مەملەكەت باسشىسى وسكەمەن قالاسىنداعى ۇستەل تەننيسى ورتالىعىنىڭ جۇمىسىمەن تانىستى. بۇل تۋرالى اقوردا ءباسپاسوز قىزمەتى حابارلادى, دەپ جازادى Egemen.kz.
پرەزيدەنتكە بەرىلگەن مالىمەتكە سايكەس, ورتالىق ۇستەل تەننيسى بويىنشا وبلىستاعى بالالار مەن جاسوسپىرىمدەرگە ارنالعان وليمپيادالىق رەزەرۆ سپورت مەكتەبىنىڭ بازاسىندا قۇرىلعان. مۇندا ءىرى جارىستار, بۇقارالىق سپورت شارالارى مەن وقۋ-جاتتىعۋ جيىندارى وتكىزىلەدى. سونداي-اق ينۆاكلۋب سپورتشىلارى, ء«ۇمىت» بالالار ءۇيىنىڭ تاربيەلەنۋشىلەرى ءۇشىن كاسىبي دارىستەر, شوۋداۋن (كوزى ناشار كورەتىندەرگە ارنالعان ۇستەل تەننيسى) ۇيىمداستىرىلادى.
عيمارات كاسىبي تەننيس ۇستەلدەرىمەن جانە باسقا دا سپورت قۇرالدارىمەن جابدىقتالعان. ورتالىقتا سپورتشىلاردىڭ جارىستاردان كەيىن جانە جاراقات العان كەزدە فيزيوتەراپيا ەم-شارالارىن الىپ, قايتا قالىپقا كەلۋى ءۇشىن ارنايى قۇرىلعىلارمەن جابدىقتالعان دارىگەرلىك-دەنەشىنىقتىرۋ ديسپانسەرى بار.
قاسىم-جومارت توقاەۆقا سپورتتىڭ وسى ءتۇرى بويىنشا ءوڭىردىڭ جەتىستىكتەرى تۋرالى مالىمەت بەرىلدى. مىسالى, وتكەن جىلى وبلىس كومانداسى قازاقستاننىڭ اشىق چەمپيوناتىندا جەڭىمپاز اتانعان.
سونىمەن قاتار پرەزيدەنتكە تاجىريبە الماسىپ, سپورتتىق شەبەرلىگىن شىڭداۋ ءۇشىن ۇستەل تەننيسى اكادەمياسىن قۇرۋ جوسپارلانىپ وتىرعانى جونىندە باياندالدى.
مەملەكەت باسشىسى سپورت ارەنالارىن ارالاپ كورىپ, ء«ۇمىت» بالالار ءۇيىنىڭ تاربيەلەنۋشىلەرىمەن سويلەستى. پرەزيدەنت وبلىس اكىمىنە اتالعان مەكەمەنىڭ جاعدايىن ەرەكشە باقىلاۋدا ۇستاۋدى جانە تاربيەلەنۋشىلەردى تۇرعىن ۇيمەن قامتاماسىز ەتۋدى تاپسىردى.
«سىزدەرمەن جۇزدەسكەنىمە قۋانىشتىمىن. ال ورتالىققا كەلەر بولساق, ول, شىن مانىندە, جۇيەلى جۇمىس ىستەپ جاتىر. جالپى, ۇستەل تەننيسىمەن شۇعىلدانۋ ادامي قاسيەتتەر مەن سپورتتىق داعدىلاردى دامىتۋ تۇرعىسىنان پايدالى», دەدى مەملەكەت باسشىسى.
قاسىم-جومارت توقاەۆ ورتالىققا اۆتوبۋس سىيلاپ, جاس سپورتشىلارعا تابىس تىلەدى.