ءماجىلىستىڭ جالپى وتىرىسىندا «Amanat» فراكتسياسىنىڭ جاڭا دەپۋتاتى نۇرسۇلتان بايتىلەسوۆ قازاقستان حالقىنا ادال قىزمەت ەتۋگە انت بەردى, دەپ حابارلايدى Egemen.kz.
ول زاڭناما جانە سوت-قۇقىقتىق رەفورما كوميتەتىنىڭ قۇرامىندا جۇمىس ىستەيتىن بولادى.
«قازاقستان حالقىنا ادال قىزمەت ەتۋگە, قازاقستان رەسپۋبليكاسىنىڭ تۇتاستىعى مەن تاۋەلسىزدىگىن نىعايتۋعا, ونىڭ كونستيتۋتسياسى مەن زاڭدارىن مۇلتىكسىز ورىنداۋعا, ماعان جۇكتەلگەن دەپۋتاتتىق جوعارى مىندەتتەردى ادال اتقارۋعا انت ەتەمىن», دەدى نۇرسۇلتان بايتىلەسوۆ.
ن.بايتىلەسوۆ 1991 جىلى تۋعان. م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىن «قۇقىقتانۋ» ماماندىعى بويىنشا, وڭىرلىك الەۋمەتتىك-يننوۆاتسيالىق ۋنيۆەرسيتەتىن «ەكونوميكا جانە بيزنەس» ماماندىعى بويىنشا بىتىرگەن. زاڭ عىلىمدارىنىڭ ماگيسترى.
2009 جىلدان باستاپ استانا قالاسى الماتى اۋداندىق سوتىنىڭ جەتەكشى مامانى, باس مامان-سوت وتىرىسىنىڭ حاتشىسى, سوت پريستاۆى, باس مامانى, اتىراۋ, پاۆلودار وبلىستىق سوتتارىنىڭ كەڭسەسى باسشىسىنىڭ ورىنباسارى, جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باس كونسۋلتانتى بولىپ قىزمەت اتقارعان.
2016 جىلدان باستاپ 2018 جىلعا دەيىن – اسكەري سوت اكىمشىسىنىڭ باسشىسى, قازاقستان جوعارعى سوتى جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ حالىقارالىق بايلانىستار جانە پروتوكول ءبولىمى مەڭگەرۋشىسىنىڭ ورىنباسارى. وسى تاعايىنداۋعا دەيىن شىمكەنت قالاسىنىڭ سوتتار اكىمشىسىنىڭ باسشىسى بولدى.
سوڭعى قىزمەتى «قازاقستاننىڭ سوت اكىمشىلىگى» مەملەكەتتىك مەكەمەسى باسشىسىنىڭ ءبىرىنشى ورىنباسارى بولعان ەدى.