م.وتەمىس ۇلى اتىنداعى وقۋشىلار سارايىندا مەملەكەتتىك ءبىلىم بەرۋ تاپسىرىسى ورنالاستىرىلعان جەكەمەنشىك بالاباقشالاردىڭ مەكتەپالدى دايارلىق توپتارى اراسىندا «ەلوردانىڭ ەركەتايى» قالالىق ونەر بايقاۋى ءوتتى.
«استانا دارىنى» دارىندى بالالار مەن تالانتتى جاستاردى انىقتاۋ جانە قولداۋ ورتالىعىنىڭ ۇيىمداستىرۋىمەن وتكەن جارىستىڭ ىرىكتەۋىندە 140 بەينەماتەريال قارالدى. سايىسقا قاتىسۋشى بالدىرعاندار بىرنەشە اتالىم بويىنشا باق سىناپ, ونەرلەرىن كورسەتتى. اتاپ ايتساق, «ۆوكال» باعىتى بويىنشا 19 ونەرپاز, «حورەوگرافيا» اتالىمى بويىنشا 29 بي توبى, «ۆوكالدىق توپ» اتالىمىندا 20 توپ, ال «مۋزىكالىق اسپاپتاردا ويناۋ» باعىتىندا 6 انسامبل, بارلىعى 75 ونەر شىعارماسى قازىلار القاسى نازارىنا ۇسىنىلدى.
– «ەلوردانىڭ ەركەتايى» اتتى ونەر بايقاۋى 2017 جىلدان بەرى تۇراقتى ءوتىپ كەلەدى. ياعني بۇل سايىس باس قالامىزدىڭ 20 جىلدىق مەرەيتويىنان باستاۋ الدى. وسى بايقاۋدا العاش ساحناعا شىعىپ, ونەر كورسەتكەن بالدىرعاندارىمىزدىڭ بىرقاتارى بۇگىنگى تاڭدا رەسپۋبليكالىق, حالىقارالىق دودالاردا توپ جارىپ ءجۇر. ءبىزدىڭ دە ماقساتىمىز وسى ەدى. ياعني دارىندى بالالار مەن تالانتتى جاستاردى انىقتاۋ جانە قولداۋ ارقىلى مەجەلى ماقساتقا جول سالىپ بەرىپ وتىرمىز, – دەيدى «استانا دارىنى» ورتالىعىنىڭ ءبولىم ادىسكەرى نۇرجامال مىرزاعاليەۆا.
تالانتقا تالاپ بەرگەن بايقاۋدىڭ ناتيجەسىندە ءار اتالىمدا ۇزدىك شىققان ونەرپازدارعا «استانا دارىنى» ورتالىعىنىڭ كۋبوگى جانە ديپلومدار مەن باعالى سىيلىقتار بەرىلدى.
بەكزات قۇلشار,
ل.ن.گۋميلەۆ اتىنداعى ەۇۋ ستۋدەنتى