قالقانشا بەزدى ەمدەۋدىڭ جاڭا ءادىسى

قالقانشا بەزدى ەمدەۋدىڭ بىرەگەي يننو­ۆاتسيالىق ءادىسىن جاساۋعا استانا قالاسى­نان ارنايى كەلگەن ينتەرۆەنتسيالىق ونكورا­ديولوگ نياز مالاەۆ جەتەكشىلىك ەتتى. بۇ­عان دەيىن مۇنداي وپەراتسيانىڭ بىرنە­شە ءتۇرىن جاساعان بىلىكتى مامان ءوز تاجىريبە­سىمەن ءبولىسىپ, ينستيتۋت ماماندارىنا تىڭ ءتاسىلدىڭ ارتىقشىلىقتارى تۋرالى ءدارىس وتكىزدى.

وپەراتسيا جاسالعان ناۋقاستاردىڭ ءبىرى 47 جاستاعى تۇركىستاندىق بولسا, ەكىنشىسى – جامبىل وبلىسىنىڭ 43 جاستاعى تۇرعىنى. ماماندار قالقانشا بەزىنىڭ تۇيىندىك تۇزى­لىمدەرىن ەمدەۋدىڭ ايرىقشا ءادىسى ءساتتى وتكەنىن, الداعى ۋاقىتتا ينستيتۋت قابىر­عاسىندا مۇنداي وپەراتسيالاردى جاساۋ قولعا الىناتىنىن جەتكىزدى.

ء«بىزدىڭ كلينيكادا تەراپيالىق بەيىن­دەگى پاتسيەنتتەر, سونىڭ ىشىندە قانت ديابەتى, قالقانشا بەزى اۋرۋلارى جانە ت.ب. ناۋقاستارعا مەديتسينالىق كومەك كورسە­تىلەدى. قالقانشا بەزدىڭ قاتەرسىز تۇيىندەرىن ەمدەۋدىڭ بىرەگەي, از ءينۆازيۆتى ءادىسى – راديوجيىلىكتى ابلاتسيانى ەنگىزۋ ءبىزدىڭ پاتسيەنتتەرگە حيرۋرگيالىق ارالاسۋسىز قالقانشا بەزىنىڭ تۇيىندىك تۇزىلىمدەرىنەن ارىلۋعا, ءومىر ءسۇرۋ ساپاسىن جاقسارتۋعا مۇمكىندىك بەرەدى. ءبىز استانا قالاسىنىڭ ۇلتتىق عىلىمي مەديتسينالىق ورتالىعىنىڭ دارىگەرى, ارىپتەسىمىز نياز بەيسەن ۇلىنا قولداۋ كورسەتكەنى ءۇشىن ريزا­شى­لىعىمىزدى بىلدىرەمىز», دەيدى عزي باس­قار­ما توراعاسى مارات پاشيموۆ.

جوعارىدا ايتىپ وتكەنىمىزدەي, ەكى ناۋ­قاسقا دا ۋىتتى ەمەس ءبىر ءتۇيىندى زوب دياگنوزى قويىلعان. بۇل – فۋنكتسيانىڭ بۇزىلۋىنسىز قالقانشا بەزدىڭ قاتەرسىز پاتولوگياسى. سيمپتومدار ءتۇيىننىڭ كولەمىنە جانە ونىڭ ورنالاسۋىنا بايلانىستى ءوربىپ, كوسمەتيكالىق اقاۋ, تىنىس الۋ مەن جۇتۋدىڭ قيىنداۋى, تاماق ءىشۋ كەزىندە ىڭعايسىزدىق سەزىنۋ, داۋىستىڭ وزگەرۋى سياقتى قولايسىزدىقتاردى تۋىنداتۋى مۇمكىن. ال جارتى ساعات ىشىندە جۇزەگە اساتىن يننوۆاتسيالىق ادىستەن كەيىن ناۋقاس دەرتىنەن قۇلان-تازا ايىعادى.

«دەنساۋلىقتىڭ ادامعا بەرىلگەن ۇلكەن نىعمەت ەكەنىن دەنەمىزدى دەرت دەندەگەندە عانا بىلەتىنىمىز وكىنىشتى. مۇندايدا ءۇمىت ارتارىمىز – اقجەلەڭدى ابزال جاندار. وسىناۋ ەرەكشە ءادىستى جاساتۋعا ارنايى تۇركىستان وبلىسىنان كەلدىم. ءبارى ءساتتى ءوتىپ, كوڭىلىم جايلانعان جاعدايى بار. دارىگەرلەرگە, مەدبيكەلەرگە, ماعان قولداۋ بىلدىرگەن ءاربىر جانعا شىن كوڭىلدەن العىس ايتامىن», دەيدى ويدين تۋرەحانوۆا.

وسى ۋاقىتقا دەيىن قازاقستاندا قال­قانشا بەزدىڭ قاتەرسىز ءتۇيىندى ىسىكتەرىن حيرۋرگيالىق جولمەن الىپ تاستاۋدى قامتيتىن ستاندارتتى تەراپيا قولدانىلعان. قالقانشا بەزدى ابلاتسيالاۋ پروتسەدۋراسىن ناۋقاستار جاقسى وتكەرەدى. پروتسەسس شامامەن 30 مينۋتقا سوزىلادى. پروتسەدۋرادان كەيىن شامالى اۋىرسىنۋدىڭ پايدا بولۋى قوسىمشا اۋىرسىنۋدى باسۋدى قاجەت ەتپەيدى. راديوجيىلىكتى ابلاتسيا قاۋىپسىز. بۇل ءادىستىڭ ارتىقشىلىعى – از ينۆازيۆتىلىك جانە پروتسەدۋرانىڭ قىسقا­مەرزىمدىلىگى, جاقسى تەراپيالىق اسەر جانە اسقىنۋلاردىڭ بولماۋى.

«راديوجيىلىكتى ابلاتسيا – ىسىك تىنىنە اسەر ەتۋدىڭ زاماناۋي ادىستەرىنىڭ ءبىرى. ونىڭ ماقساتى – ىسىكتى تولىعىمەن جويۋ, وسى اسەردىڭ ناتيجەسىندە قالقانشا بەز تۇيىندەرىنىڭ پاتولوگيالىق جاسۋشالارى جويىلادى, بەزدىڭ ساۋ تىندەرى زاقىمدالمايدى. بۇل ءادىس – قالقانشا بەزى تۇيىندەرىن حيرۋرگيالىق جولمەن الىپ تاستاۋعا تاماشا بالاما», دەپ اتاپ ءوتتى نياز بەيسەن ۇلى.

كارديولوگيا جانە ىشكى اۋرۋلار عزي ەندوكرينولوگيا كافەدراسىنىڭ مەڭگەرۋشىسى لاۋرا دانياروۆانىڭ ايتۋىنشا, ناۋقاس حيرۋرگيالىق ارالاسۋدان باس تارتقان كەزدە قالقانشا بەزىنىڭ قاتەرسىز تۇيىندەرى 3 سم-دەن اسقاندا, قىسىلۋ بەلگىلەرى مەن ەستەتيكالىق پروبلەمالار تۋىنداعاندا يننوۆاتسيالىق ءادىستىڭ كومەگىنە جۇگىنگەن ابزال. سونداي-اق اتالعان ءادىستى قۇرامىندا 70%-دان اسا كيستالىق كومپونەنت, ىرگەلەس ورگانداردىڭ قىسىلۋىن تۋدىراتىن ءوسىپ كەلە جاتقان تۇيىندەر بار بارلىق دەرلىك قاتتى جانە ارالاس قاتتى كيستالىق ءتۇيىن تۇزىلىمدەرىنە جاساۋعا بولادى. رجا پروتسەدۋراسىنىڭ الدىندا تۇيىندىك ءتۇزىلىم بيوپسياسى جانە تسيتولوگيالىق زەرتتەۋ قاجەت.

الداعى ۋاقىتتا عزي بۇل باعىتتا ارناۋلى ماماندار دايارلاۋدى جانە كورسەتكىشتەر مەن قارسى كورسەتىلىمدەردى ەسكەرە وتىرىپ, قالقانشا بەزدىڭ قاتەرسىز تۇزىلىمدەرىنە رجا جۇرگىزۋدى جوسپارلاپ وتىر.

الماتى