ءا.قاستەەۆ اتىنداعى مەملەكەتتىك ونەر مۋزەيىندە تالانتتى ءمۇسىنشى دانيار سارباسوۆ ERKINDIK اتتى العاشقى جەكە شىعارماشىلىق كورمەسىن كوپشىلىك نازارىنا ۇسىندى. كورمەنىڭ اتاۋى سۋرەتشى ءۇشىن شىعارماشىلىق ەركىندىكتىڭ, وي ەركىندىگىنىڭ ماڭىزدىلىعىن كورسەتەتىن تەرەڭ مازمۇنعا يە. سونداي-اق كورمە اتاۋىنا نەگىز بولعان «ەركىندىك» مۇسىنىندە ءبىر ارناعا توعىسقان تۇلپار مەن بۇركىتتىڭ ءبىرتۇتاس بەينەسى ەركىن قالىقتاپ, وسى سەزىمدى ۇعىنۋعا جەتەلەيدى.
«شابىت» جاستار فەستيۆالىنىڭ گران-پري يەگەرى, حالىقارالىق «Turan» سىيلىعىنىڭ لاۋرەاتى د.سارباسوۆتىڭ ۇعىمىنداعى جىلقى مەن قىران قۇس – كەشەگى كوشپەلىلەردىڭ كوزى, بۇگىنگى دالا سيمۆولى. جاس بولسا دا, تاريحي جانە انيماليستىك جانرداعى شاعىن جانە مونۋمەنتالدى مۇسىندەردىڭ اۆتورى اتانىپ ۇلگەرگەن دانيار سارباسوۆتىڭ شىعارماشىلىق ىزدەنىسى ءتۇرلى باعىتى قامتيدى. كورمەگە ءمۇسىنشىنىڭ
2013–2023 جىلدار ارالىعىندا سومداعان وتىزعا جۋىق تۋىندىسى قويىلدى. ءبىر قاراعاندا, كورمەگە كەلگەن ادام ءوزىن ءۇيىر جىلقىنىڭ ورتاسىندا قالعانداي نەمەسە توپتانعان قۇستىڭ شوعىرى ىشىندە جۇرگەندەي سەزىنەدى. اۆتوردىڭ سۇيىكتى تاقىرىپتارىنىڭ بىرىنە اينالعان جىلقى – ونىڭ شىعارمالارىنىڭ نەگىزگى ەلەمەنتى. ءمۇسىنشىنىڭ سايگ ۇلىكتەر تاقىرىبىنا سۇيىسپەنشىلىگى تولاسسىز شابىتتىڭ ارقاۋى بايگە جىلقىسى مەن اساۋ تۇلپاردان, اقان سەرىنىڭ قۇلاگەرى مەن ميفتىك جاراتىلىسقا دەيىن قاناتتى پىراق ءتۇرلى قىرىنان ينتەرپرەتاتسيالانادى.
ونىڭ مۇسىندەۋىندەگى ارعىماقتار كەڭ دالانىڭ توسىندە جەلمەن جارىسىپ, باۋىرى جازىلىپ شاۋىپ كەلە جاتقانداي نەمەسە قۇس سيپاتىنا ەنىپ, قانات بايلاپ كوككە شانشىلا قارعىعانداي, كەيدە ءتىپتى الامان بايگەنىڭ الدىندا وق بويى وزىپ كەلە جاتىپ, وماقاسا قۇلاپ, قينالىپ جاتقانداي كۇردەلى قوزعالىستا بەينەلەنەدى. اۆتوردىڭ ءوزى ايتقانداي: «ەڭ قيىنى – جىلقىنىڭ قيمىل-قوزعالىسىن كورسەتۋ. مۇسىنشىگە ونىڭ شاشاسىنا شاڭ جۇقتىرماي, كوز ىلەسپەس جىلدامدىقپەن سامعاعان ءساتىن قارماپ قالۋ وڭاي ەمەس. ۋاقىت وتە كەلە وسى ءبىر قاس قاعىم ءساتتى سەزىم رەتىندە سومداۋ كەرەگىن ءتۇسىندىم. جىلقىنى سومداۋداعى باستى ۇستانىمىم ادامعا اۋىسقاندا, ول دا وسى ىرعاقپەن ءبىرتۇتاس كورىنەدى, ەرىكتى, ەركىن جاراتىلىس يەسى تابيعاتتىڭ سىڭارى بولىپ سومدالادى».
«دانياردىڭ قازاق حالقىنىڭ قىمبات قازىناسىنىڭ بىرىنەن سانالاتىن تۇلپار بەينەسىن قاستەرلەپ, جان-جانۋارلار الەمىن بەينەلەۋگە قۇشتارلىعى وسى تاقىرىپتا ءتۇرلى كومپوزيتسيا جاساپ, انيماليست-ءمۇسىنشى رەتىندە تانىلۋىنا جول اشتى. ساق مادەنيەتىن تەرەڭ زەرتتەۋىنىڭ ناتيجەسىندە ۋاقىت پەن كەڭىستىكتى جالعاستىراتىن جەلمايا تۋىندىلارى ومىرگە كەلدى. ولاردىڭ قاتارىندا دەربەس كوركەمدىك شەشىممەن, پلاستيكالىق پىشىنىمەن ەرەكشەلەنەتىن «رومانتيك», «كەربۇعى» جانە «تالپىنىس» شىعارمالارىندا ەلەۋسىز ۇساق بولشەككە دەيىن نازار اۋدارا وتىرىپ, اڭ ءستيلىنىڭ ەرەكشەلىگىن ايقىندايدى.
«تۋعان جەر» كومپوزيتسياسى ىشكى ىرعاعى مول وزگەشە پىشىنمەن مازمۇندالسا, «جوشى حان» ءمۇسىنى – پورترەتتىك جانە انيماليستىك جانرلاردىڭ جارقىن ۇيلەسىمىنە جاقسى مىسال بولا الادى. تاريحي تاقىرىپتاعى وسى كومپوزيتسيانىڭ باستى كەيىپكەرى – جىلقىنىڭ تىزگىنىن ۇستاعان ەر ادام, باتىر جوشىنىڭ كوركەم بەينەسى. تۇلپاردىڭ تۇرپاتى, ونىڭ تۇرعان كەيپى, مىنەزى اسا شىنايى دالدىكپەن سومدالعان. «قۇلاگەر», «جۇيرىك ات», «تالپىنىس» سىندى شىعارمالارىندا ءمۇسىنشى ءتۇرلى ماتەريالدارمەن جۇمىس جاساۋدىڭ شەبەرى ەكەنىن كورسەتەدى. قولا جانە قالايى سياقتى قۇرامى ءارتۇرلى ەكى ماتەريالدى ناعىز كاسىبي شەبەر عانا ۇيلەستىرە الادى», دەيدى كورمە جەتەكشىسى سامال مامىتوۆا.
الماتى