ءماجىلىس توراعاسى ەرلان قوشانوۆ رەسەي فەدەراتسياسىنىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكيندى قابىلدادى. تاراپتار ەكىجاقتى قارىم-قاتىناستاردى دامىتۋ ماسەلەلەرىن تالقىلادى.
ەرلان قوشانوۆ رەسەي مەن قازاقستان تاتۋ كورشى ءارى وداقتاستىق تۋرالى شارتتى نەگىزگە الا وتىرىپ, ىنتىماقتاستىقتى جۇيەلى تۇردە دامىتىپ كەلە جاتقانىن اتاپ ءوتتى.
– مەملەكەت باسشىلارى ءبىزدىڭ ءتۇرلى سالاداعى ءوزارا بايلانىسىمىزدىڭ جوعارى قارقىنىن ايقىنداپ بەردى. قاسىم-جومارت توقاەۆ پەن ۆلاديمير ءپۋتيننىڭ قاتىسۋىمەن وڭىرارالىق ىنتىماقتاستىق فورۋمدارى تۇراقتى تۇردە وتكىزىلىپ, ناتيجەسىندە ماڭىزدى ەكونوميكالىق جوبالار قولعا الىندى. ءبىزدىڭ ەلدەر اراسىنداعى تاۋار اينالىمى تۇراقتى ءوسىپ كەلەدى جانە 70 پايىز وڭىرلەر اراسىنداعى تىكەلەي ساۋدا ارقىلى قامتاماسىز ەتىلىپ وتىر, – دەدى ەرلان قوشانوۆ.
ءماجىلىس توراعاسى پارلامەنتارالىق ىنتىماقتاستىق قازاقستان-رەسەي بايلانىسىنىڭ ماڭىزدى قۇرامداس بولىگى ەكەنىن ايتتى. مەملەكەتتىك دۋماداعى ارىپتەستەرمەن ءتۇرلى فورماتتاعى دوستىق توپتارى جانە پالاتاارالىق پارلامەنتتىك كوميسسيا اياسىنداعى ىقپالداستىق ارتىپ كەلەدى. دەپۋتاتتار تمد پارلامەنتارالىق اسسامبلەياسى, ۇقشۇ پارلامەنتتىك اسسامبلەياسى, پارلامەنتارالىق وداق جانە باسقا دا كوپجاقتى فورۋمدار الاڭىندا تۇراقتى تۇردە پىكىر الماسىپ كەلەدى.
– بيىل قازاقستان ۇجىمدىق قاۋىپسىزدىك شارتى ۇيىمىنا توراعالىق ەتىپ وتىر. ماۋسىم ايىندا الماتىدا ۇيىمنىڭ پارلامەنتتىك اسسامبلەياسى كەڭەسىنىڭ وتىرىسى وتەدى دەپ جوسپارلانعان. ءبىز رەسەيلىك ارىپتەستەرىمىزدى قازاقستاندا كۇتەمىز, – دەدى ەرلان قوشانوۆ.
ءوز كەزەگىندە ەلشى الەكسەي بوروداۆكين قازاقستانمەن قوعامدىق-ساياسي, ساۋدا-ەكونوميكالىق جانە مادەني-گۋمانيتارلىق سالالاردا دامىپ كەلە جاتقان كەڭ اۋقىمداعى ىنتىماقتاستىققا رەسەي ۇلكەن كوڭىل بولەتىنىن ايتتى.
تاراپتار ءماجىلىس توراعاسىنىڭ رەسەيگە رەسمي ساپارىنا دايىندىق بارىسىن, سونداي-اق قازاقستان دەپۋتاتتارىنىڭ رەسەي فەدەراتسياسىنداعى پرەزيدەنت سايلاۋىن باقىلاۋعا قاتىسۋىن تالقىلادى.
كەزدەسۋ قورىتىندىسىندا تاراپتار ەكىجاقتى قارىم-قاتىناستى نىعايتۋعا, سونىڭ ىشىندە پارلامەنتارالىق ىنتىماقتاستىق اياسىندا دامىتۋعا كەلىستى.