ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن اباي اتىنداعى قازاق ۇلتتىق پەداگوگيكالىق ۋنيۆەرسيتەتى ءوزارا ىنتىماقتاستىق تۋرالى مەموراندۋمعا قول قويدى. قۇجاتتى قوس جوعارى وقۋ ورنىنىڭ رەكتورلارى ەرلان سىدىقوۆ پەن بولات تىلەپ بەكىتتى.
مەموراندۋم شەڭبەرىندە تاراپتار پەداگوگ كادرلاردى بىرلەسىپ دايارلاپ, ولاردىڭ بىلىكتىلىگىن ارتتىرىپ, وقىتۋدا تاجىريبە الماسىپ, ءبىلىم بەرۋ ستاندارتتارى مەن وقىتۋ ادىستەرىن ازىرلەۋدى جوسپارلاپ وتىر. سونداي-اق تۇلەكتەردى جۇمىسقا ورنالاستىرۋ بويىنشا بىرلەسىپ جۇمىس ىستەپ, ءبىلىم الۋشىلاردىڭ كاسىپتىك پراكتيكاسىن جۇزەگە اسىرىپ, بىرلەسكەن ءبىلىم بەرۋ – عىلىمي ءىس-شارالارىن ىسكە اسىرۋ كوزدەلگەن.
«الەۋمەتتىك-ەكونوميكالىق دامۋ ماسەلەلەرى جونىندەگى كەڭەيتىلگەن كەڭەستە مەملەكەت باسشىسى: «بۇگىنگى تاڭدا دامۋدىڭ باستى كىلتى ءبىلىم بەرۋ بولىپ تابىلادى, ءبىز ۋاقىت تالابىنا بارىنشا بەيىم شىعارماشىلىق ۇرپاقتى تاربيەلەۋىمىز كەرەك», دەپ اتاپ وتكەن بولاتىن. ءبىزدىڭ جوعارى وقۋ ورىندارى اراسىنداعى سەرىكتەستىكتى دامىتۋ ءححى عاسىردىڭ تۇلعالارى ءۇشىن قاجەتتى داعدىلارعا يە جانە ءبىلىم بەرۋ كەڭىستىگىنىڭ ترەندتەرىنە سايكەس كەلەتىن جوعارى بىلىكتى پەداگوگتەردى دايارلاۋدى جەتىلدىرۋگە باعىتتالعان», دەدى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ە.سىدىقوۆ.
ال اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى ب.تىلەپ ەلىمىزدە پەداگوگتەردىڭ جەتىسپەۋشىلىگىنە نازار اۋداردى.
«مۇنىڭ ءبىر سەبەبى – دەموگرافيالىق ءوسۋ, اسىرەسە, استانا مەن الماتى سياقتى نەگىزگى ورتالىقتاردا. استانا قالاسىنىڭ اكىمىمەن كەزدەسۋدە 2024-2025 وقۋ جىلىنا ەلورداداعى ورتا ءبىلىم بەرۋ مەكەمەلەرى ءۇشىن 600-دەن اسا ماماننىڭ قاجەتتىلىگى تۋرالى ايتىلدى. سوندىقتان ءبىز ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىمەن جانە استانا قالاسىنىڭ ءبىلىم باسقارماسىمەن مەموراندۋمعا قول قويىپ, تاجىريبەدەن وتۋگە 180 ستۋدەنت جىبەردىك», دەدى ول.
ايتا كەتەيىك, پرەزيدەنت تاپسىرماسى اياسىندا ەۋرازيا ۇلتتىق ۋنيۆەرسيتەتىندە جەكە پەداگوگيكا فاكۋلتەتى اشىلادى. وسى رەتتە اتالعان قوس جوعارى وقۋ ورنى «ارنايى پەداگوگيكا» بىرلەسكەن ءبىلىم بەرۋ باعدارلاماسىن ازىرلەۋدى جوسپارلاپ وتىر.