اۋىل بالاسى جۋسان ءيسى اڭقىعان ءاتىر ويلاپ تاپتى. ونىڭ مۇنداي ەرەكشە حوش ءيىس جاساپ شىعارۋىنا اتاقتى بەيبارىس سۇلتان تۋرالى اڭىز تۇرتكى بولىپتى.
قازاق دالاسىنىڭ حوش ءيسى بار ءاتىردى ويلاپ تاپقان وزىق ويلى وقۋشى البينا ايدارحانوۆا اقمولا وبلىسى اقكول اۋدانىنىڭ كەڭەس اۋىلىندا 5-سىنىپتا وقيدى. ول بۇل جۇمىسىن ۇستازى, باستاۋىش سىنىپ مۇعالىمى جۇپار احمەتوۆامەن بىرگە جاساعان. مەكتەپ وقۋشىسى ءاتىر ءيىسىن شىعارۋ ءۇشىن زەردەلەۋ جۇمىستارىن جۇرگىزگەنىن ايتادى.
«بەيبارىس سۇلتان تۋرالى اڭىزداعى «جۋساندا تۋعان جەردىڭ ءيسى بار» دەگەن ءسوزدى ەستىگەندە شابىتتانىپ كەتتىم. وسىنداي ءسوزدى ەستىگەننەن كەيىن تۋعان جەردىڭ ءيسى بار ءاتىردى جاساپ شىعارعىم كەلدى. بۇل ءيىستى شىعارۋدا مەن ەجەلگى شىعۋ تەگىمىزدى زەردەلەدىم», دەيدى البينا ايدارحانوۆا. وسىلايشا, وقۋشى ءوز جۇمىسىندا تابيعي قوسپالاردى پايدالانعان. ال ناتيجەسىندە پارفيۋمەريا جاساۋداعى نەگىزگى ءونىم تۋعان ولكەنىڭ قاسيەتتى جۇپارىنا اينالعان قاراپايىم جۋسان بولدى.
جوبا جەتەكشىسى, باستاۋىش سىنىپ مۇعالىمى جۇپار احمەتوۆا ءيىسسۋدىڭ دەنساۋلىققا پايدالى ەكەنىنە توقتالىپ: ء«بىز ءۇي جاعدايىندا ءاتىر جاساۋ تاسىلدەرىن زەرتتەدىك. العان ءبىلىمىمىزدى تاجىريبەدە قولدانۋ بارىسىندا جۋساننىڭ سان ءتۇرىن انىقتادىق. كوبىنە ءاتىر جاساۋعا نەگىزىنەن گۇلدەر قولدانىلادى عوي, ءبىز ونىڭ ورنىنا قاراپايىم جۋساندى تاڭدادىق. سەبەبى ونىڭ تۇنباسى تابەتتى جاقسارتادى, اسقازان-ىشەك جولدارىنىڭ قىزمەتىن نىعايتادى, جۇيكە جۇيەسىن تىنىشتاندىرادى, ءتۇرلى شانشۋ مەن قۇرىسۋلاردى, اۋىرسىنۋدى باسادى, ءتىپتى تىنىش ۇيقىعا سەپتىگىن تيگىزەدى», دەپ ءتۇسىندىردى.
اۆتورلار بۇل حوش يىسكە «ەلىم-اي» دەپ ايدار تاعىپتى. جاس ونەرتاپقىشتىڭ ايتۋىنشا, ءاتىردىڭ اتاۋى ەلىمىزدىڭ مادەنيەتىنە دەگەن سۇيىسپەنشىلىكپەن بايلانىستى. وزات وقۋشى ا.ايدانحانوۆا جاقىندا وتكەن عىلىمي جوبالار بايقاۋىندا ءوز جۇمىسىن قورعاپ, «حيميا, بيولوگيا» سەكتسياسىندا ءۇشىنشى ورىندى يەلەندى.