بيىل مەملەكەت باسشىسىنىڭ تاپسىرماسىمەن الماتى قالاسى مەن ماڭعىستاۋ, اقتوبە, قاراعاندى, جامبىل, قىزىلوردا جانە پاۆلودار وبلىستارىندا 11 جاڭا قوسىمشا ءبىلىم بەرۋ ورتالىعىن اشۋ جوسپارلانىپ وتىر. بۇل ۇيىمداردىڭ اشىلۋى جەتكىنشەكتەردىڭ بويىنداعى تالانتى مەن قابىلەتىن دامىتۋعا مۇمكىندىك بەرەدى.
ء«بىزدىڭ مينيسترلىك وقۋشىلاردى قوسىمشا بىلىممەن قامتۋ بويىنشا كەشەندى جۇمىس جۇرگىزىپ وتىر. وتكەن جىلى عانا ەلىمىزدە 9 قوسىمشا ءبىلىم بەرۋ ورتالىعى اشىلدى. بيىل ولاردىڭ سانى 11-گە كوبەيەدى. جالپى, 2027 جىلعا دەيىن 100 قوسىمشا ءبىلىم بەرۋ ورتالىعىن ىسكە قوسۋ جوسپاردا بار», دەيدى وقۋ-اعارتۋ مينيسترلىگى تاربيە جۇمىسى جانە قوسىمشا ءبىلىم بەرۋ دەپارتامەنتىنىڭ ديرەكتورى مەرۋەرت مەدەتبەكوۆا.
بيىل بالالاردى قوسىمشا بىلىممەن قامتۋدى 85 پايىزعا دەيىن ارتتىرۋ جوسپارلانعان. بۇگىندە ەلىمىزدە بارلىعى 1625 مەكتەپتەن تىس ۇيىم جۇمىس ىستەيدى. وندا ءارتۇرلى باعىت بويىنشا ۇيىرمەلەردىڭ 380 ءتۇرى ۇسىنىلعان. سونىڭ ىشىندە عىلىمي-تەحنيكالىق, مۋزىكالىق, كوركەمدىك-ەستەتيكالىق, ەكولوگيا-بيولوگيالىق, تۋريستىك-ولكەتانۋ, اسكەري-پا- تريوتتىق, الەۋمەتتىك-پەداگوگيكالىق جانە باسقا دا ۇيىرمەلەر بار.