قوستانايداعى وبلىستىق كىتاپحانادا بالالار ادەبيەتىنىڭ كلاسسيگى بەردىبەك سوقپاقباەۆتىڭ 100 جىلدىعىنا ارنالعان ادەبي كەش ءوتتى. «بالالار الەمىن تاڭعالدىرعان تالانت» دەپ اتالاتىن تاقىرىپ اياسىندا وتكەن ءىس-شاراعا ءوڭىردىڭ زيالى قاۋىم وكىلدەرى, جوعارعى وقۋ ورىندارىنىڭ ۇستازدارى, ستۋدەنتتەر مەن مەكتەپ وقۋشىلارى قاتىستى.
كەشكە قاتىسۋشىلار «مەنىڭ اتىم – قوجا» فيلمىنەن ءۇزىندى تاماشالاپ, جازۋشىنىڭ ءومىرى مەن قىزمەتى, شىعارماشىلىعى تۋرالى اڭگىمە ءوربىتتى.
فيلولوگيا عىلىمدارىنىڭ كانديداتى كەنجەگۇل ەسىركەپوۆا جازۋشىنىڭ ايگىلى «بالالىق شاققا ساياحات», «مەنىڭ اتىم –قوجا», «قايداسىڭ, گاۋھار؟» پوۆەستەرى مەن «ولگەندەر قايتىپ كەلمەيدى» رومانىنىڭ كوركەمدىك ەرەكشەلىگىنە توقتالىپ, قالامگەردىڭ جازۋشىلىق زەرتحاناسىنا قاتىستى قىزىقتى ماعلۇماتتاردى ايتىپ بەردى.
ال قالامگەر شىعارمالارىن بالا جاستان جاستانىپ وقىپ وسكەن جۋرناليست داۋرەنبەك ابدىبەك: «جازۋشى تۋىندىلارىنىڭ قاتارداعى كوركەم دۇنيەلەردەن ەرەكشەلىگى – وقىرمانىن ومىرگە, ادالدىققا, قايسارلىققا, ەڭبەكسۇيگىشتىككە ۇيرەتە الاتىندىعىندا», دەگەن وي ايتتى.
ء«وز باسىم بەردىبەك سوقپاقباەۆتىڭ كىتاپتارىن بالا كەزىمىزدەن وقىپ ءوستىم. جازۋشىنىڭ شىعارمالارى ازامات بولىپ قالىپتاسۋىما كوپ اسەر ەتتى دەسەم بولادى. مەنى تاربيەلەگەن بەردىبەك سوقپاقباەۆ دەپ كوپ جەردە ايتىپ تا ءجۇرمىن. بەردىبەكپەن قاتار ءومىر سۇردىك, قاسىمىزدا جۇرگەن اقىلشىمىز بولدى. ەڭبەككە تاربيەلەدى, قيىندىقتا مويىماي, جول تابا بىلۋگە, ادال ءومىر سۇرۋگە ۇيرەتتى», دەيدى جۋرناليست. كەش بارىسىندا قالامگەردىڭ ءار جىلدارى جارىق كورگەن كىتاپتارىنىڭ كورمەسى اشىلدى.
قوستاناي وبلىسى