروپاداعى ماڭىزدى ساياسي-ەكونوميكالىق سەرىكتەسى ەكەنىن جانە ەلىمىزگە ينۆەستيتسيا سالۋدان كوشباسشىلاردىڭ ۇشتىگىنە كىرەتىنىن اتاپ ءوتتى.
– ەلدەرىمىز اراسىنداعى ديپلوماتيالىق قارىم-قاتىناس ورناعان وتىز جىل ىشىندە سەنىمدى ساياسي ديالوگ جولعا قويىلدى. ساۋدا-ەكونوميكالىق جانە ينۆەستيتسيالىق ىنتىماقتاستىق تابىستى دامىپ, مادەني-گۋمانيتارلىق بايلانىستار ارتىپ كەلەدى. قازاقستاننىڭ جاڭا ەكونوميكالىق باعىتى شەتەلدەرمەن ىسكەرلىكتىڭ كەڭ مۇمكىندىكتەرىن اشادى. وسىعان بايلانىستى ءبىز قازاقستان نارىعىنا شۆەيتساريالىق سەرىكتەستەرىمىزدى شاقىرامىز, – دەدى ەرلان قوشانوۆ.
پالاتا سپيكەرى ەلشىگە مەملەكەت باسشىسىنىڭ ساياسي رەفورمالارى تۋرالى ايتىپ, سونىڭ ناتيجەسىندە بۇگىندە ماجىلىستە التى پارتيا مەن ءبىرمانداتتى وكرۋگتەن سايلانعان دەپۋتاتتار بار ەكەنىنە نازار اۋداردى.
ەلشى قازاقستان مەن شۆەيتساريانىڭ ەكونوميكالىق, عىلىمي-تەحنيكالىق, ەكولوگيالىق ءبىلىم بەرۋ سالاسىنداعى ءوزارا ءىس-قيمىلىنىڭ الەۋەتىن تولىعىمەن پايدالانۋ كەرەكتىگىمەن كەلىستى. ونىڭ ايتۋىنشا, پارلامەنتارالىق ىنتىماقتاستىق ءبىزدىڭ بايلانىستارىمىزدى نىعايتۋدا ماڭىزدى ءرول اتقارادى. وسى تۇرعىدا تاراپتار ماجىلىستە جانە ۇلتتىق كەڭەستە قۇرىلعان پارلامەنتتىك دوستىق توپتارىن, سونداي-اق كوميتەتتەر مەن ساياسي پارتيالاردىڭ فراكتسيالارىمەن جۇمىس ىستەۋگە ۋاعدالاستى.
ەلشى ەكى ەلدىڭ دەپۋتاتتارى تىعىز ىنتىماقتاستىقتا جۇمىس ىستەي الاتىن بىرقاتار باعىتتى ۇسىندى. ونىڭ ىشىندە اۋىل شارۋاشىلىعى, سۋدى ۇنەمدەۋ, لوگيستيكا جانە ءبىلىم بەرۋ سالالارى بار.
– شۆەيتساريا جوعارى كاسىبي تەحنيكالىق قىزمەتكەرلەردى دايارلاۋعا مۇمكىندىك بەرەتىن دۋالدى ءبىلىم بەرۋ جۇيەسىمەن تانىمال. ءبىزدىڭ تاجىريبەمىز قازاقستانعا پايدالى بولار ەدى, – دەدى سالمان بال.