پرەزيدەنت قاسىم-جومارت توقاەۆ 23 اقپان كۇنى بالالار قاۋىپسىزدىگىن قامتيتىن زاڭعا ەنگىزىلگەن تولىقتىرۋدى ماقۇلداپ, قول قويدى. قۇجات بالالاردىڭ ومىرىندە, ەمتيحان تاپسىرۋ كەزىندە سترەستى جاعدايلاردى ازايتۋدى دا كوزدەگەن, دەپ جازادى Egemen.kz.
وسى تولىقتىرۋلار نەگىزىندە ەندى 1 سىنىپتان باستاپ ليتسەي, گيمنازيادا وقىعىسى كەلگەن بالالاردان ەمتيحان الىنبايدى. زاڭنىڭ بۇل تەتىگى تۋرالى ورتا ءبىلىم بەرۋ كوميتەتىنىڭ باسشىسى قانىبەك جۇماشەۆ ايتىپ بەردى.
«بۇل نورما بارلىق تيپتەگى مەكتەپتەرگە قابىلداۋداعى شەكتەۋلەردى الىپ تاستاپ, دايىندىق دەڭگەيىنە قاراماستان بارلىق بالاعا نەگىزگى ءبىلىمدى مەڭگەرتۋ, تانىمدىق قابىلەتتەرى مەن الەۋمەتتىك قارىم-قاتىناس داعدىلارىن دامىتۋ ءۇشىن تەڭ مۇمكىندىكتەر مەن قولجەتىمدىلىكتى قامتاماسىز ەتەدى», دەدى قانىبەك جۇماشەۆ.
بەلگىلەنگەن نورما جاڭا وقۋ جىلىنان باستاپ قولدانىلادى.