مەديتسيناداعى زاماناۋي جەتىستىكتەر اسا كۇردەلى وتالاردىڭ ءوزىن پىشاقسىز جاساۋعا مۇمكىندىك بەرىپ وتىر. الەمنىڭ وزىق ەلدەرىندە كەڭىنەن پايدالانىلاتىن تىڭ ادىستەر سوڭعى جىلدارى ەلىمىزدە دە قولدانىلا باستادى. كۇنى كەشە الماتىداعى كارديولوگيا جانە ىشكى اۋرۋلار عىلىمي زەرتتەۋ ينستيتۋتىندا ۋىتتى ەمەس ءبىر ءتۇيىندى زوب انىقتالعان ەكى بىردەي ناۋقاسقا از ءينۆازيۆتى وپەراتسيا جاسالدى.
قالقانشا بەزىن ەمدەۋدىڭ بىرەگەي يننوۆاتسيالىق ءادىسىن جاساۋعا استانا قالاسىنان ارنايى كەلگەن ينتەرۆەنتسيالىق ونكوراديولوگ نياز مالاەۆ جەتەكشىلىك ەتتى. بۇعان دەيىن مۇنداي وتانىڭ بىرنەشە ءتۇرىن جاساعان بىلىكتى مامان ءوز تاجىريبەسىمەن ءبولىسىپ, ينستيتۋت ماماندارىنا تىڭ ءتاسىلدىڭ ارتىقشىلىقتارى تۋرالى ءدارىس وتكىزدى.
وتا جاسالعان ناۋقاستاردىڭ ءبىرى 47 جاستاعى تۇركىستاندىق بولسا, ەكىنشىسى جامبىل وبلىسىنىڭ 43 جاستاعى تۇرعىنى. ماماندار قالقانشا بەزىنىڭ تۇيىندىك تۇزىلىمدەرىن ەمدەۋدىڭ ايرىقشا ءادىسى ءساتتى وتكەنىن, الداعى ۋاقىتتا ينستيتۋت قابىرعاسىندا مۇنداي وتالاردى جاساۋ قولعا الىناتىنىن جەتكىزدى.
ء«بىزدىڭ كلينيكادا تەراپيالىق بەيىندەگى پاتسيەنتتەر, سونىڭ ىشىندە قانت ديابەتى, قالقانشا بەزىنىڭ اۋرۋلارى جانە ت.ب. ناۋقاستارعا مەديتسينالىق كومەك كورسەتىلەدى. قالقانشا بەزىنىڭ قاتەرسىز تۇيىندەرىن ەمدەۋدىڭ بىرەگەي, از ءينۆازيۆتى ءادىسى - راديوجيىلىكتى ابلاتسيانى ەنگىزۋ ءبىزدىڭ پاتسيەنتتەرگە حيرۋرگيالىق ارالاسۋسىز قالقانشا بەزىنىڭ تۇيىندىك تۇزىلىمدەرىنەن ارىلۋعا, ءومىر ءسۇرۋ ساپاسىن جاقسارتۋعا مۇمكىندىك بەرەدى. ءبىز استانا قالاسىنىڭ ۇلتتىق عىلىمي مەديتسينالىق ورتالىعىنىڭ دارىگەرى, ارىپتەسىمىز نياز بەيسەن ۇلىنا قولداۋ كورسەتكەنى ءۇشىن ريزاشىلىعىمىزدى بىلدىرەمىز», دەيدى عزي باسقارما توراعاسى مارات پاشيموۆ.
جوعارىدا ايتىپ وتكەنىمىزدەي, ەكى ناۋقاسقا دا ۋىتتى ەمەس ءبىر ءتۇيىندى زوب دياگنوزى قويىلعان. بۇل فۋنكتسيانىڭ بۇزىلۋىنسىز قالقانشا بەزىنىڭ قاتەرسىز پاتولوگياسى. سيمپتومدار ءتۇيىننىڭ كولەمىنە جانە ونىڭ ورنالاسۋىنا بايلانىستى ءوربىپ, كوسمەتيكالىق اقاۋ, تىنىس الۋ مەن جۇتۋدىڭ قيىنداۋى, تاماق ءىشۋ كەزىندە ىڭعايسىزدىق سەزىنۋ, داۋىستىڭ وزگەرۋى سياقتى قولايسىزدىقتاردى تۋىنداتۋى مۇمكىن. ال جارتى ساعات ىشىندە جۇزەگە اساتىن يننوۆاتسيالىق ادىستەن كەيىن ناۋقاس دەرتىنەن قۇلان تازا ايىعادى.
«دەنساۋلىقتىڭ ادامعا بەرىلگەن ۇلكەن نىعمەت ەكەنىن دەنەمىزدى دەرت دەندەگەندە عانا بىلەتىنىمىز وكىنىشتى. مۇندايدا ءۇمىت ارتارىمىز – اق حالاتتى ابزال جاندار. وسىناۋ ەرەكشە ءادىستى جاساتۋعا ارنايى تۇركىستان وبلىسىنان كەلدىم. ءبارى ءساتتى ءوتىپ, كوڭىلىم جايلانعان جاعدايى بار. دارىگەرلەرگە, مەدبيكەلەرگە, ماعان قولداۋ بىلدىرگەن ءاربىر جانعا شىن كوڭىلدەن العىس ايتام», دەيدى تۇركىستان وبلىسىنىڭ تۇرعىنى ويدين تۋرەحانوۆا.
وسى ۋاقىتقا دەيىن قازاقستاندا قالقانشا بەزىنىڭ قاتەرسىز تۇيىندىك ىسىكتەرىن حيرۋرگيالىق الىپ تاستاۋدى قامتيتىن ستاندارتتى تەراپيا قولدانىلعان. قالقانشا بەزىن ابلاتسيالاۋ پروتسەدۋراسىن ناۋقاستار جاقسى وتكەرەدى. پروتسەسس شامامەن 30 مينۋتقا سوزىلادى. پروتسەدۋرادان كەيىن شامالى اۋىرسىنۋدىڭ پايدا بولۋى قوسىمشا اۋىرسىنۋدى باسۋدى قاجەت ەتپەيدى. راديوجيىلىكتى ابلاتسيا قاۋىپسىز. بۇل ءادىستىڭ ارتىقشىلىعى – از ينۆازيۆتىلىك جانە پروتسەدۋرانىڭ قىسقا مەرزىمدىلىگى, جاقسى تەراپيالىق اسەر جانە اسقىنۋلاردىڭ بولماۋى.
«راديوجيىلىكتى ابلاتسيا - ىسىك تىنىنە اسەر ەتۋدىڭ زاماناۋي ادىستەرىنىڭ ءبىرى. ونىڭ ماقساتى - ىسىكتى تولىعىمەن جويۋ, وسى اسەردىڭ ناتيجەسىندە قالقانشا بەز تۇيىندەرىنىڭ پاتولوگيالىق جاسۋشالارى جويىلادى, بەزدىڭ ساۋ تىندەرى زاقىمدالمايدى. بۇل ءادىس قالقانشا بەزىنىڭ تۇيىندەرىن حيرۋرگيالىق الىپ تاستاۋعا تاماشا بالاما بولىپ تابىلادى», دەپ اتاپ ءوتتى نياز بەيسەن ۇلى.
كارديولوگيا جانە ىشكى اۋرۋلار عزي ەندوكرينولوگيا كافەدراسىنىڭ مەڭگەرۋشىسى م.ع.ك., MD PhD لاۋرا دانياروۆانىڭ ايتۋىنشا, ناۋقاس حيرۋرگيالىق ارالاسۋدان باس تارتقان كەزدە, قالقانشا بەزىنىڭ قاتەرسىز تۇيىندەرى 3,0 سم-دەن اسقاندا, قىسىلۋ بەلگىلەرى مەن ەستەتيكالىق پروبلەمالار تۋىنداعاندا يننوۆاتسيالىق ءادىستىڭ كومەگىنە جۇگىنگەن ابزال. سونداي-اق اتالعان ءادىستى قۇرامىندا 70%-دان استام كيستالىق كومپونەنت, ىرگەلەس ورگانداردىڭ قىسىلۋىن تۋدىراتىن ءوسىپ كەلە جاتقان تۇيىندەر بار بارلىق دەرلىك قاتتى جانە ارالاس قاتتى كيستالىق ءتۇيىن تۇزىلىمدەرىنە جاساۋعا بولادى. رجا پروتسەدۋراسىنىڭ الدىندا تۇيىندىك ءتۇزىلىم بيوپسياسى جانە تسيتولوگيالىق زەرتتەۋ قاجەت.
الداعى ۋاقىتتا عزي بۇل باعىتتا ارناۋلى ماماندار دايارلاۋدى جانە كورسەتكىشتەر مەن قارسى كورسەتىلىمدەردى ەسكەرە وتىرىپ, قالقانشا بەزىنىڭ قاتەرسىز تۇزىلىمدەرىن رجا جۇرگىزۋدى جوسپارلاپ وتىر.
الماتى