قىزىلوردادا «اناعا تاعزىم» رەسپۋبليكالىق انالار فورۋمى ءوتتى. حالىقارالىق ايەلدەر كۇنى مەرەكەسى قارساڭىندا ۇيىمداستىرىلعان ءىس-شاراعا مادەنيەت جانە اقپارات ءمينيسترى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسى ايدا بالاەۆا, پارلامەنت سەناتىنىڭ دەپۋتاتى رۋسلان رۇستەموۆ, ءماجىلىس دەپۋتاتى مارحابات جايىمبەتوۆ, اتالعان كوميسسيانىڭ مۇشەلەرى, بەلگىلى قوعام قايراتكەرلەرى, وڭىرلەردەن كەلگەن دەلەگاتسيالار, ەڭبەك ارداگەرلەرى, ءماسليحات دەپۋتاتتارى, كوپبالالى انالار, ۇستازدار, وبلىستىڭ زيالى قاۋىمى, قوعامدىق ۇيىم وكىلدەرى قاتىستى.
وبلىس اكىمى نۇرلىبەك نالىباەۆ فورۋم جۇمىسىنا ساتتىلىك تىلەپ, قوعامداعى انالاردىڭ ءرولىن ەرەكشە اتاپ ءوتتى.
«پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيامەن بىرلەسىپ, وتكەن جىلدىڭ قاراشا ايىندا العاش رەت «اناعا تاعزىم» رەسپۋبليكالىق فورۋمىن ۇيىمداستىردىق. تاعىلىمدى ءىس-شارا قوناقتارى سول ساتتە بۇل جيىندى ءداستۇرلى تۇردە وتكىزۋدى ۇسىنعان ەدى. بۇگىنگى فورۋم ۇلتتىق كوميسسيامەن بىرلەسىپ ۇيىمداستىرىلىپ وتىر. شاڭىراعىندا بەرەكە ۇيىتىپ, قوعامدىق-ساياسي ۇدەرىستەرگە بەلسەنە قاتىساتىن ايەل-انانى ارداقتاۋ, تاريحتاعى ۇلى انالارىنىڭ ىزگى جولىن دارىپتەپ, جاس ۇرپاققا رۋحاني-ادامگەرشىلىك تاربيە بەرۋ, وتكەننىڭ تاعىلىمىن جاڭا ءداۋىردىڭ تالابىمەن ساباقتاستىرعان بۇگىنگى قازاق ايەلىنىڭ ۇلگىلى بەينەسىن قالىپتاستىرۋدى كوزدەگەن فورۋم جۇمىسىنا ساتتىلىك تىلەيمىز», دەدى ايماق باسشىسى.
مادەنيەت جانە اقپارات ءمينيسترى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسى ايدا بالاەۆا ايەل-انالاردىڭ ەل دامۋى مەن وركەندەۋىنە قوسقان ۇلكەن ۇلەسىن ايرىقشا اتاپ ءوتتى. ولاردىڭ قوعامداعى ورنىن ايقىنداپ, قۇقىقتارى مەن مۇمكىندىكتەرىن كەڭەيتۋ مەملەكەتتىك ساياساتتىڭ باسىم باعىتى بولىپ قالا بەرەتىنىن ايتتى. بۇگىندە وتباسى جانە گەندەرلىك تەڭدىك ينستيتۋتىن دامىتۋدىڭ قازاقستاندىق مودەلى ايقىندالعان 2030 جىلعا دەيىنگى تۇجىرىمدامانى ىسكە اسىرۋ جالعاسىپ كەلەدى.
جيىندا قازاقستاننىڭ ەڭبەك سىڭىرگەن قايراتكەرى, ءتىل جاناشىرى اسىلى وسمان, قازاقستان حالقى اسسامبلەياسى جانىنداعى رەسپۋبليكالىق انالار كەڭەسىنىڭ توراعاسى نازيپا شاناي, رەسپۋبليكالىق «اكەلەر وداعى» قوعامدىق بىرلەستىگىنىڭ توراعاسى ماقسۇتبەك ايتماعانبەت, «Amanat» پارتياسى ايەلدەر قاناتىنىڭ توراعاسى شولپان كارينوۆا جانە بەلگىلى تەلەجۇرگىزۋشىلەر قىمبات دوسجان, دانا نۇرجىگىتوۆا, قازاقستاننىڭ ەڭبەك سىڭىرگەن قايراتكەرلەرى ەلەنا ابدىحالىقوۆا, ەلمۇرا جاڭابەرگەنوۆا, جەڭىس ىسقاقوۆا, ۇلجان بايبوسىنوۆا ءسوز سويلەدى.
فورۋمدا ايدا بالاەۆا وتباسى قۇندىلىقتارىن ۇنەمى ناسيحاتتاپ, ايەلدەر ىستەرى جانە وتباسىلىق-دەموگرافيالىق ساياساتتى بەلسەندى ىسكە اسىرۋعا اتسالىسقان قىز-كەلىنشەكتەردى ماراپاتتادى.
وڭىردە وبلىس اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مۇشەلەرى بارلىق اۋدانداردى ارالاپ, تۇرعىندارمەن كەزدەسەدى. پسيحولوگتەردىڭ قاتىسۋىمەن ترەنينگتەر وتكىزدى. انالاردى قولداۋ جانە ادال ەڭبەكتى ناسيحاتتاۋ ماقساتىندا اۋىل ايەلدەرىنىڭ فورۋمى ۇيىمداستىرىلدى. اكەلەر وداعى قۇرىلىپ, ەر بالا تاربيەسىنە قاتىستى جۇيەلى شارالار اتقارىلىپ كەلەدى. بارلىق مەكتەپتە اكەلەر, انالار كەڭەستەرى بەلسەندى جۇمىس ىستەپ, ۇلتتىق كوميسسيانىڭ تاپسىرماسىنا سايكەس وبلىس اكىمىنىڭ وتباسى جانە ايەلدەر ىستەرى جونىندەگى ۋاكىلى تاعايىندالدى.
قىزىلوردا