تۇركىستان قالاسىندا «گەوگرافيالىق كورسەتكىشتەردى قۇقىقتىق قورعاۋ جانە ولاردىڭ ۇلتتىق برەندتەردى ىلگەرىلەتۋدەگى ءرولى» اتتى حالىقارالىق سەمينار ءوتتى.
دۇنيەجۇزىلىك زياتكەرلىك مەنشىك ۇيىمىنىڭ قولداۋىمەن ادىلەت مينيسترلىگى ۇيىمداستىرعان ءىس-شارانىڭ باستى ماقساتى – تۇراقتى دامۋدى ىلگەرىلەتۋدەگى گەوگرافيالىق كورسەتكىشتەردىڭ ەرەكشە ءرولىن تالقىلاۋ. سەمينارعا دزمۇ, ەۋروپالىق وداق, ازەربايجان, ورتالىق ازيا ەلدەرى, مەملەكەتتىك ورگاندار, عىلىمي جانە ءبىلىم بەرۋ مەكەمەلەرى, وندىرۋشىلەر مەن ماماندار قاتىستى.
ادىلەت ءمينيسترى ازامات ەسقاراەۆ «گەوگرافيالىق كورسەتكىشتەر بۇكىل الەمدە بەلگىلى ءبىر ءوڭىردىڭ تاۋارلارى مەن قىزمەتتەردىڭ جانە اگروونەركاسىپتىك وڭىرلەردى دامىتۋدىڭ ورنىقتىلىعىن ارتتىرۋدىڭ ءتيىمدى قۇرالى ەكەنىن» اتاپ ءوتتى. ول تۇركىستان وبلىسى ەلىمىزدىڭ نەگىزگى اگرارلىق وڭىرلەرىنىڭ ءبىرى رەتىندە كوپتەگەن گەوگرافيالىق كورسەتكىشتى تىركەۋدە ۇلكەن الەۋەتكە يە ەكەنىن دە ايتتى.
ءىس-شاراعا دزمۇ برەندتەرى سەكتورىنىڭ ليسسابون ءتىزىلىمىنىڭ ديرەكتورى الەكساندرا گراتسيولي, تۇركىستان وبلىسىنىڭ اكىمى دارحان ساتىبالدى قاتىستى. ءماجىلىس دەپۋتاتى بولاتبەك ناجىمەتدين ۇلى گەوگرافيالىق كورسەتكىشتەردىڭ ماڭىزدىلىعىنا توقتالىپ, وندىرۋشىلەر, تۇتىنۋشىلار جانە جالپى قوعام ءۇشىن, ونىڭ ىشىندە باسەكەگە قابىلەتتىلىكتى ارتتىرۋ, ءداستۇرلى ءبىلىم مەن مادەني مۇرانى ساقتاۋ, تۋريزم مەن ەكولوگيانى دامىتۋداعى ارتىقشىلىقتارىن اتاپ ءوتتى.
ءام زياتكەرلىك مەنشىك قۇقىقتارى دەپارتامەنتىنىڭ ديرەكتورى شولپان ابدىرەەۆا گەوگرافيالىق كورسەتكىشتەردىڭ الەۋمەتتىك-ەكونوميكالىق اسپەكتىلەرى تۋرالى باياندادى. جيىنعا قاتىسۋشىلار زاڭناماداعى كەيبىر ماڭىزدى نوۆەللالار جانە ولاردى قولدانۋ تاجىريبەسى تۋرالى پىكىرلەرىن ورتاعا سالدى.
سەميناردىڭ ءبىرىنشى كۇنى گەوگرافيالىق كورسەتكىشتەردى ۇلتتىق دەڭگەيدە تىركەۋ جانە پايدالانۋ تاجىريبەسىنە ارنالسا, ەكىنشى كۇنى ازەربايجان مەن ورتالىق ازيا ەلدەرىندە گەوگرافيالىق كورسەتكىشتەردى پايدالانۋدى قۇقىقتىق رەتتەۋدىڭ تۇجىرىمدامالىق ماقساتتارى مەن ماسەلەلەرى قارالدى.