43 ەلدى مەكەندى سۋ باسۋ قاۋپى بار

وڭىرلىك توتەنشە جاعدايلار دەپارتامەنتى توتەنشە جاعداي­لاردىڭ الدىن الۋ باسقارماسىنىڭ باستىعى شاكير احمەتوۆتىڭ اي­تۋىن­شا, نەگىزگى قاۋىپ باياناۋىل اۋدانىندا تۋىنداۋى مۇمكىن.

«قاراعاندى وبلىسىنىڭ اۋما­عىنداعى اقجار, قاراتوقا بوگەت­تەرىنەن سۋ مول كەلەتىن بول­سا, اششىسۋ وزەنى تاسىپ, جولاي بىر­نەشە ەلدى مەكەنگە قاۋىپ ءتوندىرۋى مۇمكىن. جالپى, باياناۋىل بويىن­شا 17 اۋىلدا سۋ تاسۋ قاۋپى بار. توپىراقتىڭ توڭدانۋى بويىنشا ۋسپەن, شارباقتى اۋداندارىندا الاڭداۋشىلىق بار, كەيبىر جەرلەردە ەكى مەتر تەرەڭدىككە دەيىن مۇز قاتقان. كوكتەمدە قار جىلدام ەريتىن بولسا, ەلدى مەكەن­دەردى مول سۋ باسۋى مۇمكىن. سون­دىقتان ويپاڭ جەرلەردە ورنا­لاسقان اۋىلدار ماڭىندا تو­پىراق ۇيىندىلەرىن تۇرعىزىپ ج­اتىرمىز. 26 مىڭ دانا قۇم تول­تىرىلعان قاپشىق, 37 مىڭ توننا ينەرتتى ماتەريال, 120 توننا جانار-جاعارماي قورىن دايىنداپ قويدىق. توتەنشە جاعدايلارعا جەدەل دەن قويۋ ءۇشىن 1 702 ادام, 616 بىرلىك تەحنيكا, 42 ءجۇزۋ قۇرالى جانە 198 موتوپومپالار دايى­ن. حالىقتى ەۆاكۋاتسيالاۋدىڭ 43 پۋنكتى ازىرلەندى. بيىلعى قىس باسىنان ەلدى مەكەندەردەن 636 مىڭ تەكشە مەتردەن اسا قار شىعارىلدى, 10 ناۋرىزعا دەيىن 1 475 سۋ وتكىزۋ قۇبىرىن اشۋ جوس­پارلانىپ وتىر», دەيدى ول.

ال «قازاۆتوجول» ۇك» اق پاۆلودار وبلىسى بويىنشا فيليال ديرەكتورىنىڭ ورىنباسارى الەكسەي لوگۆينەنكونىڭ دەرەگىنشە, ءوڭىردىڭ رەسپۋبليكالىق جولدارىندا سۋ باسۋى ىقتيمال ءتورت ۋچاسكە بار. ولار باياناۋىل, ەرتىس, ماي اۋداندارى اۋماعىندا ورنالاسقان. جازعىتۇرىم قار كۇرت ەرىسە, كەيبىر جولدىڭ ۇستىمەن قىزىل سۋ ءجۇرىپ ءوتۋى مۇمكىن.

نەگىزگى قاۋىپ قالقامان – بايان­­اۋىل – ۇمىتكەر – بوتاقارا اۆتوجولىنداعى ەكى ۋچاسكەگە ءتو­نۋى عاجاپ ەمەس. اسىرەسە 231-ءشى شاقىرىمى وسال دەپ تانىلىپ وتىر.

«بۇل جەردە سۋ وتكىزەتىن ەكى تيۋ­بينگتى جانە ءبىر تەمىربەتون­دى قۇبىر ورنالاسقان. بىراق اۆتو­جولدىڭ ءوزى ويپاڭ جەردە. جازعىتۇرىم ساي-سالامەن جۇگى­رەتىن سۋ كوپ جينالسا, جولدىڭ ۇستىمەن ءجۇرىپ وتەتىنى انىق. سوندىقتان ءبىزدىڭ كاسىپورىن قىزمەتكەرلەرى ول جەرگە ءىرى جانە قيىرشىق تاس, قۇم تولتىرىلعان قاپتار, وزگە دە ينەرتتى ماتەريالداردى دايىنداپ قويدى. ەكىنشى ۋچاسكە – 100–105-ءشى شاقىرىم ارالىعى. ول جەرگە ەكى جانە ءۇش ارالىقتى ۇلكەن كوپىرلەر سالىنعان. مۇنداعى اسفالتتى جول دا ويپاڭمەن وتەدى. اششىسۋ وزەنى ارقىلى اعىل-تەگىل اعاتىن سۋ قاتتى جايىلسا, جولعا شىعىپ كە­تۋى ىقتيمال», دەپ ەسكەرتتى مامان.

ءۇشىنشى قاۋىپتى ۋچاسكە – اتا­مەكەن – ەرتىس – رۋسسكايا پوليانا باعى­تىنداعى رەسپۋبليكالىق جولدىڭ رەسەيمەن شەكارالاس تۇسىنداعى 5,8 شاقىرىمدىق اينالما جول. نەگىزگى اۆتوجول جون­دەۋگە جابىل­عاندىقتان, 2022 جىلى اينالما جول سالىنعان. بىلتىر سۋ وتكىزەتىن قۇرىلىستاردىڭ جەت­كىلىكسىزدىگىنەن اينالما جول­دىڭ ءبىر بولىگىن سۋ باسىپ, بيىكتە­تىلگەن جەردى جىرىپ وتكەن. «قازاۆتوجول» كۇشىمەن بىلتىر 11 سۋ وتكىزەتىن قۇبىر توسە­لىپتى. بىراق بيىل ەرتىس اۋدانىندا قار­دىڭ مولشەرى وتە كوپ ەكەنىن ەسكەرسەك, بۇل قۇرىلىستاردىڭ توتەننەن كەلەتىن مول سۋعا توتەپ بەرە الاتىنىنا كۇمان مول.

سوڭعىسى – اتامەكەن – كوك­توبە – ۇلكەن اقجار – كۋرچاتوۆ اۆتو­جولىنىڭ 213-شاقىرىمى. 2018 جىلى كوكتەمدە ءدال جانىنان وتەتىن تەمىرجولدىڭ ۇلكەن سۋ قۇبىرى كەنەتتەن اشىلعاندا, لاپ قويعان سۋ كولىك جولىن باسىپ قالعان. بيىل دا سول جاعداي قايتالانۋى مۇمكىن.

وڭىرلىك جۇمىلدىرۋ دايىن­دىعى جانە ازاماتتىق قورعاۋ باس­قارماسىنىڭ باسشىسى قانات كارىموۆتىڭ دەرەگىنشە, جالپى وبلىس اۋماعىنداعى بارلىق اۆتوجولدا 1 279 سۋ وتكىزەتىن قۇرىلىس بار. ولار جەرگىلىكتى اتقارۋشى بيلىك­تىڭ كۇشىمەن 10 ناۋرىزعا دەيىن قار­دان ارشىلىپ, دايىن تۇرۋى كەرەك. جالپى, قىس باسىنان وبلىس اۋما­عىندا ورتاشا العاندا 96 مم قار تۇس­كەن. كەيبىر جەردە, ماسەلەن, ەر­تىس, جەلەزين اۋداندارىندا ىل­عال­دىڭ اسا مول قورى بايقالىپ وتىر.

«قازگيدرومەت» وڭىر­لىك في­ليالىنىڭ ءبولىم باسشىسى وكسانا وۆسياننيكوۆانىڭ ويىنشا, قار سۋىنىڭ جەرگە ءسىڭۋى باياۋ ءجۇرۋى مۇمكىن. سينوپتيكتەردىڭ كون­سۋلتاتيۆتىك بولجامىنا سۇيەنسەك, ناۋرىز ايى پاۆلودار وبلىسىندا قۇبىلمالى بولادى. ناۋرىزدىڭ ءۇشىنشى ونكۇندىگىندە قار مەن جاڭ­بىر ارالاس بوراندى كۇندەر ءجيى بولۋى مۇمكىن. ال ءساۋىر مەن مامىر ايىندا اۋا تەمپەراتۋراسى ادەتتەگىدەن 1–2 گرادۋسقا جو­عارى بولادى دەگەن بولجام بار.

پاۆلودار وبلىسى